ዓወት ውህበት ኣቦኻ እዩ

ኣቦኻ ነዛ ምድሪ ዝህበካ ብፅድቅኻ እዩ ኢልካ ንነብስኻ ኣይትበል። ሙሴ ነቲ ናይ ወርቂ ምራኽ፥ እተን ዝተሰብራ ፅላት፥ እቲ ኣርብዓ መዓልቲ ብገፁ ምድፋእ፥ ንሓደ ኽጠፍእ ዝተዳለወ ህዝብን ንኣሮንን ምምህላልን ይዝክር። ካብታ ዝፈለጥኩኻ መዓልቲ ጀሚርካ ዓመፀኛ ኔርካ።

ምዕራፍ 9።

ስማዕ፥ ኦ እስራኤል፤ ሎሚ ንፈለግ ዮርዳኖስ ክትሰግር ኢኻ፤ ኣቲኻ ድማ ካባኻ ዝዓብዩን ዝሕይሉን ኣህዛብ፥ ክሳዕ ሰማይ ዝተዓረዳ ዓበይቲ ከተማታት ዘለዎም ክትሰጎም ኢኻ። ዓቢይ፥ ነዊሕ ዝቑመቱ ህዝቢ፥ ደቂ ዔናቅ፥ ንስኻ እትፈልጦም፥ “ኣብ ቅድሚ ደቂ ዔናቅ መን ክቃወም ይኽእል?” ኢሉ ዝበሃል ዝሰማዕካዮም እዮም። ሎሚ ፍለጥ፤ ኣቦኻ ባዕሉ ኸም ዝባላዕ ሓዊ ኾይኑ ቐቅድሜኻ ይሰግር ኣሎ። ንሱ ኣብ ቅድሜኻ ኸጥፍኦም ድማ ከግዝኦም እዩ፤ ንስኻውን ከምቲ ኣቦኻ ዝበለካ ቀልጢፍካ ክትሰጎምን ከተጥፍኦምን ኢኻ።

ኣቦኻ ካብ ቅድሜኻ ምስ ሰጎም፥ “ኣቦና ብፅድቀይ ነዛ ምድሪ ኽወርሳ ኣእትዩኒ” ኢልካ ኣብ ልብኻ ኣይትበል፤ ንሱ ብክፍኣት እዞም ኣህዛብ እዚኣቶም ደኣ ኻብ ቅድሜኻ ዝሰጎም ዘሎ እምበር። ንምድሮም ክትወርስ እትኣቱ ዘለኻ፥ ብፅድቅኻ ወይ ብቕንዕና ልብኻ ኣይኮነን፤ ኣቦኻ ብክፍኣት እዞም ኣህዛብ እዚኣቶም ደኣ ካብ ቅድሜኻ ዝሰጎም ዘሎ፥ ነቲ ኣቦኻ ነቦታትካ ንኣብርሃምን ንይስሓቅን ንያእቆብን ዝመሓለሎም ቃል ድማ ምእንቲ ኽፍፅም እምበር። እምበኣር ፍለጥ፤ ኣቦኻ ነዛ ፅብቕቲ ምድሪ እዚኣ ኽትወርሳ ዝህበካ ዘሎ፥ ብፅድቅኻ ኣይኮነን፤ ንስኻ ተሪር ዝኽሳድካ ህዝቢ ኢኻ እሞ።

ንኣቦኦም ዝፈተኑ ህዝቢ

ኣብ በረኻ ንኣቦኻ ኸመይ ኢልካ ኸም ዘቘጣዕካዮ ዘክር፥ ኣይትረስዕ። ካብታ ኻብ ግብፂ ዝወፃእኻላ መዓልቲ ጀሚርካ ኽሳዕ ናብዝ ቦታዙይ ዝበፃሕካ፥ ኣብ ልዕሊ ኣቦኻ ዓመፅካ። ኣብ ኮሬብ ንኣቦኻ ኣቘጣዕካዮ፤ ኣቦኻ ድማ ከጥፍኣካ ኽሳዕ ዝደሊ፥ የመና ተቘጥዓካ። ^a ነተን ፅላት እምኒ፥ እተን ኣቦኻ ምሳኻ ዝኣተዎ ኪዳን ዝሓዛ ፅላት፥ ክቕበል ናብቲ እምባ ምስ ደየብኩ፥ እንጀራ እንተይበላዕኩን ማይ እንተይሰተኹን፥ ኣብቲ እምባ ኣርብዓ መዓልትን ኣርብዓ ለይትን ፀናሕኩ። ኣቦኻ ድማ ነተን ክልተ ፅላት እምኒ፥ ብኣፃብዑ ዝተፅሓፋ፥ ኣብ መዓልቲ እቲ ጉባኤ ኣብቲ እምባ ካብ ማእኸል እቲ ሓዊ ምሳኻ ዝተዛረቦ ዅሉ ቓላት ዝሓዛ፥ ሃበኒ። ድሕሪ ኣርብዓ መዓልትን ኣርብዓ ለይትን ከዓ፥ ኣቦኻ ነተን ክልተ ፅላት እምኒ፥ ፅላት እቲ ኪዳን፥ ሃበኒ።

ኣቦኻ ድማ ከምዙይ በለኒ፦ “ተስኢ፥ ኻብዙይ ቀልጢፍካ ውረድ፤ እቲ ኻብ ግብፂ ዘውፃእኻዮ ህዝብኻ ባዕሉ ኣበላሸወ እሞ። ካብቲ ዝኣዘዝክዎም መንገዲ ቀልጢፎም ኣግሊሶም፤ ቅሉብ ምስሊ ገይሮም።”

