Josue 14

14 ¹Mao kini ang mga panulondon nga nadawat sa katawhan sa Israel didto sa Canaan, nga giapod-apod kanila ni Eleazar nga pari, ni Josue nga anak ni Nun, ug sa mga pangulo sa mga tribo sa mga katigulangan sa Israel. ²Pinaagi sa ripa, sumala sa gisugo sa atong Amahan pinaagi kang Moises, nadawat nila ang ilang panulondon—alang sa siyam ka tribo ug sa katunga nga tribo. ³Kay gihatagan na ni Moises ang duha ka tribo ug ang katunga nga tribo sa ilang panulondon tabok sa Jordan, apan ang mga Levita wala niya hatagi ug panulondon uban kanila. ⁴Kay ang mga anak ni Jose maoy duha ka tribo, ang Manases ug ang Efraim. Ang mga Levita walay nadawat nga bahin sa yuta, gawas lamang sa mga lungsod nga puy-anan, uban sa mga sibsibanan alang sa ilang mga kahayopan ug katigayonan. ⁵Busa gibuhat sa katawhan sa Israel ang sumala sa gisugo sa atong Amahan kang Moises, ug ilang gibahinbahin ang yuta.

Nadawat ni Caleb ang Saad sa Amahan

⁶Miduol kang Josue didto sa Gilgal ang katawhan sa Juda, ug si Caleb nga anak ni Jefone nga Kenizihanon miingon kaniya, “Nahibalo ka sa gisulti sa atong Amahan kang Moises, ang tawo sa atong Amahan, mahitungod kanimo ug kanako didto sa Kadesh-barnea. ⁷Kap-atan ako ka tuig sa dihang gisugo ako ni Moises, nga alagad sa atong Amahan, gikan sa Kadesh-barnea aron magpaniid sa yuta, ug gidad-an ko siyag balita sumala sa anaa sa akong kasingkasing. ⁸Apan ang mga kauban kong tigpaniid nga mitungas uban kanako naghimo nga matunaw sa kahadlok ang mga kasingkasing sa katawhan, samtang ako hingpit nga misunod sa akong Amahan. ⁹Niadtong adlawa nanumpa si Moises kanako: ‘Sa pagkatinuod ang yuta nga gilakwan sa imong tiil mahimong imong panulondon ug sa imong mga anak hangtod sa kahangtoran, tungod kay hingpit kang misunod sa akong Amahan.’

¹⁰Karon, gitipigan ako nga buhi sa atong Amahan sulod sa kap-atan ug lima ka tuig, sumala sa iyang gisaad, sukad sa panahon nga iyang gisulti kini nga pulong kang Moises sa dihang naglatagaw ang Israel sa kamingawan. Ania ako karon, kawaloan ug lima na ka tuig ang panuigon. ¹¹Karong adlawa kusgan pa ako sama sa adlaw nga gipalakaw ako ni Moises; ang akong kusog karon sama sa akong kusog kaniadto—alang sa gubat, alang sa paggawas ug pagsulod. ¹²Busa ihatag kanako kining kabungtoran nga gisulti sa atong Amahan niadtong adlawa. Nadungog mo kaniadto nga atua didto ang mga Anakihanon, uban sa dagko ug pinarilan nga mga siyudad. Tingali ang atong Amahan mag-uban kanako, ug akong papahawaon sila, sumala sa iyang giingon.”

¹³Unya gipanalanginan ni Josue si Caleb nga anak ni Jefone ug gihatag kaniya ang Hebron ingon nga iyang panulondon. ¹⁴Busa ang Hebron nahimong panulondon ni Caleb nga anak ni Jefone nga Kenizihanon hangtod niining adlawa, tungod kay hingpit siyang misunod sa atong Amahan, ang Dios sa Israel. ¹⁵Ang Hebron kaniadto ginganlan ug Kiriat-arba, kay si Arba mao ang labing bantogan nga tawo taliwala sa mga Anakihanon. Unya ang yuta nakapahulay gikan sa gubat.