Bouei Israel la Jembü Phetphan Kukei
Seneibü Bouei sakkubü tegü kaonyek phaang pakko janyokei, lausikei Kalebei loenan phetphan che lolo ngekkei. Po saolei ngao kijinei haoei joubü kibü shongh kaodak wanthungkei, po saonyi ngao phang theyolanyobü ngüh hangangbü shanga. Joshuaei hao la Hebron kukei.
14 1Israel shousi shuongei Kanan kaoa lebü phetphanbü shuong habü ho ki; khübü kho ungshedbou Eleazar, Naneibü shou Joshua, hoba Israel shousi shuongbü pisibou chung leiyeibü shuongei haoen la janyokei. 2Seneibü Bouei Mosa danko sakkubü tegü, chung gü hoba chung jamde shanga, phaang pakko haoenei jembü phetphan lekei. 3Aishanga Mosaei Jordan danan chung nyi hoba chung jamde la jembü phetphan kukei, lausikei Levibü la haoen yoa phetphan akitei. 4Aishanga Josef shousi shuong, Manasse hoba Efraim, chung nyi kikei. Levibü la kaonyek phejan akitei, khei kishang sangnyu, hoba haoeneibü samkeisamuk hoba nyaksinam shanga lamshaushang kao ong haoen la kukei. 5Hibü seneibü Bouei Mosa la sakkubü tegü Israel shousi shuongei kümbei, hoba haoenei kaonyek janyokei.
Kalebei Bou Thekubü Hapda
6Jihudabü shousi shuong Gilgala Joshua jungto loukei, hoba Kenizbü Jefuneeibü shou Kalebei hao to lenkei, “Kadesh Barnea a seneibü Bouei seneibü Bou müt Mosa to no hoba ngo shangabü lenbü ngüh kho nyi ngeakei. 7Seneibü Bou khangenbou Mosaei ngo kaonyek chühla Kadesh Barnea ka hautijinei ngo po saonyi kikei, hoba kü maanga kibü tegü ngei hao la ngühlang leibakei. 8Lausikei ngo yoa haubü lapheibü shuongei mütshuongeibü maangpon hatbüei tühnyinkei, aieilausi ngeije kü Bou khümboa kuan sembei. 9Kho chaloua Mosaei kü to theyolanyoko laukei, ‘Maimaitham kaibü you yaüetlangshang kaonyek kho kaibü hoba kaibü chilang phetphan ponpen kilabü, aishanga nyi kü Bou khümboa kuan sembei.’
10Touje, Israel yamlamanga shoongeijinei seneibü Bouei ho ngüh Mosa to lenbü ka jaüan, haoei thekubü tegü, ngo po saonyito ngao sühko lang phokei. Chühashi, tat ngo po saoleito ngao kia. 11Tat Mosaei ngo hautibü chalou tegü ngo touje hau kia; shaanglaje ngeibü hau kibü tegü, wapyola shanga hoba haubü loubü shanga, touje ngeibü hau kitham kia. 12Khoei kho chaloua seneibü Bouei lenbü ho shongh kao tou kü la kushi. Kho chaloua Anakimbü khünei kikei, hoba yaangbü baei kailepbü sangnyu yoan kikei dogo nyi ditkei. Aingenyu seneibü Bou ngo yoa kilabü, hoba haoei lenbü tegü ngei haoen shian sattilabü.”
13Kheijinei Joshuaei Jefuneeibü shou Kaleb to haükukei, hoba Hebron hao la jembü phetphan shangabü kukei. 14Khoei Hebron kho tat sühko Kenizbü Jefuneeibü shou Kalebeibü phetphan yeikei, aishanga haoei seneibü Bou, Israelbü Mühghaü, khümboa kuan sembei. 15Hebron nyen shangied Kiriath Arba kikei, aishanga Arba kho Anakimbü yoa müt yaangbou kikei. Kheijinei kaonyeka wapyo ka hakso kikei.
