Avāna Israelli Awui Shimlui Mi
Ithumwui Avāna kaji eina ram lot eina kakhāli kasāhai, kha Calebna chāhaida ram akha phāngda chātha. Kum 85 thā eina, kum 45 kachāthai kaphāhai tuingarung eina, kaji mi (giant) leikhalei kaphung ram ngāphāngda. Joshuana amali Hebron pikhai.
14 1Hibing hi Israelnaobingna Canaan ngaleili samphangkahai shimluibingna; Pāngmon Eleazar, Nunwui naomayara Joshua kala Israel avāva̱ ngarāwui shangbingwui kathānabingna athumli chi ngayarmihaowa. 2Moses eina ithumwui Avāna kakaso athishurda, shang chiko kala tangkhai shangwui vang kalā yanglaga athumwui shimlui samphanga. 3Kaja Mosesna shang khani kala tangkhai shangli Jordan kānkāda athumwui shimlui mihaowa, kha Levinaobingli athumwui ngachaili shimlui mamimana. 4Kaja Josephwui naomayarabing Manasseh kala Ephraim chi shang khanina. Levinaobingna ngaleiwui yar makhuimana; athumna pamkhavai keinung kala athumwui sha̱kei kala lanwui vang seihomphungmang samphanga. 5Chithāda ithumwui Avāna Mosesli kakaso athishurda Israelnaobingna sai, kala athumna ngalei chi ngayara.
Calebna Avāwui Tuingashit Samphanga
6Judahnaobingna Gilgalli Joshuali samphanga, kala Keniznaobingwui Jephunnehwui naomayara Calebna ali hānga, "Kadesh-barneali nawui kala iwui maramli ithumwui Avāna ithumwui Avāwui mi Mosesli hāngkahai chi nana thei. 7Ithumwui Avāwui rao Mosesna ili Kadesh-barneawui eina ngalei ayang khavai chihovai tharan I zingkum hangmati kāhairasai, kala iwui ningli leikahai athishurda ina ali pao unghānga. 8Kha ili ngasoda vākahai ra̱khayangbingna mibingwui ning suitā ngasaka, kha ina iwui Avāli ningtongchaoda shura. 9Chithang ngalāngda Mosesna ili khangashit sai: 'Naphei kānkahai ngalei chi katang mavaila nawui kala nanao ngarāwui shimlui sāra, khikhalajila nana iwui Avāli ningtongchaoda shura.'
10Ara, ana Mosesli tui hi hāngkahai atamwui eina thuida, Israel lamhāngli ngayinzatlakha, ithumwui Avāna ana ngashitmi athishurda ili zingkum hangmatida phangā ringngasakta lei. Yanglu, aja I zingkum hangchishatta phangā kāhairasai. 11Aja Mosesna ili chihovai zimiksho thada I pangshap chichinga; raiwui vang, zatphok kala zangvāwui vang, ara iwui yāng chi atam chiwui iwui yāng thada chichinga. 12Chiwui vang chithang ithumwui Avāna hāngkahai kaphungram hi ili khamilu. Keinung kajui kala raipan sākahai ngasoda Anakimnaobing chili lei da nana chitharan shākahaina. Ithumwui Avāna ili ngasomira, kala ana hāngkahai athishurda ina athumli kashamshokra."
13Chieina Joshuana Jephunnehwui naomayara Calebli somiya, kala Hebron chi awui shimlui sāda ali mihaowa. 14Chithāda Hebron chi aja zimiksho vāshungda Keniznaobingwui Jephunnehwui naomayara Calebwui shimlui ngasāhaowa, khikhalajila ana Israelwui Vare ithumwui Avāli ningtongchaoda shura. 15Hebron kaji hi khareli Kiriath-arba hosai, kaja Arba chi Anakimnaobingwui ngachaili reimeikap kaje mina. Chieina ngalei chi raiwui eina ngasāmkhuihaowa.
