Pitri pora Israel ke tar uttoradhikar dise
Amar Pitri hukum diya nisina desh tu chithi phela kori kene bhag kori dise, kintu Caleb ahi kene ekta bises bhag mangise. Pochasi bochor laga hoi kene tai dangor-dangor manuh thaka pahar desh tu bisarise, choichalis bochor age te diya vachan laga bhorsa te. Joshua taike Hebron di dise.
14 1Eitu khan to Israel laga manuh khan pora Canaan desh te paise uttoradhikar ase, juntu Eleazar purohit, Nun laga putro Joshua, aru Israel laga baba-pita khandan khan laga mukhiya khan pora tarkhan ke bhag kori dise. 2Amar Pitri pora Moses dwara hukum diya nisina, chithi phela kori kene, tarkhan pora nou-ta khandan aru adha-khandan karne nijor uttoradhikar paise. 3Kilemane Moses pora duita khandan aru adha-khandan ke Jordan nodi laga paar te tarkhan laga uttoradhikar dise, kintu Levi khan ke tarkhan majot te eku uttoradhikar diya nai. 4Kilemane Joseph laga putro khan duita khandan thakise, Manasseh aru Ephraim. Levi khan pora mati laga eku bhag pua nai, khali thaki bole sohor khan he, tarkhan laga janwar aru sompotti karne ghas-pathar mati logot te. 5Etiya Israel laga manuh khan pora amar Pitri pora Moses ke hukum diya nisina korise, aru tarkhan pora mati bhag kori loise.
Caleb pora Pitri laga vachan paise
6Judah laga manuh khan Gilgal te Joshua logot te ahhise, aru Kenaz jati laga Jephunneh laga putro Caleb pora tar ke koise, “Kadesh-barnea te apuni aru moi laga bisoi te amar Pitri pora Moses, amar Pitri laga manuh ke ki koise, eitu apuni jane. 7Amar Pitri laga noukar Moses pora mati ke sabole Kadesh-barnea pora moi ke pathaise, titia moi chalis bachor thakise, aru moi laga mon te ki thakise, tene khobor moi tar logot te wapas anise. 8Kintu moi logot te uthi jua sathi khan pora bhoi di kene manuh khan laga mon pigli jabole dise, kintu moi to pura mon pora moi laga Pitri laga piche korise. 9Hei din te Moses pora moi logot te kosom khaise, ‘Hosa pora tumi laga theng juntu mati te berai thakise, eitu tumi aru tumi laga bacha khan laga uttoradhikar hodai karne hobo, kilemane tumi pura mon pora moi laga Pitri laga piche korise.’
10Etiya, amar Pitri pora, Tar vachan diya nisina, Israel khan jongol te berai thaka homoi te eitu kotha Moses ke kowa pora, moi ke chalis-pansh bachor jinda rakhise. Sabi, aji moi assi-pansh bachor laga hoise. 11Moses pora moi ke pathai diya din te moi kiman takot thakise, aji bhi moi itna he takot ase; etiya moi laga takot to titia laga takot nisina ase—lorai karne, bahar te ulai jabole aru bhitor te ahhibole. 12Etiya hei din te amar Pitri pora kowa eitu pahar laga desh moi ke dibi. Titia apuni hunise ta te Anak jati thakise, dangor aru garh thaka sohor khan logot te. Hoito amar Pitri moi logot te thakibo, aru Tar kowa nisina, moi tarkhan ke khedai dibo.”
13Titia Joshua pora Jephunneh laga putro Caleb ke asirbad dise, aru tar ke Hebron tar uttoradhikar hisab te dise. 14Etiya aji laga din tak Hebron to Kenaz jati laga Jephunneh laga putro Caleb laga uttoradhikar hoise, kilemane tai pura mon pora amar Pitri, Israel laga Isor laga piche korise. 15Age te Hebron laga nam Kiriath-arba thakise, kilemane Arba to Anak jati majot te sob pora dangor manuh thakise. Titia mati to lorai pora aram paise.