ዝቕልበካ ኣቦኻ ዘክር

እተን ኣርብዓ ዓመታት ጥሜትን መናን ንምምሃር ነበራ፦ ሰብ ብእንጀራ ጥራሕ ኣይነብርን። ከምቲ ሰብ ንወዱ ዝቐፅዕ፥ ኣቦኻ ኸዓ ይቐፅዓካ። እቲ ሓቀኛ ሓደጋ እታ ፅብቕቲ ምድሪ እያ፦ ዝፀገበ ኸብዲ፥ ዝዓቢ መጓሰ፥ ኢደይ ባዕላ ነዙይ ዝገበረቶ ዝብል ልቢ።

ምዕራፍ 8።

ነቲ ኣነ ሎሚ ዝእዝዘካ ዘለኹ ኵሉ ትእዛዝ፥ ምእንቲ ብህይወት ክትነብር፥ ክትበዝሕ፥ ኣቲኻ ድማ ነታ ኣቦና ንኣቦታትካ ዝመሓለሎም ምድሪ ክትወርሳ፥ ተጠንቂቕካ ሓልዎ። ነቲ ኣቦኻ ኣብዘን ኣርብዓ ዓመታት ኣብ ምድረ በዳ ዝመርሓካ ኵሉ መንገዲ ዘክር፤ እዙይ ድማ ከዋርደካን ክፍትነካን፥ ትእዛዛቱ ትሕሉ ወይ ዘይትሕሉ ምዃንካ፥ ኣብ ልብኻ ዘሎ ንምፍላጥ እዩ። ኣዋረደካ፤ ኣጥምዩ ድማ ነቲ ንስኻን ኣቦታትካን ዘይትፈልጥዎ መና ኣብልዐካ፤ ሰብ ብእንጀራ ጥራሕ ዘይኮነስ፥ ካብ ኣፍ ኣቦና ብዝወፅእ ኵሉ ቃል ደኣ ኸም ዝነብር ምእንቲ ኽምህረካ እዩ። ኣብዘን ኣርብዓ ዓመታት ክዳንካ ኣይበለየን፤ ኣእጋርካ ድማ ኣይነፍሐን። ከምቲ ሰብ ንወዱ ዝቐፅዕ፥ ኣቦኻ ኸዓ ኸም ዝቐፅዓካ፥ ኣብ ልብኻ ፍለጥ። ስለዙይ ብመንገዱ እናኸድካን ንእኡ እናፈራሕካን፥ ትእዛዛት ኣቦኻ ሓልዎ። ኣቦኻ ናብ ፅብቕቲ ምድሪ ከእትወካ እዩ እሞ፤ ንሳ ድማ ኣብ ለሰን ኰረብታን ዝውሕዝ ወሓዝቲ ማያትን ዓይኒ ማያትን ዓሚቝ ማያትን ዘለዋ ምድሪ እያ፤ እታ ስርናይን ስገምን እተብቍል፥ ወይንን በለስን ሮማንን ዝርከበላ ምድሪ፥ ዘይቲ ኣውሊዕን መዓርን ዘለዋ ምድሪ እያ። ኣብኣ እንጀራ ብዘይ ሕፅረት እትበልዓ፥ ዝጐድለካ ዘይብልካ ምድሪ፤ ኣእማና ሓፂን ዝኾነ፥ ካብ ኰረብታታት ድማ ነሃስ እትኵዕተላ ምድሪ እያ። በሊዕኻ ምስ ፀገብካ ድማ፥ ስለ እታ ዝሃበካ ፅብቕቲ ምድሪ ንኣቦኻ ባርኾ።

ነቲ ኣነ ሎሚ ዝእዝዘካ ዘለኹ ትእዛዛቱን ፍርድታቱን ሕግጋቱን ብዘይ ምሕላው፥ ንኣቦኻ ኸይትርስዖ ተጠንቀቕ፤ በሊዕኻ ምስ ፀገብካ፥ ፅቡቓት ኣባይቲ ሰሪሕካ ኣብኡ ምስ ተቐመጥካ፥ ኣባጊዕኻን ከፍትኻን ምስ በዝሑ፥ ብሩርካን ወርቅኻን ምስ በዝሐ፥ ዘለካ ዅሉ ድማ ምስ በዝሐ፥ ሽዑ ልብኻ ይዕቢ እሞ፥ ነቲ ኻብ ምድሪ ግብፂ፥ ካብ ቤት ባርነት ዘውፅአካ ኣቦኻ ትርስዖ፤ ነታ መርዛም ኣትማንን ዕንቅርቢትን ዝመልአት፥ ድርቂ ዘለዋ ማይ ዘይብላ፥ ዓባይን መፍርሕትን ምድረ በዳ ዝመርሓካ፥ ካብ ተሪር ከውሒ ማይ ዘውፅአልካ፤ ነቲ ኣቦታትካ ዘይፈለጥዎ መና ኣብ ምድረ በዳ ዝቐለበካ፥ ከዋርደካን ክፍትነካን፥ ኣብ መወዳእታ ድማ ሰናይ ክገብረልካ፤ ኣብ ልብኻ፥ “ሓይለይን ጕልበት ኢደይን ነዝ ሃብቲ እዙይ ኣጥረዩለይ” ከይትብል ተጠንቀቕ። ኣቦኻ ዘክር፤ ንሱ ነቲ ንኣቦታትካ ዝመሓለሎም ኪዳኑ ምእንቲ ከቕውም፥ ከምቲ ሎሚ ዘሎ፥ ሃብቲ ንምጥራይ ሓይሊ ዝህበካ ንሱ እዩ እሞ።

ንኣቦኻ ረሲዕካ ንኻልኦት ኣማልኽቲ ሰዒብካ፥ እንተ ኣገልጊልካዮምን እንተ ሰጊድካሎምን ግና፥ ብርግፅ ከም እትጠፍእ ሎሚ እምስክረልካ ኣለኹ። ከምቶም ኣቦና ኣብ ቅድሜኻ ዘጥፍኦም ኣህዛብ፥ ድምፂ ኣቦኻ ስለ ዘይሰማዕኻ፥ ንስኻውን ከምኡ ክትጠፍእ ኢኻ።