Nathumli Ngarānkame Nathumwui Avāli Phaningunglu
Kum hangmati ok ngaphutkhami kala manna chiya tamchithei khavaina: mibing khamui māng eina okmathuimana. Mi akhana awui naomayarali hāngmachin thāda, nawui Avāna nali hāngmachina. Kharāmashang kachangkhat chiya ngalei kapha chivangna — ok phā, sha̱kei ngaponmei, kala iwui pāng khalatta eina hi sākhui da khahānga wuklung.
8 1Aja ina nathumli kagaso khami ningkhami kachiva̱ chi ning ngasharda mayonlu, chithākha nathum ringra, mataisangra, kala ithumwui Avāna navā ngarāli ngashitmi kahai ngalei chi zangda shimlui khuipaira. 2Nathumwui Avāna zingkum hangmati hi lamhāngli nathumli thānmi kahai shongfa saikora chi phaningunglu; nathumli maishi ngasakta kala chāng tamda, awui ningkhami mayonra lah mayonmana, naningli khikha leikhala theikhavaina. 3Ana nathumli maishi ngasaka, nathumli thaingasakta, chieina nathumnala navā ngarānala matheila kahai manna nathumli mizai; mikumo hi kashakazā amāng eina maringla, kha ithumwui Avāwui khamorwui eina rāshok tui kachiva̱ eina ringa da nathumli tamchitheikhavaina. 4Zingkum hangmati hi nathumwui kashankachonla makākmana, nathumwui pheila khawor mavaimana. 5Chithākha mi akhana awui naomayarali hāngmachin thāda, nathumwui Avāna nathumli hāngmachin kaji naningli theilu. 6Chieina awui shongfali zatta kala ali ngacheeda, nathumwui Avāwui ningkhami mayonlu. 7Kaja nathumwui Avāna nathumli kaphā ngalei akhali khuivāra; chi tampāk kala kaphung ngachaili longkashoka kong, ura̱, kala kathuk tara̱ leikahai ngalei akhana, 8kehu kala nāpai, drakhārong, khaorāthei, kala kabothei leikahai ngalei akhana; olive thao kala khuira̱ leikahai ngalei akhana. 9Chām maleila, khikhanida mavaila kashakazā zāpaira ngalei akhana; mari lunggui leikahai ngalei akhana, chiwui kaphungbingli nathumna pithrai chuikhuipaira. 10Nathumna zāda thotinghai tharan, ana nathumli mishai kaphā ngalei chiwui vang nathumwui Avāli sot chigatra.
11Ning ngasharlu, aja ina nathumli kagaso khami awui ningkhami, sharphahor, kala shiyan-chikan chi mamayonla nathumwui Avāli malaihaipaishina, 12Kaja nathumna zāda thotinghai tharan, kala kaphā shimbing sāda chiwuili ngasopam tharan, 13kala nathumwui sei kala yaobing mataisang tharan, nathumwui lupā kala sinā mataisang tharan, kala nathumwui khalei saikora mataisang tharan, 14naning lāngsoda, Egypt ngaleiwui eina, narkahai shimwui eina nathumli thānshokkhame nathumwui Avāli nathumna malaihaipaishina, 15khamashā kala khangachee, meiwon phara̱ kala seithat leikahai, kazing kakāng kala tara̱ maleilui lamhāng chili nathumli thānkhame, meizailung lunghār eina nathumli tara̱ shokkhamikame, 16lamhāngli, navā ngarāna matheila kahai manna nathumli phauikame, nathumli maishi ngasakta kala chāng tamda, kala khanaoli nathumli kaphā sākhavaina. 17Ning ngasharlu; naningli, "Iwui pangshap kala iwui pāngwui yāngna lan hi iwui vang sākahaina," da mahānglu. 18Nathumwui Avāli phaningunglu, kaja aja khalei thāda, navā ngarāli ngashit kahai awui tuingashit chi ungshung khavai ana nathumli lan samphang khavai pangshap khamina.
19Kha kalikhada nathumna nathumwui Avāli malaihaida, khangatei varebingli ngareithuida, athumli otram ngatha̱da khorumakha, aja ina nathumli makhamayā shākhi sāhaira: kachangkhat eina nathum shimānhaora. 20Nathumna nathumwui Avāwui akhon makhanganāwui vang, ithumwui Avāna nathumwui mangāli sāshimānmi yurbing thāda nathumlila shimānhaora.
