ዘዳግም 8

8 ¹ዛሬ የምሰጥህን ትእዛዝ ሁሉ በጥንቃቄ ጠብቅ፤ ይህም በሕይወት ትኖር ዘንድ፣ ትበዛ ዘንድ፣ ገብተህም አባታችን ለአባቶችህ የማለላቸውን ምድር ትወርስ ዘንድ ነው። ²አባትህ በእነዚህ አርባ ዓመታት በምድረ በዳ የመራህን መንገድ ሁሉ አስብ፤ ያዋረደህና የፈተነህ፣ ትእዛዛቱን ትጠብቅ እንደ ሆነ ወይም እንዳልሆነ በልብህ ያለውን ለማወቅ ነው። ³አዋረደህ፤ አስራበህም፤ ከዚያም አንተም አባቶችህም የማታውቁትን መና መገበህ፤ ይህም ሰው ከአባታችን አፍ በሚወጣው ቃል ሁሉ እንጂ በእንጀራ ብቻ እንደማይኖር ያስተምርህ ዘንድ ነው። ⁴በእነዚህ አርባ ዓመታት ልብስህ አላለቀብህም፤ እግርህም አላበጠም። ⁵እንግዲህ ሰው ልጁን እንደሚገሥጽ አባትህ እንዲሁ እንደሚገሥጽህ በልብህ እወቅ። ⁶ስለዚህ በመንገዱ እየሄድህ እርሱንም እየፈራህ የአባትህን ትእዛዛት ጠብቅ። ⁷አባትህ ወደ መልካም ምድር፣ በሸለቆዎችና በኰረብቶች ውስጥ ወደሚፈስ የወንዝ፣ የምንጭና የጥልቅ ውሃ ምድር ያስገባሃልና፤ ⁸የስንዴና የገብስ፣ የወይን፣ የበለስና የሮማን ምድር፤ የወይራ ዘይትና የማር ምድር ናት፤ ⁹ያለ ዕጦት እንጀራ የምትበላባት፣ ምንም የማይጐድልብህ ምድር፤ ድንጋዮቿ ብረት የሆኑ፣ ከኰረብቶቿም መዳብ የምትቈፍርባት ምድር ናት። ¹⁰በልተህ ከጠገብህ በኋላ ስለ ሰጠህ መልካም ምድር አባትህን ባርክ።

¹¹ዛሬ የማዝህን ትእዛዛቱን፣ ሕጎቹንና ሥርዐቶቹን ባለመጠበቅ አባትህን እንዳትረሳ ተጠንቀቅ፤ ¹²በልተህ ከጠገብህ፣ መልካም ቤቶችንም ሠርተህ በእነርሱ ከተቀመጥህ፣ ¹³ላሞችህና በጎችህ ሲበዙ፣ ብርህና ወርቅህ ሲበዛ፣ ያለህም ሁሉ ሲበዛ፣ ¹⁴ልብህ ይኰራል፤ ከግብፅ ምድር፣ ከባርነት ቤትም ያወጣህን አባትህን ትረሳለህ፤ ¹⁵መርዛማ እባቦችና ጊንጦች ባሉበት፣ ድርቅ ባለበትና ውሃ በሌለበት በዚያ ሰፊና አስፈሪ ምድረ በዳ የመራህ፣ ከጭንጫ ዐለትም ውሃ ያወጣልህ እርሱ ነው፤ ¹⁶በመጨረሻ መልካም ሊያደርግልህ፣ ሊያዋርድህና ሊፈትንህ አባቶችህ ያላወቁትን መና በምድረ በዳ የመገበህ እርሱ ነው። ¹⁷ተጠንቀቅ፤ በልብህ፣ “ኀይሌና የእጄ ብርታት ይህን ሀብት አፈራልኝ” እንዳትል። ¹⁸አባትህን አስብ፤ ዛሬ እንዳለው ለአባቶችህ የማለላቸውን ኪዳን ያጸና ዘንድ ሀብት የማፍራትን ኀይል የሚሰጥህ እርሱ ነውና።

¹⁹አባትህን ብትረሳ ግን፣ ሌሎች አማልክትን ተከትለህ ብታመልካቸውና ብትሰግድላቸው፣ በእርግጥ እንደምትጠፋ ዛሬ እመሰክርብሃለሁ። ²⁰የአባትህን ድምፅ ስላልሰማህ፣ አባታችን ከፊትህ እንደሚያጠፋቸው አሕዛብ አንተም እንዲሁ ትጠፋለህ።