Kudikutumuna kwa Pholu mu ndinga ya Bayuta
Watelama ha sikadiye, Pholu wázimika mulumba-lumba mu kuzonza ndinga ya Bayuta amana wásamuna nsamu wandi meni: Mufwadisi wuna wátsasukila ha malu ma Ngamaliyeli, nyokudi, wuna wákituka phofu muna nzila. Bawu bayuka tii yi kuna wázimbula ni bámutuma kwena Baphani. Tangwa bámuzinga ndangu bambeta, wázimbula ni yandi wábutwa mwisi Loma.
22 1«Baphangi yi batata, yukenu bwabu dikutumuna dyama ku thwala yenu.» 2Muna kuyuka kwa bawu yandi kazonza mu ndinga ya Bayuta, bádibata hika lawu. Amana wázimbudi:
3«Meni yenina Muyuta, yíbutukila ku Talasi dya kinzunga kya Sidisi, yákudila mu mbanza yayi, yátsasukila ha malu ma Ngamaliyeli muna mutsiku wa ngolu wa batata betu, yákala yi zangi kikuma kya Nzambi hanga benu boosu buna lwenina bwabu.
4Yínyokuna nzila yayi tii yi ku lufwa, mu kukasa amana mu kukotisa mu boloku bayakala yi bakhetu, 5hanga buna mbuta wa banganga Nzambi yi lukutakanu lwosu lwa bambuta balenda telama kimbangi. Kwena bawu yítambula mikanda kwena baphangi ba ku Tamasi, amana yenda mu kunata babana ba kwakuna bu batu ba boloku ku Yelusalemi ndangu bafutisa ndola.»
6«Muna kudyata kwama, buna yábwesuka yi Tamasi, mu tangwa dya tsinzi, mu mbala mosi mutsyenzya wa wambuta wákenzula hosu hana yíkala meni, wátuka ku zilu.»
7Yíbwa ha tsi amana yíyuka ndinga yimosi yázimbula kwena meni: «Sawulu, Sawulu, kikuma kya biki wisi ndyokwanina?»
8Yivutula: «Nati wenina ngeyi, Pfumu?» Yandi wumvutwadi: «Meni, yenina Yesu wa Nazaleti, wuna wubati nyokuna ngeyi.»
9«Batu bana bákala yi meni bámona mutsyenzya kaasi bábakudikiku ndinga ya wuna wakala nzimbwala kwena meni.»
10Yízimbula: «Biki yifwani hanga, Pfumu?» Pfumu wumvutwadi: «Telama amana ndawenda mu Tamasi. Kwakuna bakúzimbwala mana moosu wásolama mu hanga.»
11«Mukuma mutsyenzya wa wambuta dina wámfidinga mesu, banduku bama bámbaka ku koku amana bánata ku Tamasi.»
12«Mutu mosi, khumbu yandi Ananiya, wakwikama mu mutsiku, wuna Bayuta boosu bana bázinga kwakuna bakala muzonzila mboti, 13wísa amana wátelama bela-bela yi meni, amana wázimbudi: “Phangi Sawulu, mona hika.” Muna tangwa dina kaka yíthuta mesu ku zilu amana yimumoni.»
14«Yandi wázimbula: “Nzambi wa batata betu wákusola hanga wazaya luzolu lwandi, amana wamona Mutu wa Masonga, amana wayuka ndinga yitukidila mu munwa wandi; a a v14 «Mutu wa Masonga» yenina yimosi mu zikhumbu za Yesu mu Luwawanu lwa pha — Yandi wuna wakonda masumu, wuna Pholu kámona mu nzila ya Tamasi. 15mukuma ngeyi kakála kimbangi kyandi kwena batu boosu kikuma kya mana wámona amana wáyuka. 16Amana bwabu, kikuma kya biki wisi hingila? Telama, botama, sukula masumu maku, amana bokila khumbu yandi.”»
17«Muna kuvutuka kwama ku Yelusalemi amana buna yíkala mu kulombila mu nzu ya Nzambi, yíbwa mu mbona mesu,»
18amana yímona yandi wazimbula kwena meni: «Katuka tswatsu ku Yelusalemi, mukuma babakatambulaku kimbangi kyaku kikuma kyama.»
19Yízimbula: «Pfumu, bawu-meni bazaya ni meni yáluta mu nzu za kimvuka zoosu za Bayuta mu kukotisa mu boloku amana mu kubeta babana bákwikila mu ngeyi. 20Muna tangwa dina menga ma Kitsyeni, kimbangi kyaku, makala tyakana, meni-meni yátelama bela-bela, yátambwasama amana yákenga mizaka mya babana bana bakala muhonda yandi.»
21Amana yandi wázimbula kwena meni: «Ndawenda, mukuma meni kahítika ngeyi kwa thama kwena bisi makanda.»
22Báyuka ndinga yandi tii yi homa meni dina, kunima báthuta ndinga za bawu amana bákalunga: «Katula mutu wa phila yayi ha tsi! Kafwaniku kala yi muswa wa kuzinga!»
23Amana buna bakala kalunga amana kulosa mizaka mya bawu amana kumwanga fusyangeni ku zilu, 24pfumu wa baphumbulu funda ba Loma wásenda ni bamunata ku kaa dya baphumbulu amana bamubeta fimbu, ndangu kazaya kikuma kya biki bakala mukalungila bwabu.
25Buna bámuyuna kikuma kya kumubeta misinga, Pholu wázimbula kwena satudiyoni wuna wakala telama hana: «Keti mu mutsiku kwena ngeyi mu kubeta fimbu mwisi mbedi ya Loma, wuna kafundibwaku ndola?»
26Buna káyuka bwabuna, satudiyoni wénda kwena pfumu wa baphumbulu mu kumumenikila dyambu: «Biki wubati zola hanga? Mutu yandu mwisi mbedi ya Loma kenina.»
27Buna pfumu wa baphumbulu wísa amana wámuhyula: «Nzimbwala, keti ngeyi mwisi mbedi ya Loma wenina?» Yandi wávutula: «Inga.»
28Pfumu wa baphumbulu wázimbula: «Meni yáfuta mbongu za lawu kikuma kya kukituka mwisi mbedi ya Loma.» Kaasi Pholu wázimbula: «Meni, mwisi mbedi yenina mu butuka dyama.»
29Buna babana bana bakala zola kumupfundisa bávayika mbala mosi; pfumu wa baphumbulu wáyuka bweya, buna kábakula ni mwisi mbedi ya Loma kakasa. 30Kilumbu kyálanda, kikuma kya kuzola kuzaya kyedika kya biki Bayuta bakala mufundila, pfumu wa baphumbulu wámulubula Pholu, amana wásenda bambuta ba banganga Nzambi yi lukutakanu lwosu ni bakutakana, amana wámukulumuna Pholu, wámutula ku thwala ya bawu.
