Avāwui Raighai Philistiawuitungli Tāra
Ithumwui Avāwui kongra̱ atungshongwui eina Philistine ngaleiwui tungli phongshokta, amaraida kharā kaji avāva̱ ngarāna anaongarāli makapeiungmana. Gaza eina Ashkelonna chapngachāa. Karankhafara va̱rihapkida da raighaili ngahānkhui, kala hukhum leichinglakha va̱rimahapmara da ngahāna chieina ngachanga.
47 1Pharaohna Gazali sākathānranglakha eina, Philistinenaobingwui pongli ithumwui Avāwui tui chi marān Jeremiahli rāhānga.
2Ithumwui Avāna hithāda hānga: "Yanglu, tara̱ atungshongwui eina ngaphaokāra, kala phongshilongda tara̱ ngasāra. Tara̱na ngalei kala chiwui alungli khalei saikora, keinung kala chiwui somkapambingli phongshilongvāra. Mibingna vaora, kala ngaleili somkapam saikorana chapngachāra. 3Awui sigui avāwui pheikhon panglāk eina, awui siguigaribingwui ngashum eina kala awui kāngpheibingwui khangarum shālaga, avā ngarāna anaongarāwui vang makapeiungmana, athumwui pāng khikha masāthukthuwa, 4Philistinenaobing saikora sāshimān khavai rāra zimiksho chiwui vang, Tyre eina Sidonwui eina ngachon khavai kateibing saikora khuithui khavai. Kaja Caphtor ngayipheiwui shākkahaibing, Philistinenaobingli ithumwui Avāna sāshimānra. 5Gazana sifada kui sihaira; Ashkelon sashimānmihaira. Nathum, athumwui tampākwui shākkahaibing, kayākha atam vāshungda nathum khalatta ra̱pairakhala? 6Iyavo, ithumwui Avāwui raighai! Kayākha atam vāshungda na ngasāmkhuirakhala? Nawui ahonli sanghaolu; kasaikha pamda va̱ri kahaida leilu. 7Kha ithumwui Avāna chili ningkhami mikahai tharan, kathada chi ngasāmkhuirakhala? Ashkelon ngachaili kala ngayipheili ana chi shichinhaina."
