Paulo yisigura mu giheburayo

Ahagaze ku ngazi z'ikigo c'abasoda, Paulo acecekesha isinzi avuga mu Gihebarayo, maze abatekerereza inkuru yiwe: Umufarisayo yigishijwe na Gamaliyeli, uwahama abizera, yahumwe ari mu nzira. Barumviriza gushika avuze ko yarungitswe ku banyamahanga. Arambitswe ngo akubitwe ibimoko, avuga ko yavutse ari Umuroma.

Igice 22.

“Bavukanyi na ba data, nimwumvirize ubu uko ndiyisigura imbere yanyu.” Bumvise avugana na bo mu giheburayo, barushiriza gucereza. Araheza avuga ati:

“Ndi Umuyuda, navukiye i Taruso mu Kilikiya, ndererwa muri iki gisagara, nigishwa kuri Gamaliyeli amategeko ya ba sogokuruza akurikizwa bimwe bitagira amahengeshanya, nshisikariye Imana nk’uko namwe mwese muri uyu musi muyishisikariye.

Naratoteje iyi Nzira gushika ku rupfu, mfunga kandi mponyereza ku mabohero abagabo n’abagore, nk’uko umuherezi mukuru n’inama yose y’abashingantahe bashobora kubishinga intahe. Ni bo nakuriyeko amakete y’abavukanyi bo i Damasiko, nca ngenda kugira ndonse abari ng’aho mbazane ari imbohe i Yeruzalemu kugira bahanwe.”

“Ngendana negereza i Damasiko nko ku mutaga, giturumbuka umuco mwinshi uvuye mw’ijuru uransayangana impande zose.”

Naragwa hasi, numva ijwi ambwira riti: “Sawuli, Sawuli, ni kuki untoteza?”

Narishuye nti: “Uri nde, Mwami?” Yarishuye ati: “Ni jewe Yesu w’i Nazareti, uwo wewe utoteza.”

“Abari kumwe nanje baribonye uwo muco mugabo ntibatahura ijwi ry’uwariko aravugana nanje.”

Navuze nti: “Nkore iki, Mwami?” Umwami arishura ati: “Haguruka uje i Damasiko. Ng’aho ni ho uzobwirwa vyose wagenewe gukora.”

“Kubera ko ubukayangana bw’uwo muco bwantumye mpuma, abo twari kumwe barampagarika ku kuboko bandongora, nja i Damasiko.”

“Umugabo yitwa Ananiya, umuntu yubaha amategeko, ashimwa n’Abayuda bose baba ng’aho, yaraje arahagarara iruhande yanje, ambwira ati: ‘Sawuli muvukanyi, ubone.’ Ako kanya nyene ndaza mbona ndamuraba.”

“Yavuze ati: ‘Imana ya ba sokuruza yarakugize uwo kumenya ivyo igomba, kubona Umugororotsi, no kwumva ijwi rivuye mu kanwa kiwe; ^a kuko uzoba icabona ciwe imbere y’abantu bose ku vyo wabonye n’ivyo wumvise. None ubu, urindiriye iki? Haguruka, ubatizwe, woze ivyaha vyawe, wambaza izina ryiwe.”

“Nsubiye i Yeruzalemu, nkaba ndiko ndasenga mu rusengero, nararonkejwe iyerekwa,

mbona ambwira ati: ‘Ihute uve i Yeruzalemu ningoga, kuko batazokwemera intahe yawe kuri jewe.’”

Navuze nti: “Mwami, bo nyene barazi ko nagendagenda mu masinagogi mfunga kandi nkubita abakwizera. Igihe amaraso y’icabona cawe Sitefano yasukwa, nari mpagaze ng’aho, nemera ivyo bakora kandi nzigama impuzu z’abariko baramwica.’”

“Hanyuma arambwira ati: ‘Genda, kuko nzokurungika kure mu banyamahanga.’”

Bamwumvirije gushika aho, maze baduza amajwi yabo, basemerera bati: “Kura umuntu nk’uwo mw’isi! Ntabwirizwa kubaho!”

Bakiriko barasemerera, bavana impuzu zabo, bakwiza umukungugu mu kirere, umukuru w’abasirikare ategeka ko yinjizwa mu kigo c’abasirikare agakubitwa inkoni, kugira amenye igituma bariko baramwamirira gutyo.

Bamurambuye ngo bamubohe n’imigozi, Paulo abwira umukuru w’ingabo ijana yari ahagaze ng’aho ati: “Hoba vyemewe n’amategeko ko mukubita inkoni umwenegihugu w’Umuroma atarashinjwa?”

Avyumvise, uwo mukuru w’ingabo ijana aja ku mukuru w’abasirikare, aramubimenyesha ati: “Ugira ukore iki? Uyu muntu ni umwenegihugu w’Umuroma.”

Nuko umukuru w’abasirikare araza aramubaza ati: “Mbwira, uri umwenegihugu w’Umuroma?” Na we ati: “Ego.”

Umukuru w’abasirikare ati: “Jewe naguze ubwo bwenegihugu amahera menshi.” Ariko Paulo ati: “Jewe ndavukana ubwenegihugu.”

Nuko abari bagira bamubaze baca bamuva iruhande ako kanya; umukuru w’abasirikare aratinya, aboneko yari yaboshe umwenegihugu w’Umuroma. Bukeye, ashaka kumenya neza igituma Abayuda bamwagiriza, umukuru w’abasirikare arabohora Paulo, ategeka ko abaherezi bakuru n’inama yose bakoranira hamwe, amanura Paulo, amushira imbere yabo.