ତୁମ୍ଭର ପ୍ରତିପାଳନକାରୀ ପିତାଙ୍କୁ ସ୍ମରଣ କର

ଚାଳିଶ ବର୍ଷର ଭୋକ ଓ ମାନ୍ନା ଏକ ଶିକ୍ଷା ଥିଲା: ମନୁଷ୍ୟ କେବଳ ରୋଟୀରେ ବଞ୍ଚେ ନାହିଁ। ଯେପରି ମନୁଷ୍ୟ ତାହାର ପୁତ୍ରକୁ ଶାସନ କରେ, ସେପରି ତୁମ୍ଭର ପିତା ତୁମ୍ଭକୁ ଶାସନ କରନ୍ତି। ପ୍ରକୃତ ବିପଦ ହେଉଛି ଉତ୍ତମ ଦେଶ — ପୂର୍ଣ୍ଣ ପେଟ, ବଢ଼ୁଥିବା ପଶୁପଲ, ଏବଂ ଏକ ହୃଦୟ ଯାହା କହେ, ମୋର ନିଜ ହାତ ଏହା କରିଅଛି।

ଅଧ୍ୟାୟ 8।

ମୁଁ ଆଜି ତୁମ୍ଭକୁ ଯେଉଁ ସମସ୍ତ ଆଜ୍ଞା ଦେଉଅଛି, ତାହା ଯତ୍ନପୂର୍ବକ ପାଳନ କର, ଯେପରି ତୁମ୍ଭେ ବଞ୍ଚିବ, ବୃଦ୍ଧି ପାଇବ, ପ୍ରବେଶ କରିବ, ପୁଣି ଆମ୍ଭମାନଙ୍କ ପିତା ତୁମ୍ଭ ପିତୃପୁରୁଷମାନଙ୍କ ନିକଟରେ ଯେଉଁ ଦେଶ ବିଷୟରେ ଶପଥ କରିଥିଲେ, ତାହା ଅଧିକାର କରିବ। ତୁମ୍ଭ ପିତା ଏହି ଚାଳିଶ ବର୍ଷ ପ୍ରାନ୍ତରରେ ତୁମ୍ଭକୁ ଯେଉଁ ସମସ୍ତ ପଥ ଦେଇ କଢ଼ାଇ ନେଲେ, ତାହା ସ୍ମରଣ କର; ସେ ତୁମ୍ଭକୁ ନମ୍ର କରିବା ଓ ପରୀକ୍ଷା କରିବା ନିମନ୍ତେ, ପୁଣି ତୁମ୍ଭର ହୃଦୟରେ କଅଣ ଅଛି, ଅର୍ଥାତ୍‍ ତୁମ୍ଭେ ତାହାଙ୍କ ଆଜ୍ଞା ପାଳନ କରିବ କି ନାହିଁ, ତାହା ଜାଣିବା ନିମନ୍ତେ ଏହା କଲେ। ସେ ତୁମ୍ଭକୁ ନମ୍ର କଲେ, କ୍ଷୁଧିତ କଲେ, ପୁଣି ତୁମ୍ଭେ ଯାହା ଜାଣି ନ ଥିଲ ଓ ତୁମ୍ଭ ପିତୃପୁରୁଷମାନେ ଯାହା ଜାଣି ନ ଥିଲେ, ସେହି ମାନ୍ନା ତୁମ୍ଭକୁ ଭୋଜନ କରାଇଲେ; ଯେପରି ମନୁଷ୍ୟ କେବଳ ରୁଟିରେ ବଞ୍ଚେ ନାହିଁ, ମାତ୍ର ଆମ୍ଭମାନଙ୍କ ପିତାଙ୍କ ମୁଖନିର୍ଗତ ପ୍ରତ୍ୟେକ ବାକ୍ୟରେ ବଞ୍ଚେ, ଏହା ତୁମ୍ଭକୁ ଶିକ୍ଷା ଦେବା ନିମନ୍ତେ ସେ ଏହା କଲେ। ଏହି ଚାଳିଶ ବର୍ଷ ତୁମ୍ଭ ଦେହରେ ତୁମ୍ଭର ବସ୍ତ୍ର ଜୀର୍ଣ୍ଣ ହେଲା ନାହିଁ, କିଅବା ତୁମ୍ଭ ପାଦ ଫୁଲିଲା ନାହିଁ। ଅତଏବ ମନୁଷ୍ୟ ଯେପରି ଆପଣା ପୁତ୍ରକୁ ଶାସନ କରେ, ସେହିପରି ତୁମ୍ଭ ପିତା ତୁମ୍ଭକୁ ଶାସନ କରନ୍ତି ବୋଲି ଆପଣା ହୃଦୟରେ ଜ୍ଞାତ ହୁଅ। ଏଣୁ ତୁମ୍ଭେ ତୁମ୍ଭ ପିତାଙ୍କ ପଥରେ ଚାଲି ଓ ତାହାଙ୍କୁ ଭୟ କରି ତାହାଙ୍କ ଆଜ୍ଞା ପାଳନ କର। କାରଣ ତୁମ୍ଭ ପିତା ତୁମ୍ଭକୁ ଏକ ଉତ୍ତମ ଦେଶକୁ ନେଇ ଯାଉଅଛନ୍ତି—ଏପରି ଦେଶ, ଯେଉଁଠାରେ ଜଳସ୍ରୋତ, ନିର୍ଝର ଓ ଉପତ୍ୟକା ଓ ପର୍ବତ ମଧ୍ୟ ଦେଇ ବହିଯାଉଥିବା ଗଭୀର ଜଳରାଶି ଅଛି, ଯେଉଁ ଦେଶ ଗହମ ଓ ଯବର, ଦ୍ରାକ୍ଷାଲତା, ଡିମ୍ବିରି ଓ ଡାଳିମ୍ବର ଦେଶ; ଯେଉଁ ଦେଶ ଜୀତତୈଳ ଓ ମଧୁର ଦେଶ, ଯେଉଁ ଦେଶରେ ତୁମ୍ଭେ ଅଭାବ ବିନା ରୁଟି ଭୋଜନ କରିବ ଓ କୌଣସି ବିଷୟର ଅଭାବ ଭୋଗିବ ନାହିଁ—ଯେଉଁ ଦେଶର ପ୍ରସ୍ତର ଲୌହମୟ ଓ ଯେଉଁ ଦେଶର ପର୍ବତ ଖୋଳି ତୁମ୍ଭେ ତମ୍ବା ପାଇବ। ତୁମ୍ଭେ ଭୋଜନ କରି ତୃପ୍ତ ହେଲେ, ତୁମ୍ଭ ପିତା ତୁମ୍ଭକୁ ଯେଉଁ ଉତ୍ତମ ଦେଶ ଦେଲେ, ସେଥିପାଇଁ ତୁମ୍ଭେ ତାହାଙ୍କର ଧନ୍ୟବାଦ କରିବ।

