Agya no De Agyapade Ma Israel
Wɔto ntonto kyekyɛ asase no sɛnea yɛn Agya hyɛe no, nanso Kaleb ba bɛsrɛ asase fa pɔtee bi. Ɔadi mfe aduɔwɔtwe num, nanso ɔpɛ mmepɔ asase a akɛseɛfo te so no, esiane bɔhyɛ a wɔhyɛɛ no mfe aduanan num a atwam no nti. Yosua de Hebron ma no.
14 1Eyinom ne agyapade a Israelfo nyae wɔ Kanaan, a ɔsɔfo Eleasar ne Nun ba Yosua ne Israel agyanom mmusuakuw ntuanofo kyekyɛɛ maa wɔn no. 2Wɔnam ntonto so nyaa wɔn agyapade, sɛnea yɛn Agya nam Mose so hyɛɛ no, maa mmusuakuw akron ne abusuakuw fã no. 3Efisɛ na Mose de mmusuakuw abien ne abusuakuw fã no agyapade ama wɔn wɔ Yordan agya, nanso wamma Lewifo agyapade biara wɔ wɔn mu. 4Efisɛ Yosef mma yɛɛ mmusuakuw abien, Manase ne Efraim. Lewifo annya asase no mu kyɛfa biara, gye nkuro a wɔbɛtena mu ne adidibea a ɛka ho ama wɔn mmoa ne wɔn agyapade nko ara. 5Enti Israelfo yɛɛ sɛnea yɛn Agya hyɛɛ Mose no, na wɔkyekyɛɛ asase no.
Kaleb Nya Agya no Bɔhyɛ
6Yudafo baa Yosua nkyɛn wɔ Gilgal, na Kenisni Yefune ba Kaleb ka kyerɛɛ no se, “Wunim asɛm a yɛn Agya ka kyerɛɛ Mose, yɛn Agya nipa no, faa wo ne me ho wɔ Kades-Barnea no. 7Bere a yɛn Agya somfo Mose somaa me fii Kades-Barnea sɛ menkɔsrapa asase no mu no, na madi mfe aduanan, na mede amanneɛ sɛnea ɛte me koma mu san baa ne nkyɛn. 8Nanso me mfɛfo asrapafo a wɔne me kɔɔ no maa nkurɔfo no koma bɔɔ hu, na me de, midii mʼAgya akyi koraa. 9Da no Mose kaa ntam kyerɛɛ me se, ‘Ampa ara asase a wo nan atiatia so no bɛyɛ wo ne wo mma agyapade daa, efisɛ wodii mʼAgya akyi koraa.’
10Afei, yɛn Agya ama mate nkwa mfe aduanan anum, sɛnea ɔhyɛɛ bɔ no, efi bere a ɔka asɛm yi kyerɛɛ Mose, bere a Israel kyini wɔ sare so no. Seesei mewɔ ha nnɛ, madi mfe aduɔwɔtwe anum. 11Nnɛ mʼahoɔden te sɛ da a Mose somaa me no; mʼahoɔden a mewɔ seesei no ne nea na mewɔ saa bere no sɛ—sɛ ɛyɛ ɔko anaa adekɔ ne adeba. 12Enti fa bepɔw asase yi a yɛn Agya kaa ho asɛm da no ma me. Wotee saa bere no sɛ Anakfo wɔ hɔ, na wɔwɔ nkuropɔn akɛse a wɔabɔ ho ban. Ebia yɛn Agya bɛka me ho, na mɛpam wɔn, sɛnea ɔkae no.”
13Afei Yosua hyiraa Yefune ba Kaleb, na ɔde Hebron maa no sɛ nʼagyapade. 14Enti Hebron bɛyɛɛ Kenisni Yefune ba Kaleb agyapade de besi nnɛ, efisɛ odii yɛn Agya, Israel Nyankopɔn, akyi koraa. 15Kane no na Hebron din de Kiriat-Arba, efisɛ na Arba ne onipa a ɔso sen obiara wɔ Anakfo mu. Afei asase no nyaa ahomegye fii ɔko ho.
