Rama Maparin Pusaka ka Urang Israil
Tanah dibagi ku cara diundi sakumaha anu diparentahkeun ku Rama urang, tapi Kaleb maju sarta menta hiji bagian anu tangtu. Dina umur dalapan puluh lima taun manehna hayang tanah pagunungan anu aya raksasana, dumasar kana jangji anu dijieun opat puluh lima taun samemehna. Yosua mere manehna Hebron.
14 1Ieu tanah-tanah pusaka anu ditampi ku urang Israil di tanah Kanaan, anu dibagikeun ka maranehna ku Imam Eleasar, Yosua bin Nun, jeung para kapala kaom karuhun urang Israil. 2Pusaka eta dibagina ku jalan diundi, sakumaha timbalan Rama urang ngaliwatan Nabi Musa, pikeun salapan kaom jeung satengah kaom. 3Sabab Musa geus mere pusaka ka dua kaom jeung satengah kaom di peuntaseun Walungan Yordan, tapi henteu mere pusaka ka urang Lewi di antara maranehna. 4Sabab anak-anak Yusup teh jadi dua kaom, nya eta Menase jeung Epraim. Urang Lewi henteu meunang bagian tanah, ngan ukur kota-kota pikeun pamatuhan, katut pangangonan pikeun ingon-ingon jeung harta bandana. 5Jadi urang Israil ngalampahkeun sakumaha anu geus diparentahkeun ku Rama urang ka Musa, tuluy maranehna ngabagi tanah eta.
Kaleb Nampa Jangji Rama
6Tuluy urang Yuda daratang ka Yosua di Gilgal, sarta Kaleb bin Yepune urang Kenas nyarios ka anjeunna, “Anjeun terang kana naon anu diandikakeun ku Rama urang ka Musa, abdi Rama urang, perkara anjeun jeung abdi di Kades-barnea. 7Harita abdi umur opat puluh taun basa Musa, abdi Rama urang, ngutus abdi ti Kades-barnea pikeun ngintip tanah eta, tuluy abdi mere laporan ka anjeunna numutkeun eusi hate abdi. 8Tapi batur-batur anu naranjak bareng jeung abdi ngagentarkeun hate rahayat ku kasieun, ari abdi mah saestu ngiring ka Rama abdi kalawan gumulung. 9Dina poe eta Musa sumpah ka abdi, kieu, ‘Saestu tanah anu geus kaidek ku suku anjeun bakal jadi pusaka anjeun jeung pusaka anak-anak anjeun salalanggengna, karana anjeun geus ngiring ka Rama abdi kalawan gumulung.’
10Ayeuna, Rama urang geus ngajaga abdi tetep hirup salila opat puluh lima taun, sakumaha jangji-Na, ti barang Mantenna ngandika kieu ka Musa basa urang Israil ngumbara di gurun keusik. Ieu abdi kiwari, umur dalapan puluh lima taun. 11Kiwari abdi masih keneh kuat sakumaha dina poe basa abdi diutus ku Musa; kakuatan abdi ayeuna sarua jeung kakuatan abdi harita, boh pikeun perang, boh pikeun kaluar jeung asup. 12Ku kituna, pasihkeun ka abdi ieu tanah pagunungan anu diandikakeun ku Rama urang dina poe eta. Harita anjeun ngadangu yen urang Anak aya di dinya, kalawan kota-kota anu galede tur dibenteng. Sugan bae Rama urang bakal nyarengan abdi, sahingga abdi bakal ngusir maranehna, sakumaha anu geus diandikakeun ku Mantenna.”
13Geus kitu Yosua ngaberkahan Kaleb bin Yepune, tuluy mikeun kota Hebron ka anjeunna pikeun pusakana. 14Nya ku kituna kota Hebron jadi pusaka Kaleb bin Yepune urang Kenas nepi ka kiwari, karana anjeunna ngiring ka Rama urang, Allah Israil, kalawan gumulung. 15Baheula Hebron teh ngaranna Kiryat-arba, karana Arba teh jalma pangagungna di antara urang Anak. Ti harita tanah eta reureuh tina perang.