Baba Asakhazikisa Pontho Cibverano Cace
Mapulanga mapswa asacekwa mbaikhwa m'bokosi la phangano, na Levi asapambulwa na Baba wathu yekha kukhala pyakutsalira pyawo. Penepo mbvunzo: kodi Baba wathu asafuna ninji kwa imwe? Kumgopa, kumfuna na kumtumikira. Iye asafuna mlendo mbampasa cakudya, natenepa funanimbo alendo.
10 1N'dzidzi unoyu Baba wathu andipanga kuti: “Sema mapici mawiri a miyala ninga akutoma, ubwere kuna Ine pa phiri, mbucita bokosi ya matabwa. 2Ine ndinalemba pa mapici mafala akhali pa mapici akutoma adaswa iwe, penepo uyaike m'bokosi.”
3Na tenepo ndacita bokosi ya matabwa a akasiya, mbandisema mapici mawiri a miyala ninga akutoma, mbandikwira pa phiri na mapici mawiri anewa m'manja mwanga. 4Iye alemba pa mapici, ninga kale, matongero khumi adalonga Baba wathu kwa imwe pa phiri kubulukira n'kati mwa moto, pa ntsiku ya kugumanyikana. Na tenepo Baba wathu andipasa mapici anewa. 5Ndabwerera, mbandiseruka pa phiri, mbandiika mapici mu bokosi idacita ine; mapici anewa apitiriza kukhala mwenemu, ninga mudandipangira Baba wathu.
6Ana a Izarayeli aenda kubulukira ku Bheroti Bhene-yaakani mpaka ku Mosera, kudafa Aroni mbaikhwa; mwana wace Eleazari akhala nyantsembe m'mbuto mwace. 7Kubulukira penepo aenda ku Gudigoda, na kubulukira ku Gudigoda mpaka ku Yotibhata, dziko ya mikulo ya madzi. 8N'dzidzi unoyu Baba wathu asankhula dzindza ya Levi toera kuthukula bokosi ya cibverano, toera kulimira pamaso pace, toera kuntumikira, na kupasa nkhombo mu dzina yace, ninga munacitira iwo mpaka lero. 9Na tenepo Levi nkhabe khundu peno unthaka pabodzi na abale ace; Baba wathu ndi unthaka wace, ninga mudampikira Baba wathu.
10Ndakhala pa phiri, ninga ndzidzi wakutoma, ntsiku makumanai na masiku makumanai; Baba wathu andibvesera pontho; Baba wathu nee afuna kukufudzani imwe.
11Na tenepo Baba wathu andipanga kuti: “Lamuka, enda patsogolo pa anthu, toera iwo apinde mbatambira dziko idadumbira Ine kuna ababa awo toera kuapasa.”
Pinaphemba Baba Wathu kwa Imwe
12Cincino, imwe Izarayeli, ninji cinaphemba Baba wathu kwa imwe, kusiyapo kuti mun'gope Iye, mufambe m'njira zace zonsene, mun'fune, na kuntumikira na ntima wanu onsene na moyo wanu onsene, 13na kukoyera matongero a Baba wathu na mitemo yace inakupangani ine lero, toera pikhale pyadidi kwa imwe? 14Onani, kudzulu, kudzulu kwa kudzulu, dziko na pyonsene piri mwenemu ndi pya Baba wathu. 15Mbwenye Baba wathu afuna ababa anu, mbasankhula mbeu yawo pambuyo pawo, ndiwo imwe, kupita mitundu yonsene ya anthu, ninga pyiri lero. 16Na tenepo sidzani mukanda wa ntima wanu, mbamuleka kukhala akuuma nsolo. a a v16 “Kusidza mukanda wa ntima” pisapangiza kucekerera cinthu consene cinacitisa ntima kukhonda kutawira na kufungika — mbaufungula mwakukwana kuna Baba wathu. 17Thangwi Baba wathu ndi Mulungu wa milungu, Mbuya wa ambuya, Mulungu nkulu, wavu, wakugopswa, ule anakhonda kuona nkhope ya munthu, nkhabe kutambira ciphuphu. 18Iye asatonga mwa ulungami nsiwana na nzice, mbafuna mulendo, mbampasa cakudya na nguwo. 19Na tenepo imwembo musafunika kufuna mulendo, thangwi imwe mukhali alendo mu dziko ya Edjipitu. 20Gopani Baba wathu, muntumikire, mukakamire Iye, mbamudumbira mu dzina yace. 21Iye ndi matamando anu, Baba wanu, adakucitirani pinthu pikulu na pyakugopswa pidaona maso anu ene. 22Ababa anu aseruka mbaenda ku Edjipitu, akhali anthu makumanomwe; cincino Baba wathu akucitani kukhala azinji ninga nyenyezi za kudzulu.
