ኢያሱ 14

14 ¹ካህኑ አልዓዛር፣ የነዌ ልጅ ኢያሱና የእስራኤል የአባቶች ነገዶች አለቆች በከነዓን ምድር ለእስራኤል ሕዝብ ያከፋፈሏቸው ርስቶች እነዚህ ናቸው። ²አባታችን በሙሴ እጅ እንዳዘዘ፣ ለዘጠኙ ነገዶችና ለግማሹ ነገድ ርስታቸውን በዕጣ ተቀበሉ። ³ሙሴ ለሁለቱ ነገዶችና ለግማሹ ነገድ ከዮርዳኖስ ማዶ ርስታቸውን ሰጥቷቸው ነበር፤ ለሌዋውያን ግን በመካከላቸው ርስት አልሰጣቸውም። ⁴የዮሴፍ ልጆች ምናሴና ኤፍሬም ሁለት ነገዶች ነበሩና። ሌዋውያን የሚኖሩባቸውን ከተሞች እንጂ ከምድሩ ድርሻ አልተቀበሉም፤ ከእነርሱም ጋር ለከብቶቻቸውና ለንብረታቸው የሚሆን የግጦሽ መሬት ተሰጣቸው። ⁵እንግዲህ የእስራኤል ሕዝብ አባታችን ሙሴን እንዳዘዘው አደረጉ፤ ምድሪቱንም ተከፋፈሉ።

ካሌብ የአብን ተስፋ ይቀበላል

⁶የይሁዳ ሕዝብ በጊልጋል ወደ ኢያሱ መጡ፤ ቄኔዛዊው የይፎኔ ልጅ ካሌብም እንዲህ አለው፤ “አባታችን በቃዴስ በርኔ ስለ አንተና ስለ እኔ ለአባታችን ሰው ለሙሴ የተናገረውን አንተ ታውቃለህ። ⁷የአባታችን አገልጋይ ሙሴ ምድሪቱን እንድሰልል ከቃዴስ በርኔ በላከኝ ጊዜ የአርባ ዓመት ሰው ነበርሁ፤ በልቤ የነበረውንም ዘገባ መልሼ አመጣሁለት። ⁸ከእኔ ጋር የወጡት ባልንጀሮቼ ሰላዮች ግን የሕዝቡን ልብ በፍርሃት አቀለጡት፤ እኔ ግን አባቴን ፈጽሜ ተከተልሁ። ⁹በዚያ ቀን ሙሴ እንዲህ ብሎ ማለልኝ፤ ‘እግርህ የረገጠችው ምድር በርግጥ ለአንተና ለልጆችህ ለዘላለም ርስት ትሆናለች፤ አባቴን ፈጽመህ ተከትለሃልና።’

¹⁰አሁንም እነሆ፣ አባታችን እስራኤል በምድረ በዳ በተንከራተተ ጊዜ ይህን ቃል ለሙሴ ከተናገረበት ጊዜ ጀምሮ፣ እንደ ተስፋው ቃል አርባ አምስት ዓመት በሕይወት አቆይቶኛል። እነሆ ዛሬ የሰማንያ አምስት ዓመት ሰው ሆኛለሁ። ¹¹ዛሬም ሙሴ በላከኝ ቀን እንደ ነበርሁ ጠንካራ ነኝ፤ ለውጊያም ሆነ ለመውጣትና ለመግባት የአሁኑ ኀይሌ ያኔ እንደ ነበረኝ ኀይል ነው። ¹²እንግዲህ አባታችን በዚያ ቀን የተናገረልኝን ይህን ተራራማ አገር ስጠኝ። ዔናቃውያን በዚያ እንዳሉ፣ ታላላቅና የተመሸጉ ከተሞችም እንዳሉ ያን ጊዜ ሰምተሃል። ምናልባት አባታችን ከእኔ ጋር ይሆናል፤ እንደ ተናገረውም አባርራቸዋለሁ።”

¹³ያን ጊዜ ኢያሱ የይፎኔን ልጅ ካሌብን ባረከው፤ ኬብሮንንም ርስት አድርጎ ሰጠው። ¹⁴ስለዚህ ቄኔዛዊው የይፎኔ ልጅ ካሌብ አባታችንን፣ የእስራኤልን አምላክ፣ ፈጽሞ ስለ ተከተለ፣ ኬብሮን እስከ ዛሬ ድረስ ርስቱ ሆነች። ¹⁵ኬብሮን ቀድሞ ቂርያት አርባ ትባል ነበር፤ አርባ በዔናቃውያን መካከል ታላቅ ሰው ነበርና። ከዚያም ምድሪቱ ከጦርነት ዐረፈች።