ସାବଧାନ ହୁଅ, କେଜାଣି ତୁମ୍ଭେ ତୁମ୍ଭ ପିତାଙ୍କୁ ପାସୋରିବ, ପୁଣି ମୁଁ ଆଜି ତୁମ୍ଭକୁ ଯେଉଁ ଆଜ୍ଞା, ନିୟମ ଓ ବିଧି ଆଦେଶ ଦେଉଅଛି, ତାହା ପାଳନ ନ କରିବ; କେଜାଣି ତୁମ୍ଭେ ଭୋଜନ କରି ତୃପ୍ତ ହେଲେ, ପୁଣି ସୁନ୍ଦର ଗୃହ ନିର୍ମାଣ କରି ତହିଁ ମଧ୍ୟରେ ବାସ କଲେ, ପୁଣି ତୁମ୍ଭର ଗୋରୁ ଓ ମେଷପଲ ବୃଦ୍ଧି ପାଇଲେ, ତୁମ୍ଭର ରୂପା ଓ ସୁନା ବୃଦ୍ଧି ପାଇଲେ, ଆଉ ତୁମ୍ଭର ସର୍ବସ୍ଵ ବୃଦ୍ଧି ପାଇଲେ, ସେତେବେଳେ ତୁମ୍ଭ ହୃଦୟ ଗର୍ବିତ ହେବ, ପୁଣି ମିସର ଦେଶରୁ, ଦାସଗୃହରୁ ତୁମ୍ଭକୁ ବାହାର କରି ଆଣିଥିବା ତୁମ୍ଭ ପିତାଙ୍କୁ ତୁମ୍ଭେ ପାସୋରିବ, ସେହି ବିଷଧର ସର୍ପ ଓ ବିଛାଯୁକ୍ତ, ଅନାବୃଷ୍ଟି ଓ ଜଳହୀନ ବିଶାଳ ଓ ଭୟଙ୍କର ପ୍ରାନ୍ତର ମଧ୍ୟ ଦେଇ ତୁମ୍ଭକୁ କଢ଼ାଇ ନେଇଥିବା ତୁମ୍ଭ ପିତାଙ୍କୁ, ଯେ କଠିନ ଶୈଳରୁ ତୁମ୍ଭ ନିମନ୍ତେ ଜଳ ବାହାର କରିଥିଲେ, ଯେ ତୁମ୍ଭ ପିତୃପୁରୁଷମାନଙ୍କର ଅଜ୍ଞାତ ମାନ୍ନା ପ୍ରାନ୍ତରରେ ତୁମ୍ଭକୁ ଭୋଜନ କରାଇଲେ, ଯେପରି ସେ ତୁମ୍ଭକୁ ନମ୍ର କରିବେ ଓ ପରୀକ୍ଷା କରିବେ, ପୁଣି ଶେଷରେ ତୁମ୍ଭର ମଙ୍ଗଳ କରିବେ। ସାବଧାନ ହୁଅ—ଆପଣା ହୃଦୟରେ ଏହା କୁହ ନାହିଁ, “ମୋହର ପରାକ୍ରମ ଓ ମୋʼ ହସ୍ତର ବଳ ମୋʼ ନିମନ୍ତେ ଏହି ଐଶ୍ଵର୍ଯ୍ୟ ଉପାର୍ଜନ କଲା।” ମାତ୍ର ତୁମ୍ଭ ପିତାଙ୍କୁ ସ୍ମରଣ କର, କାରଣ ତୁମ୍ଭ ପିତୃପୁରୁଷମାନଙ୍କ ନିକଟରେ ଶପଥ କରିଥିବା ଆପଣା ନିୟମ ଅଦ୍ୟାବଧି ସ୍ଥିର କରିବା ନିମନ୍ତେ ସେ ଐଶ୍ଵର୍ଯ୍ୟ ଉପାର୍ଜନ କରିବାର ଶକ୍ତି ତୁମ୍ଭକୁ ଦେଉଅଛନ୍ତି।

