Otsak 22

22 ¹"Ivānaobing kala avāngarā, ara nathumwui mangāli iwui ngahānkakā chi nganālu." ²Ana athumli Hebrew tuili ngazek chi athumna shālaga, athum ngaveng va̱rimeihaowa. Chieina ana hānga:

³"I Ciliciawui Tarsusli kapharā Jihudinao akhana, keinung hili karār, ithumwui avāngarāwui ain chi khamayona Gamalielwui pheizingli tamchitheisera, aja nathum saikorawui thāda Vareli sāngaikasā mina.

⁴Shongfa hili ina kathi eina tangda rekhareksai, mayarnaobing kala sha̱naobing khanini chi khalapta phātopli narhaida, ⁵pāngmon kharei kala khararnao saikorawui kazip china iwui vang shākhi mishaprali. Athumwui eina ina Damascusli khalei ivānaobingli chithibing samphanga, kala chili khalei mibingli phātop kazang thāda tandi khami samphang khavai Jerusalemli khuivā khavai vai."

⁶"Ina zatmamānda Damascusli vāshungnanai, pung katharuka atamli, kazingramwui eina kahor haklak akhana kashuirak eina kuimareida ili kaprorra."

⁷Ina ngaleili saosanghaowa, kala ili kaho akhon akha "Saul, Saul, khiwui vang eina nana ili rekharekhaokhala?" da shai.

⁸Ina "Na khipākhala, Proho?" da ngahāna. Ana ngahānkai, "Nana rekharekta khalei Nazarethwui Jishu chi ina."

⁹"Ili ngasotnaobing chi kahor chiya theihaida, ili ngazekta khalei chiwui akhon chi bhap matārarmana."

¹⁰Ina "Khi sāra, Proho?" da hānga. Prohona ngahānkai, "Khangatar Damascusli vālu. Chili nana sākhavai kapangkahai saikora chi nali hāngra."

¹¹"Kahor chiwui kahān china imik latshokmihaowa, chiwui vang eina iwui ngasotnaobingna ipāng khuida Damascusli thānmi."

¹²"Ananias kaho mayarnao akha, ainwui pongli shitkasang khangazipa, chili khalei Jihudi saikorana kaphā matuimikapa, ¹³iwui ngalemli rānganingda 'Ichinā Saul, namik theiluishit' da hānga. Chi angarit atamli ina yangkakā tharan ali theihaira."

¹⁴"Ana hānga, 'Ithumwui avāngarāwui Varena nali awui kaphaning theikhavai, Khamashungapā theikhavai, kala awui khamorwui eina akhon shākhavai kapangkhui; ^a a v14 "Khamashunga a" chiya Kadhara Tuingashitli Jishuwui amingbing akha china — morei makhalei a, Paulna Damascuswui shongfali khangazek chi. ¹⁵kaja nana kathei kala kashā chi mi kachiva̱li awui shākhi mira. ¹⁶Ara, khisāda hondalei? Khangatar, ra̱hiklu, awui ming eina angakaoda namorei saikora tharlu."

¹⁷"Ina Jerusalemli latungda khorumshimli seihā sāda leilakha, ili pingairisihaowa,"

¹⁸kala ana ili, "Thākmeilu, kala arui Jerusalemwui eina thuilu, kaja athumna iwui vang eina nawui shākhi chi makhuisangmara" da hānga chi ina thei.

¹⁹Ina hānga, "Proho, ina synagogue akha eina akhali vāda, nali shitkasangbingli phātopli sangda kala ngaphitkahaina kaji athum khalattana thei. ²⁰Nawui shākhi Stephenwui ashee shokkhangasak tharan, ina chili mayāda ali shaothat kasābingwui kachon mayonda ngalemli nganingsai.'"

²¹"Chieina ana ili hānga, 'Vālu, kaja ina nali katāva̱ Gentilebingwui pāngli kashirātna.'"

²²Chi eina tangda athumna nganai, kala chiwui thili akhon panglāk eina vaoda hānga, "Hikathā mipā hili okathuiwui eina katatserlu! A maringpaimara!"

²³Kala athum vaomamānlakha, athumwui kachon raitāda kala chifa masili horkazamda, ²⁴khisāda athumna ali chithāda vaokhala kaji theikhui khavai shipai akhavā china ali shipaipamli khuivāda lijei eina ngaphit khavai kasoi.

²⁵Athumna ali lāngkonwui vang katingshok tharan, Paulna ngalemli nganing shipai shākhawui akhavā chili hānga, "Yonngasak makhalei Romewui ruichumnao akhali lijei eina ngaphit khavai hi nathumwui ainna mayāla?"

²⁶Chi kashā tharan, shipai shākhawui akhavā china shipai akhavāwuili vāda unghānga, "Na khi sākhavai jihaokhala? Mipa hi Romewui ruichumnaona."

²⁷Chieina shipai akhavā chi rāda ngahāna, "Hāngmilu, na Romewui ruichumnaona?" "Mha," da ana hānga.

²⁸Shipai akhavā china hānga, "Ina hi ruichumnao onkhavai aman kachungkha mihaira." Kha Paulna hānga, "Ina ruichumnao kapharāna."

²⁹Chieina ali khangahān khavai jibing chi arui thuihaowa; shipai akhavā china Romewui ruichumnao akhali khalaphaira da kathei eina ngacheehaowa. ³⁰Akhama kathā, Jihudibingna ali khisāda kaphenkhala kaji khamashunga theikhui khangaiwui vang, shipai akhavā china Paulli chihomihaowa, kala pāngmon akhokabing eina hangva̱nao katonga chi kazipkhuida kasoi, kala Paulli khuitālaga athumwui mangāli kānganing ngasaka.