Tata Wisi Heka Bana ba Kiseledi Kimvwama Kyawu
Tsi yákabiswa mu zeki bwosu Tata wetu wásenda, kaasi Kalebi wábwesuka amana wálomba kitini kimosi. Mu mvula makumanana yi tanu, wázola tsi ya myongu yina yena yi batu baneni, mu ngolu ya lusilu lwasilama mvula makumaya yi tanu ku thwala. Yoswa wámuheka Hebeloni.
14 1Tala bimvwama bina batu ba Kiseledi bátambula muna tsi ya Kanana, bina bábakabisila Eleyazadi nganga Nzambi, yi Yoswa mwana wa Nunu, yi bambuta ba makanda ma bakhaka ba Kiseledi. 2Mu zeki, bwosu Tata wetu kázimbula mu nzila ya Moyize, bátambula kimvwama kya bawu, kikuma kya makanda vwa yi kyati kya kanda. 3Mukuma Moyize kákala heka makanda modi yi kyati kya kanda kimvwama kya bawu ku sambwa dikwawu dya Yolutani, kaasi balefi kabahekaku kimvwama hana kati dya bawu. 4Mukuma bana ba Yozefu bákala makanda modi, Manase yi Efwayimi. Balefi kabatambulaku kitini kya tsi, kaasi kaka mbanza za kuzingila, yi bilanga bya mwangu kikuma kya bibulu byawu yi bima byawu. 5Buna batu ba Kiseledi báhanga bwosu Tata wetu kázimbula Moyize, amana bakabisa tsi.
Kalebi Watámbula Kilangi kya Tata
6Batu ba Yuta bisa kwena Yoswa ku Giligali, amana Kalebi mwana wa Yefune mukwa Kenizi wumuzimbwadini: «Ngeyi wuzayini mana Tata wetu kázimbula kwena Moyize, mutu wa Tata wetu, mu mambu maku yi mama ku Kadesi-balaneya. 7Yákala yi mvula makumaya tangwa Moyize, musadi wa Tata wetu, wáthuma tuka ku Kadesi-balaneya mu kutala tsi, amana yámuvutudila tsangu bwosu bwákala mu mbundu yama. 8Kaasi bakwetu bama ba kutala tsi bana bakwenda hakimosi yi meni bálembikisa mbundu za batu mu bweya, kaasi meni yálanda Tata wama mu mbundu yama yosu. 9Muna tangwa dina Moyize wádya ndefi kwena meni: “Mu kyedika tsi yina wádyatila kulu dyaku yakála kimvwama kyaku yi kya bana baku mvula yi mvula, mukuma wálanda Tata wama mu kimakulu.”
10Buthwena, Tata wetu wánzingisa yi moya mvula makumaya yi tanu, bwosu kásila, tuka tangwa dina kázimbula ndinga yayi kwena Moyize muna tangwa Kiseledi kawandatina muna nganga. Tala meni lelu, yenina yi mvula makumi nana yi tanu. 11Lelu yenina yi ngolu bwosu buna yákala muna tangwa dina Moyize wáthuma; ngolu zama buthwena zenina phila mosi yi ngolu zama za muna tangwa dina—kikuma kya mvita, kikuma kya kulubuka yi kuvutuka. 12Buna pheka meni malondi mama mana Tata wetu kázimbula muna tangwa dina. Ngeyi wáyuka muna tangwa dina ni Banakimi bákala kwakuna, yi mbanza za mbuta za ngolu. Fwaniku Tata wetu kakála hakimosi yi meni, amana yikábakula, bwosu kázimbula.»
13Amana Yoswa wámusakumuna Kalebi mwana wa Yefune, amana wámuheka Eboloni hanga kimvwama kyandi. 14Buna Eboloni yákala kimvwama kya Kalebi mwana wa Yefune mukwa Kenizi tii yi kuna lelu dyadi, mukuma wálanda Tata wetu, Nzambi wa Kiseledi, mu kimakulu. 15Eboloni mukolu khumbu yandi yákala Kiliyati-aleba, mukuma Aleba kákala mutu wa mbuta lawu hana kati dya Banakimi. Buna tsi yanánga mu kilembwadi, konda mvita.
