Avāna Awui Tuingashit Sāluishita
Lungphen kathar hotlaga okoli haisanga, kala ithumwui Avā khalatta athumwui samphangrān sāda Levili tharmathengkhui. Chiwui thili ngahāna: ithumwui Avāna nathumli khi ngaraimi? Ali ngachee, leishi kala otram ngatha̱ khavaina. Ana kha̱milili leishida kashakazā ngarānmi, chieina nathumla kha̱milili leishilu.
10 1Atam chitharan ithumwui Avāna ili hānga, "Lungphek khani kharewui tākam eina sākhuilu, phungreili iwuili kālu, kala thingwui oko akha sākhuilu. 2Nana sakhai kahai khare lungphek chili kapi kahai tui chi ina lungphek chili kapisangra, kala nana chibing chi oko chili khuisangra."
3Chieina ina acaciathing eina oko akha sākhuilaga, lungphek khani kharewui thāda sākhui, kala lungphek khani chi ipāngli singphungda phungreili kai. 4Ana kharewui thāda, yarui kazipta leilakha phungreitungli meilungwui eina ithumwui Avāna nathumli kahahāng ningkhami tharā chi lungphek chili kapisang. Kala ithumwui Avāna chi ili mi. 5Chieina ina ngareikhuida phungreiwui eina lattai, kala ina sākhui kahai oko chili lungphek chi khuisang; ithumwui Avāna ili kaso kahai thāda chibing chili pamsanghaowa.
6Israelwui mibingna Be-eroth Bene-jaakanwui eina zatphokta Moserahli vai; chili Aaron thihaida ali chifahaowa; awui nao Eleazarna awui pamli pāngmon sai. 7Chiwui eina athumna Gudgodahli zatphokta vai, kala Gudgodahwui eina tara̱ kong khalei ngalei Jotbathahli vai. 8Atam chitharan ithumwui Avāna tuingashit oko chi phung khavai, awui mangāli nganing khavai, ali otram ngatha̱ khavai, kala awui ming eina somi khavai Leviwui shang chi phaishokmi. Aja rāshungda athumna chithāda sāda lei. 9Chiwui vang eina Levina achinā ngarāli ngasoda yar lah shimlui maleimana; ithumwui Avāna ali ngashitmi kahai thāda, ithumwui Avā chi awui shimluina.
10Ina khare thāda phungreili ngashun ngayā hangmatithang pama; ithumwui Avāna latluida ili shāmi; ithumwui Avāna nathumli sāshimān khavai masākhangaimana.
11Kala ithumwui Avāna ili hānga, "Ngakarthuilu; ina athumwui shāvā ngarāli mira da khangashit kahai ngalei chi athumna zangda khui khavai, mibingli rida vālu."
Ithumwui Avāna Nathumli Khi Ngachāngkhala
12Ara, O Israel, ithumwui Avāna nathumwui eina khi ngahānkhala, ali khangachee khavai, awui apong saikorali zat khavai, ali leishi khavai, kala nathumwui ning manglā tongda ali otram ngatha̱ khavaina, 13kala aja ina nathumli kaso kahai ithumwui Avāwui ningkhami eina awui ain chi mayon khavai, nathumwui kaphā vangna. 14Yanglu, kazingram, juimeikap kaja kazingram, okathui, kala chiwui alungli khalei saikora hi ithumwui Avāwuina. 15Chithālala ithumwui Avāna nathumwui shāvā ngarāli leishilāka, kala aja leilakha thāda athumwui thili athumwui ara̱-azā nathumli miyur saikorawuitungli kapangkhui. 16Chiwui vang eina nathumwui ningwui ahui rimshoklu, kala latluida ngakaishitingting masaalu. a a v16 "Nathumwui ningwui ahui rimshoklu" jikahai hi, ning chi ngakaishitingting kala ngaphin sāthei ot saikora chi katattā, ithumwui Avāli ning chi tongda shosang khavai jikahaina. 17Kaja ithumwui Avā chi varebingwui Vare, prohobingwui Proho, reikhamatai, sāshapa, kala khangachee-khangachā Varena; ana mijang mavaimana kala pheizā makhuimana. 18Ana marānao kala ra̱meinaowui vang mashun sāmi, kala kha̱mili leishida ali kashakazā kala kashankachon mi. 19Chiwui vang eina nathumla kha̱mili leishilu, kaja nathumla Egypt ngaleili kha̱mi sāsai. 20Ithumwui Avāli ngacheelu, ali otram ngatha̱lu, ali ngavaptitlu, kala awui ming eina mingzailu. 21Ana nathumwui masot, nathumwui Avā, nathumna theikahai hakkhamahā kala khangachee-khangachā ot hi nathumwui vang sāmi kahaina. 22Navā ngarā mi hangshini Egyptli tai; ara ithumwui Avāna nathumli kazingramwui sirāyākha mayāsangmihaira.