ኣቦኻ ድማ መሊሱ ኸምዙይ በለኒ፦ “ነዝ ህዝቢ እዙይ ርእየዮ ኣለኹ፤ እንሆ፥ ክሳዱ ዝተረረ ህዝቢ እዩ። ሕደገኒ፤ ከጥፍኦም፥ ስሞም ድማ ካብ ትሕቲ ሰማይ ክድምስስ፥ ንኣኻ ኸዓ ካባታቶም ዝሕይሉን ዝበዝሑን ህዝቢ ክገብረካ እየ።”

ተመሊሰ ድማ ካብቲ እምባ ወረድኩ፤ እቲ እምባውን ብሓዊ ይነድድ ነበረ፤ እተን ክልተ ፅላት ኪዳን ከዓ ኣብ ክልተ ኣእዳወይ ነበራ። እንተ ጠመትኩ ኸዓ፥ ኣብ ኣቦኻ ኸም ዝበደልካ ረአኹ፤ ቅሉብ ምራኽ ጌርካ ነይርካ፤ ካብቲ ኣቦኻ ዝኣዘዘካ መንገዲ ቀልጢፍካ ኣግሊስካ ነይርካ። ሽዑ ነተን ክልተ ፅላት ሒዘ፥ ካብ ክልተ ኣእዳወይ ደርቢየ፥ ኣብ ቅድሚ ዓይንኻ ሰባበርክወን። ከምቲ ቐደም ዝገበርክዎ ድማ፥ ስለ እቲ ኣብ ቅድሚ ዓይኒ ኣቦኻ ኽፉእ ብምግባር ዘቘጣዕካዮ፥ ዝበደልካዮ ዅሉ ሓጢኣትካ፥ ኣርብዓ መዓልትን ኣርብዓ ለይትን፥ እንጀራ እንተይበላዕኩን ማይ እንተይሰተኹን፥ ኣብ ቅድሚ ኣቦኻ ተደፋእኹ። ኣቦኻ ከጥፍኣካ ተዳልዩ ኣብ ልዕሌኻ ዝሓዞ ቍጥዓን ነዳዲ ዅራን ፈሪሐ ነይረ እሞ። ኣቦኻ ግና ሽዑውን ሰምዐኒ። ኣቦኻ ኣብ ኣሮን የመና ተቘጥዐ፥ ከጥፍኦ ኸዓ ተዳለወ፤ ሽዑ ምእንቲ ኣሮን ድማ ፀለኹ። ነቲ ሓጢኣትካ፥ እቲ ዝገበርካዮ ምራኽ፥ ወሲደ ብሓዊ ኣቃፀልክዎ፤ ጨፍሊቐ ኸዓ ከም ሓመድ ክሳዕ ዝደቅቕ ኣፀቢቐ ፈጨሕክዎ፤ ነቲ ሓሙዅሽቱ ድማ ናብቲ ካብ እምባ ዝወርድ ወሓዚ ደርቢየዮ። ኣብ ተቤራ፥ ኣብ ማሳ፥ ኣብ መቓብር ህርፋን ድማ ንኣቦኻ ኣቘጣዕካዮ። ኣቦኻ ካብ ቃዴስ በርኔ ክሰደካ እንተሎ፥ “ደይብ፥ ነታ ዝሃብኩኻ ምድሪ ውረሳ” ኢሉ በለካ፤ ንስኻ ግና ኣብ ልዕሊ ትእዛዝ ኣቦኻ ዓመፅካ፤ ኣይኣመንካዮን፥ ቃሉውን ኣይሰማዕካዮን። ካብታ ዝፈለጥኩኻ መዓልቲ ጀሚርካ፥ ኣብ ልዕሊ ኣቦኻ ዓማፂ ኴንካ ኢኻ። ስለዙይ ኣቦኻ ኸጥፍኣካ ኢሉ ስለ ዝበለ፥ በተን ኣብኡ ዝተደፋእኩለን ኣርብዓ መዓልትን ኣርብዓ ለይትን፥ ኣብ ቅድሚ ኣቦኻ ተደፋእኹ። ናብ ኣቦኻ ድማ ፀለኹ፦ “ኦ ጐይታይ ኣቦ፥ ነቲ ብዕቤትካ ዝበጀኽካዮ፥ ብሓያል ኢድ ድማ ካብ ግብፂ ዘውፃእኻዮ ህዝብኻ፥ ርስትኻ፥ ኣይተጥፍኣዮ። ^b ነቶም ባሮትካ፥ ንኣብርሃምን ንይስሓቅን ንያእቆብን ዘክር። ናብ ትሪ ክሳድ እዝ ህዝቢ እዙይ፥ ናብ ክፍኣቶምን ናብ ሓጢኣቶምን ኣይትጠምት። እንተ ዘይኮነ፥ እቶም ካብኣ ዘውፃእካና ምድሪ ህዝቢ፥ ‘እግዚኣብሄር ናብታ ዝተስፈዎም ምድሪ ኼእትዎም ስለ ዘይከኣለ፥ ፀሊእዎም ድማ፥ ኣብ በረኻ ኽቐትሎም ኣውፂእዎም’ ክብሉ እዮም። ንሳቶም ብዓብዪ ሓይልኻን ብዝርጉሕ ቅልፅምካን ዘውፃእኻዮም፥ ህዝብኻን ርስትኻን እዮም እሞ።”