Mma Agha Nna Anyị Na-adakwasị Filistia
Iju mmiri Nna anyị si nʼugwu bilie kpuchie Filistia, na mberede nke na ndị nna adịghị atụgharị maka ụmụ ha. Gaza na Ashkelọn na-eru ụjụ. O mechiri na a jụrụ mma agha ahụ ruo mgbe ole ọ ga-ezu ike, ọ zakwara: ọ bụghị mgbe ọ ka nwere iwu.
47 1Okwu Nna anyị nke rutere Jeremaya onye amụma banyere ndị Filistia, tupu Fero ebuso Gaza agha.
2Nke a bụ ihe Nna anyị kwuru, sị: “Lee, mmiri na-esi nʼugwu na-arị elu, na-aghọ idei mmiri na-eru eru. Ha ga-ekpuchi ala ahụ na ihe niile dị nʼime ya, obodo ahụ na ndị bi nʼime ya. Ndị mmadụ ga-eti mkpu, onye ọbụla bi nʼala ahụ ga-ebekwa ákwá. 3Nʼụda nkwọnkwọ ụkwụ ịnyịnya ya, nʼụda ụgbọ agha ya na mkpọtụ ụkwụ ụgbọ ya, ndị nna agaghị echigharị maka ụmụ ha, aka ha ga-ada mba, 4nʼihi ụbọchị ahụ na-abịa ibibi ndị Filistia niile, ikewapụ site na Taịa na Saịdọn onye ọbụla fọdụrụ nke pụrụ inye aka. Nʼihi na Nna anyị na-ebibi ndị Filistia, ndị fọdụrụ site nʼala mmiri nke Kaftọ. 5Gaza ga-akpụcha isi ya nʼiru ụjụ; a ga-emekwa ka Ashkelọn dere duu. Unu ndị fọdụrụ na ndagwurugwu ha, ruo ole mgbe ka unu ga-egbukasị onwe unu? 6Ewoo, mma agha Nna anyị! Ruo ole mgbe ka ị ga-ezu ike? Laghachi nʼọbọ gị; dere duu, nọrọkwa nʼudo. 7Ma olee otú o nwere ike isi zuo ike mgbe Nna anyị nyeworo ya iwu? Imegide Ashkelọn na imegide ikpere oké osimiri—ọ bụ ebe ahụ ka o ziri ya.”
