Takobin Ubanmu Ya Fāɗo a kan Filistiya
Rigyawar Ubanmu ta taso daga arewa bisa Filistiya, farat ɗaya har ubanni ba sa juyowa domin 'ya'yansu. Gaza da Ashkelon suna makoki. Ya ƙare da tambayar takobi har yaushe zai huta, amsar kuwa ita ce: ba yayin da yake da umarni ba tukuna.
47 1Maganar Ubanmu da ta zo wa annabi Irmiya game da Filistiyawa, kafin Fir'auna ya kai wa Gaza hari.
2Ga abin da Ubanmu ya ce, “Ku duba, ruwaye suna tāsowa daga arewa, suna zama rigyawan ambaliya. Za su mamaye ƙasar da dukan abin da ke cikinta, birnin da mutanensa. Mutane za su yi ihu, dukan mazaunan ƙasar kuma za su yi kuka. 3Da jin ƙarar kofaton ingarma masu bugun ƙasa, da ƙugin karusansa da ƙarar ƙafafunsa, ubanni ba za su juyo wa 'ya'yansu ba, hannuwansu sun shanye, 4saboda ranar da take zuwa don ta hallaka dukan Filistiyawa, don a datse daga Taya da Sidon kowane mai rai da zai iya taimako. Gama Ubanmu yana hallaka Filistiyawa, raguwar mutanen gaɓar tekun Kaftor. 5Gaza za ta aske kanta don makoki; Ashkelon za ta yi tsit. Ke raguwar kwarinsu, har yaushe za ki yanka jikinki? 6Kai, takobin Ubanmu! Har yaushe za ka huta? Ka koma cikin kubenka; ka natsu, ka zauna lafiya. 7Amma yaya zai huta, tun da Ubanmu ya umarce shi? A kan Ashkelon da kuma a kan bakin teku—can ne ya umarce shi yă je.”