Tebui Israel nem pa senmang agütsü
Asen Tebui melaba ama, lima an toktanga lemsa, saka Yefune jabaso Kalebi aru, aser lima tesadang ka asoshi yok. Küm 45 teka azüngashiba o teka agi, küm 85 nung pai Anakim alir aliba tenem ochi. Yihusuai pa dang Hebron agüja.
14 1Kanan lima nung Israel chirtemi anguba senmang, putir Eleazar, Nun jabaso Yihusua, aser Israel kidong kinunger tanishirtemi parnok nem lemsaba, itemi lir. 2Tebui Mosa ajanga melaba ama, an toktanga kidong tuku aser kidong tesadang asoshi parnoki pei senmang angu. 3Kechiaser Mosai kidong ana aser kidong tesadang nem Yordan ajanger parnok senmang agütsü, saka Levitem nem parnok rongnung senmang kata magütsü. 4Kechiaser Yosef chirtemji kidong ana, Manase aser Efraim liasü. Levitemi linük nungi shilem kata mangu, oda alitsü yimtitem dang, parnok kiset shirurutem aser oset asoshi chiyimdak den. 5Anungji Tebui Mosa dang melaba ama Israel chirtemi inyak, aser parnoki linük alem.
Kalebi Tebu tenangzükba angu
6Yihuda chirtem Gilgal nung Yihusua dangi aru, aser Yefune jabaso Keniz nunger Kalebi pa dang ashi, “Na aser ni asoshi Kadesh-barnea nung Tebui Tebu nisung Mosa dang ashiba o na metet. 7Tebu tenzüker Mosai ni linük ladangtsü asoshi Kadesh-barnea nungi yokdang ni küm lir liasü, aser ni kü mulungjang nung aliba ama osang pa dang meyipa bener aru. 8Saka ni den atuba adianu ladangertemi nüburtem mulungjang tsübuba agi yimsatsü, saka ni temulung ajak agi kü Bu sülen anitak. 9Iba anogo nung Mosai kü dang azüngashia ashi, ‘Atangji ne tetsüng ajemoklen linükji ne aser ne chirtem senmang teti tatem alitsü, kechiaser nai temulung ajak agi kü Bu sülen anitak.’
10Jokorla, Israel lisem lima nung nemzüa alidang Tebui iba o Mosa dang ashiba mapang nungi, pai nangzükba ama ni küm lir-pungu kümzüka ayuogo. Ajiang, tanü ni arishi küm tir-pungu lir. 11Tanü Mosai ni yokdang anogo ama ni tashi tait lir; joko kü tashiji tamasa kü tashi den kasa lir—rara asoshi, apusotsü aser arutsü asoshi. 12Anungji iba anogo nung Tebui ashiba iba tenem lima kü nem agüjang. Yangji Anakim ali, jara tulu agi meketbangba yimtitem den ta nai iba mapang nung angashi. Ashiko Tebu ni den alitsü, aser pai ashiba ama, ni parnok aridoktsü.”
13Idangji Yihusuai Yefune jabaso Kaleb moa, aser pa nem senmang asütsü atema Hebron agütsü. 14Anungji pai Israel Tsüngrem Tebu sülen temulung ajak agi anitak asünung, tanü tashi Hebronji Keniz nunger Yefune jabaso Kaleb senmang aküm. 15Hebron tenüng akhidang Kiriath-arba liasü; kechiaser Arba Anakim rongnung tulutiba nisung liasü. Idangji linükji rara nungi anisüngzük liasü.