申命記 10

10 ¹嗰陣時,我哋嘅父同我講:「你要鑿兩塊石版,好似先前嗰兩塊咁,上山嚟到我呢度,又要做一個木櫃。 ²你打爛咗嘅先前嗰兩塊石版上面嘅字,我會重新寫喺呢兩塊石版上面,你要將佢哋放入櫃入面。」

³於是我用皂莢木做咗一個櫃,又鑿咗兩塊石版,好似先前嗰兩塊咁,手裡拎住呢兩塊石版上山。 ⁴我哋嘅父喺聚會嗰日,喺山上火焰中間對你哋所講嗰十誡,佢好似先前咁寫喺呢兩塊石版上面,然後將佢哋交畀我。 ⁵我轉身落山,將呢兩塊石版放入我所做嘅櫃入面,佢哋一直留喺嗰度,好似我哋嘅父吩咐我咁。

⁶以色列人由比羅比尼亞干起程,去到摩西拉,亞倫喺嗰度死咗,葬咗喺嗰度;佢個仔以利亞撒接替佢做祭司。 ⁷佢哋由嗰度起程去到谷歌大,又由谷歌大去到約巴他,嗰處係有水流嘅地方。 ⁸嗰陣時,我哋嘅父將利未支派分別出嚟,叫佢哋抬約櫃,喺佢面前侍立事奉,又奉佢嘅名祝福,直到今日都係咁。 ⁹所以利未喺佢弟兄中間冇份業、冇產業;我哋嘅父就係佢嘅產業,好似我哋嘅父應許佢咁。

¹⁰我好似頭一次咁,喺山上留咗四十晝四十夜;我哋嘅父又再聽我嘅祈求,唔想毀滅你哋。

¹¹我哋嘅父對我講:「你起身,行喺百姓前面,好等佢哋可以進去,得着我向佢哋祖先起誓應許賜畀佢哋嘅地。」

我哋嘅父對你哋嘅要求

¹²以色列啊,而家我哋嘅父對你有乜嘢要求呢?只不過係要你敬畏佢,行佢一切嘅道,愛佢,盡心盡性事奉佢, ¹³又要遵守我今日吩咐你嘅、我哋嘅父嘅誡命同律例,使你得着好處。 ¹⁴你睇,天同天上嘅天、地同地上一切嘅嘢,都係屬於我哋嘅父嘅。 ¹⁵但係我哋嘅父偏偏鍾意你嘅祖先,揀選佢哋以後嘅子孫,就係你哋,超過萬民,好似今日咁。 ¹⁶ 所以你哋要將心上嘅包皮割除,唔好再頑固啦。 ^a a v16 「將心上嘅包皮割除」係比喻要割走一切令個心抗拒、封閉嘅嘢,將個心完全向我哋嘅父敞開。 ¹⁷因為我哋嘅父係萬神之神、萬主之主,係至大、至能、至可畏嘅神,佢唔偏待人,亦都唔收賄賂。 ¹⁸佢為孤兒寡婦伸張公義,又鍾意寄居嘅人,將食物同衣服賜畀佢。 ¹⁹所以你哋都要鍾意寄居嘅人,因為你哋喺埃及地都做過寄居嘅人。 ²⁰你要敬畏我哋嘅父,事奉佢,緊緊倚靠佢,又要指住佢嘅名起誓。 ²¹佢係你所讚美嘅,係你嘅父,佢為你做過你親眼睇見呢啲又大又可畏嘅事。 ²²你嘅祖先落埃及嗰陣,一共只得七十人;而家我哋嘅父叫你哋多到好似天上嘅星咁。