Deuteronomio 8

8 ¹Tumana pag-ayo ang matag sugo nga ihatag ko kaninyo karong adlawa, aron kamo mabuhi, modaghan, makasulod, ug makapanag-iya sa yuta nga gipanumpa sa atong Amahan ngadto sa inyong mga katigulangan. ²Hinumdomi ang tibuok nga dalan diin gigiyahan kamo sa inyong Amahan sulod niining kap-atan ka tuig didto sa kamingawan, aron kamo ipaubos ug sulayan, aron mahibaloan kon unsa ang anaa sa inyong kasingkasing—kon tumanon ba ninyo ang iyang mga sugo o dili. ³Gipaubos niya kamo, gipagutom, unya gipakaon sa mana nga wala ninyo mailhi ni sa inyong mga katigulangan, aron sa pagtudlo kaninyo nga ang tawo dili mabuhi sa tinapay lamang, kondili sa matag pulong nga nagagikan sa baba sa atong Amahan. ⁴Ang inyong bisti wala magisi diha kaninyo, ug ang inyong mga tiil wala manghupong, sulod niining kap-atan ka tuig. ⁵Busa hibaloi diha sa inyong kasingkasing nga, maingon nga ang usa ka tawo nagadisiplina sa iyang anak, mao usab ang inyong Amahan nga nagadisiplina kaninyo. ⁶Busa tumana ang mga sugo sa inyong Amahan, nga nagalakaw sa iyang mga dalan ug nagakahadlok kaniya. ⁷Kay ang inyong Amahan nagadala kaninyo ngadto sa usa ka maayong yuta—usa ka yuta sa mga sapa, mga tuboran, ug lalom nga mga tubig nga nagaagos latas sa mga walog ug mga bungtod, ⁸usa ka yuta sa trigo ug sebada, mga paras, mga igos, ug mga granada; usa ka yuta sa lana sa olibo ug dugos. ⁹Usa ka yuta diin mokaon kamo sa tinapay nga walay kakulang, nga dili makulangan sa bisan unsa—usa ka yuta nga ang mga bato puno sa puthaw, nga sa iyang mga bungtod magakalot kamo ug tumbaga. ¹⁰Kon makakaon na kamo ug mabusog, dayegon ninyo ang inyong Amahan tungod sa maayong yuta nga iyang gihatag kaninyo.

¹¹Pagbantay nga dili ninyo malimtan ang inyong Amahan, nga dili tumanon ang iyang mga sugo, mga lagda, ug mga tulumanon nga gisugo ko kaninyo karong adlawa, ¹²kay kon makakaon na kamo ug mabusog, ug makatukod ug maanindot nga mga balay ug mopuyo niini, ¹³ug modaghan ang inyong mga panon sa baka ug karnero, modaghan ang inyong plata ug bulawan, ug modaghan ang tanan ninyong gipanag-iya, ¹⁴unya mapagarbohon ang inyong kasingkasing, ug malimtan ninyo ang inyong Amahan, nga nagkuha kaninyo gikan sa yuta sa Ehipto, gikan sa balay sa pagkaulipon, ¹⁵nga nagtultol kaninyo latas niadtong halapad ug makalilisang nga kamingawan sa malala nga mga bitin ug mga tanga, sa kauhaw ug walay tubig, nga nagpatubod ug tubig alang kaninyo gikan sa bato nga santik, ¹⁶nga nagpakaon kaninyo sa mana didto sa kamingawan, nga wala mailhi sa inyong mga katigulangan, aron kamo ipaubos ug sulayan, ug sa kataposan buhatan kamo ug maayo. ¹⁷Pagbantay—ayaw kamo pag-ingon diha sa inyong kasingkasing, “Ang akong gahom, ang kusog sa akong kamot, maoy naghatag kanako niini nga bahandi.” ¹⁸Hinumdomi ang inyong Amahan, kay siya mao ang nagahatag kaninyo ug gahom sa pagbaton ug bahandi, aron matuman ang iyang kasabotan nga iyang gipanumpa ngadto sa inyong mga katigulangan, maingon karong adlawa.

¹⁹Apan kon malimtan gayod ninyo ang inyong Amahan, ug mosunod sa laing mga dios, mag-alagad ug magyukbo kanila, nagapamatuod ako batok kaninyo karong adlawa: mangalaglag gayod kamo. ²⁰Sama sa mga nasod nga gilaglag sa atong Amahan sa inyong atubangan, mangalaglag usab kamo, tungod kay wala ninyo tumana ang tingog sa inyong Amahan.