Yosuwa 14 FHB Father's Heart Bible™

14 ¹Izi ni zo ntoranwa abana ba Isirayeli baronse mu gihugu ca Kanani, izo Eleyazari umuherezi, Yosuwa mwene Nuni, be n’abakuru b’imiryango ya ba sekuruza b’Abisirayeli babagaburiye. ²Baronse intoranwa yabo biciye ku bupfindo, nk’uko Data wa twese yari yabitegetse biciye kuri Musa, ku bwa ya miryango icenda n’igice c’umuryango. ³Kuko Musa yari yarahaye iyo miryango ibiri n’igice c’umuryango intoranwa yabo hakurya ya Yorodani, mugabo Abalewi ntiyabahaye intoranwa muri bo. ⁴Kuko abana ba Yosefu bari imiryango ibiri, Manase na Efurayimu. Abalewi nta kintu baronse mu gihugu, atari ibisagara vyo kubamwo, hamwe n’amatongo yo kuragiriramwo amatungo yabo n’ibintu vyabo. ⁵Abana ba Isirayeli bakora nk’uko Data wa twese yari yategetse Musa, maze bagabura ico gihugu.

Kalebu araronka isezerano rya Data wa twese

⁶Abana ba Yuda baza aho Yosuwa yari i Gilugali, maze Kalebu mwene Yefune Umukenizi aramubwira ati: “Urazi ivyo Data wa twese yabwiye Musa, wa muntu wa Data wa twese, vyerekeye wewe nanje i Kadeshi-barineya. ⁷Nari mfise imyaka mirongo ine igihe Musa, umusavyi wa Data wa twese, yanyungika mvuye i Kadeshi-barineya kugira ndamure ico gihugu, maze ndamuzanira inkuru nk’uko vyari mu mutima wanje. ⁸Ariko bagenzi banje twari twaradutse tujana baratituza imitima y’abantu n’ubwoba, mugabo jewe nakurikiye Data wanje bimwe bishitse. ⁹Uwo musi Musa aranyaragiza ati: ‘Nya gihugu ikirenge cawe caciyemwo kizoba intoranwa yawe n’iy’abana bawe ibihe vyose, kuko wakurikiye Data wanje bimwe bishitse.’

¹⁰None rero, Data wa twese yaramfashije kubaho imyaka mirongo ine n’itanu, nk’uko yari yarabisezeranye, kuva igihe yabwira iryo jambo Musa Isirayeli ariko irazererera mu bugaragwa. Ng’iyi ndi hano uno musi, mfise imyaka mirongo umunani n’itanu. ¹¹Uno musi ndacanakomeye nk’uko nari ndi ku musi Musa yanyungika; inkomezi zanje zo ubu zingana n’inkomezi nari mfise ico gihe, zo kurwana, zo kugenda no kugaruka. ¹²Ni co gituma umpa iki gihugu c’imisozi Data wa twese yavuze uwo musi. Wumvise ico gihe yuko Abanaki bari ng’aho, bafise ibisagara binini bikomeye. Hari aho Data wa twese azoba kumwe nanje, maze mbirukane, nk’uko yavuze.”

¹³Maze Yosuwa aravugira umugisha Kalebu mwene Yefune, aca amuha Heburoni ngo ibe intoranwa yiwe. ¹⁴Ni co gituma Heburoni yacitse intoranwa ya Kalebu mwene Yefune Umukenizi gushika uno musi, kubera yakurikiye Data wa twese, Imana ya Isirayeli, bimwe bishitse. ¹⁵Heburoni kera yitwa Kiriyati-ariba, kuko Ariba yari umuntu ahambaye muri Abanaki. Maze ico gihugu kirahengeshanya ku ntambara.