କିନ୍ତୁ ଯଦି ତୁମ୍ଭେ କେବେ ହେଁ ତୁମ୍ଭ ପିତାଙ୍କୁ ପାସୋରିବ, ଅନ୍ୟ ଦେବତାମାନଙ୍କ ପଛେ ଯିବ, ସେମାନଙ୍କର ସେବା କରିବ ଓ ସେମାନଙ୍କୁ ପ୍ରଣାମ କରିବ, ତେବେ ମୁଁ ଆଜି ତୁମ୍ଭ ବିରୁଦ୍ଧରେ ସାକ୍ଷ୍ୟ ଦେଉଅଛି: ତୁମ୍ଭେ ନିଶ୍ଚୟ ବିନଷ୍ଟ ହେବ। ଆମ୍ଭମାନଙ୍କ ପିତା ତୁମ୍ଭମାନଙ୍କ ସମ୍ମୁଖରେ ଯେଉଁ ଗୋଷ୍ଠୀୟ ଲୋକମାନଙ୍କୁ ବିନଷ୍ଟ କରନ୍ତି, ସେମାନଙ୍କ ପରି ତୁମ୍ଭେ ମଧ୍ୟ ବିନଷ୍ଟ ହେବ, କାରଣ ତୁମ୍ଭେ ତୁମ୍ଭ ପିତାଙ୍କ ରବରେ କର୍ଣ୍ଣପାତ କଲ ନାହିଁ।