Khalatlui 9

9 ¹Nganālu, O Israel: aja nathumna Jordan kānkāda, zangda nathumli reikhamei kala pangmei yurbingli kashamshokra; athumwui keinung khareibing chi kazingram tāshunga raipan sākahaina. ²Athum mi kachungkha kala juilaka Anakimwui ara̱-azāna; athumli nathumna theihaira, kala athumwui pongli "Anakwui naomayarabingwui mangāli khipāna nganingchingra?" da kashā kahaina. ³Aja theilu: nathumwui Avā china kachuia mei thāda nathumwui mangāli ngava̱kāra. Ana athumli sāshimānra kala nathumwui mangāli hamsang ngasakra; nathumwui Avāna nathumli hāngkahai thāda nathumna athumli kashamshoka ngalāngda katatra.

⁴Nathumwui Avāna nathumwui mangāli athumli kashamshok kahaiwui thili, nathumwui ningli "Iwui khamashung khangarongwui vang eina ithumwui Avāna ili ngalei hi shimlui khavai khuizangkhami" da mahāngalu; kha yurbing hiwui makaphāwui vang eina ana nathumwui mangāli athumli kashamshokra. ⁵Nathumwui khamashung khangarong lah nathumwui ning ningsākhangazipwui vang eina maningla nathumna athumwui ngalei khuizang khavai zangkāna, kha yurbing hiwui makaphāwui vang eina nathumwui Avāna nathumwui mangāli athumli kashamshokra, kala nathumwui Avāna nathumwui avā ngarā Abraham, Isaac, kala Jacob, athumli ngashitmi kahai tui chi ningkhavaina. ⁶Chiwui vang eina theilu: nathumwui Avāna nathumli ngalei khamahai hi shimlui khavai mikahai hina nathumwui khamashung khangarongwui vang eina maningmana; khikhalajila nathum marākkapaiya mimānga.

Athumwui Avāli Chāng Tamkahai Mibing

⁷Phaningunglu, nathumna lamhāngli nathumwui Avāli kathada malungvāt khangasakhaikhala kaji chi malaihaolu. Egyptwui eina nathum zatphok kahaiwui zimiksho eina thuida apam hili nathum kāranglakha eina tangda, nathumna nathumwui Avāli thuingararasai. ⁸Horebli nathumna nathumwui Avāli malungvāt khangasaka, kala nathumwui Avā nathumli malungvātlakhaoda nathumli sāshimānsangki jihaira. ^a a v8 Horeb hi Sinai phungreiwui aming katei akhana, ithumwui Avāna kadhara mikahai phungrei china. ⁹Nathumwui Avāna nathum ni sākahai tuingashitwui lungphek chi khuikhavai ina phungreili kai tharan, kashakazā maphazā kala tara̱ mamangla ngashun hangmati kala ngayā hangmatithang phungrei tungli kāpama. ¹⁰Nathumwui Avāna ili lungphek khani mihaowa; chi awui pāngmareng eina kapikahai, kala yarui kazip zimiksholi ana phungreili meilung eina nathum ni hāngkahai tui saikora chili kapisangmi kahaina. ¹¹Ngashun hangmati kala ngayā hangmatiwui thili, nathumwui Avāna ili lungphek khani, tuingashitwui lungphek chi mihaowa.

¹²Chieina nathumwui Avāna ili hānga, "Ngakarthuilu, hiwui eina kathākmeida tunglu, kaja nana Egyptwui eina khuishok kahai nawui mibing chi akhalattawui asā shaipamhaira. Ina athumli kasoi apong chiwui eina athumna ngalāngda ngalanhaowa; athumna khalattawui vang heikakhui meoma̱ akha heikhuihaowa."

¹³Latluida, nathumwui Avāna ili hānga, "Ina mibing hili theihaira; athum marākkapaiya mimānga. ¹⁴Ili aningkhānlu; ina athumli sāshimānra, kazingram azingwui eina athumwui ming katatserhaora, kala nali athumli pangmei kala chungmeida yur akha sāra."

¹⁵Chieina ina ngareiungda phungrei chi mei eina chuilakha, tuingashitwui lungphek khani iwui pāng khanili khuida phungreiwui eina tunga. ¹⁶Ina yanga tharan, nathumna nathumwui Avāli morei sāhaira da thei: nathumna khalattawui vang heikakhui seinao akha heikhuihaira, nathumwui Avāna nathumli kasoi apong chiwui eina ngalāngda ngalanhaowa. ¹⁷Chieina ina lungphek khani yonkhuida, iwui pāng eina horsanga, kala nathumwui miktāli sākakhuihaowa. ¹⁸Nathumna nathumwui Avāwui mangāli makhayā otmāng sāda ali malungvāt ngasak kahai morei saikorawui vang, ina kharewui thāda ngashun hangmati kala ngayā hangmatithang nathumwui Avāwui mangāli mashunzangda pihaowa; kazā mazāmana lah tara̱ mamangmana. ¹⁹Kaja nathumwui Avāna nathumli sāshimān khavai jihaida, nathumwuitungli khalei malungkhavāt kala malung kasāwui vang ina ngacheehaowa. Kha atam chilila nathumwui Avāna iwui kapo khuisangmi. ²⁰Nathumwui Avāna Aaronli malungvātlakhaida, ali sāshimān khavai jihaowa; chiwui vang atam chilila Aaronwui vang ina seihā sai. ²¹Nathumwui morei, nathumna sākahai seinao chi ina khuilaga meili riktai; chi neinei sāda chifa thāda thurda sāngasakta, chiwui akha̱ chi phungreiwui eina longtāra kongli manāthaira. ²²Taberahli, kala Massahli, kala Kibroth-hattaavahlila nathumna nathumwui Avāli malungvāt ngasaka. ²³Nathumwui Avāna Kadesh-barneawui eina nathumli chihovā tharan, "Kālu, ina nathumli mishai ngalei chi ngavailu," da hānglakha, nathumna nathumwui Avāwui kakaso chi ngakaishihaowa, ali mashitsangmada awui akhon manganāmana. ²⁴Ina nathumli theikahai zimiksho eina tangda nathumna nathumwui Avāli ngakaishida lei. ²⁵Nathumwui Avāna nathumli sāshimānra da hāngkahaiwui vang, ina ngashun hangmati kala ngayā hangmatithang nathumwui Avāwui mangāli mashunzangda pisai. ²⁶Ina nathumwui Avāli seihā sāda hānga, "O iwui Avā, nawui kharei eina ngatangkakhui kala kapanga pāng eina Egyptwui eina thānshokkhami nawui mibing, nawui shimluikat chi masāshimānmilu. ^b b v26 Mosesna ithumwui Avāwui mangāli mashunzangda, akhalatta pangna huikhui mashapra mibingwui vang poda — hi ithumwui Avā kala awui naomayarabingwui ngachaili nganingda athumwui vang po khavai jihai reimei Ngachaikapa, Jishuwui azak akhana. ²⁷Nawui raobing Abraham, Isaac, kala Jacobli phaningunglu. Mibing hiwui ningngai zakshi, athumwui makhayā, kala athumwui morei chi mayangalu. ²⁸Chi maningakha, nana ithumli thānshokkhami ngalei chiwui mibingna hāngra, 'Varena athumli ngashit kahai ngalei chili thānzang khavai mashapmana, kala athumli ningkakachaiwui vang, lamhāngli athumli shaothat khavai thānkashokna.' ²⁹Kaja athum nawui mibing, nawui shimluikatna, nawui reikhamatai pangshap eina kala pāngthei katingshokta thānshokkhamibingna."