Gũcookerithia Maathani 10 FHB Father's Heart Bible™

10 ¹Hĩndĩ ĩyo Ithe witũ akĩnjĩĩra atĩrĩ, “Ũicũhie ihengere igĩrĩ cia mahiga ta iria cia mbere, ũũke kũrĩ niĩ kĩrĩmainĩ, na ũthondeke ithandũkũ rĩa mbaũ. ²Niĩ nĩngaandĩka ihengereinĩ icio ciugo iria ciarĩ ihengereinĩ cia mbere iria wonangire, nawe ũciĩkĩre thĩinĩ wa ithandũkũ rĩu.”

³Nĩ ũndũ ũcio ngĩthondeka ithandũkũ rĩa mbaũ cia mũgaa, ngĩacũhia ihengere igĩrĩ cia mahiga ta iria cia mbere, na ngĩamba kĩrĩma ndĩnyiitĩte ihengere icio cierĩ mookoinĩ. ⁴Nake akĩandĩka ihengereinĩ icio, o ta mbere, maathani marĩa ikũmi marĩa Ithe witũ aamwĩrire mũrĩ kĩrĩmainĩ kuuma thĩinĩ wa mwaki, mũthenya wa kĩũngano. Nake Ithe witũ akĩĩnengera mo. ⁵Ngĩhũndũka, ngĩikũrũka kuuma kĩrĩmainĩ, na ngĩĩkĩra ihengere icio thĩinĩ wa ithandũkũ rĩrĩa ndaathondekete; na nĩkuo ciikarĩte, o ta ũrĩa Ithe witũ aanjaathire.

⁶Andũ a Isiraeli makiuma Beerothu-Bene-Jaakani magĩthiĩ Mosera, kũrĩa Harũni aakuĩrĩire na agĩthikwo; nake mũrũwe Eleazaru agĩtuĩka mũthĩnjĩri-Ngai ithenya rĩake. ⁷Kuuma kũu magĩthiĩ Gudigoda, na kuuma Gudigoda magĩthiĩ Jotibatha, bũrũri wa tũrũũĩ twa maaĩ. ⁸Hĩndĩ ĩyo Ithe witũ akĩamũra mũhĩrĩga wa Lawi nĩguo makuuage ithandũkũ rĩa kĩrĩĩkanĩro, marũgamage mbere yake, mamũtungatagĩre, na marathimanage na rĩĩtwa rĩake, o ta ũrĩa meekaga nginya ũmũthĩ. ⁹Nĩ ũndũ ũcio Lawi ndarĩ na rwĩga kana igai hamwe na ariũ a ithe; Ithe witũ nĩ we igai rĩake, o ta ũrĩa Ithe witũ aamweranĩire.

¹⁰Ndaikarire kĩrĩmainĩ, o ta hĩndĩ ya mbere, mĩthenya mĩrongo ĩna na ũtukũ mĩrongo ĩna; Ithe witũ akĩnjigua o rĩngĩ; Ithe witũ ndeendaga kũmũananga.

¹¹Nake Ithe witũ akĩnjĩĩra atĩrĩ, “Ũkĩra, ũthiĩ mbere ya andũ aya, nĩguo matoonye na megwatĩre bũrũri ũrĩa ndeehĩtĩire maithe mao atĩ nĩngamahe.”

Ũrĩa Ithe witũ Akũũragia

¹²Na rĩu, Isiraeli, nĩ kĩĩ Ithe witũ akũũragia, tiga ũmwĩtigĩre, ũthiiage na njĩra ciake ciothe, ũmwendage, na ũmũtungatagĩre na ngoro yaku yothe na muoyo waku wothe, ¹³na ũmenyagĩrĩre maathani ma Ithe witũ na mawatho make marĩa ngũgwatha ũmũthĩ, nĩ ũndũ wa wega waku? ¹⁴Atĩrĩrĩ, igũrũ nĩ rĩa Ithe witũ, o na igũrũ rĩrĩa rĩrĩ igũrũ mũno, na thĩ, na indo ciothe iria irĩ kuo. ¹⁵No Ithe witũ nĩeendire maithe manyu, agĩthuura rũciaro rwao thuutha wao—na nĩ inyuĩ, gũkĩra ndũũrĩrĩ ciothe—o ta ũrĩa gũtariĩ ũmũthĩ. ¹⁶Nĩ ũndũ ũcio ruithia ngoro yaku, na ndũgacooke kũũmia ngingo. ^a a v16 Ciugo ici “ruithia ngoro yaku” nĩ ngerekano ya gũtinia kĩrĩa gĩothe gĩtũmaga ngoro ĩrege na ĩhinge — ũmĩhingũrĩre biũ kũrĩ Ithe witũ. ¹⁷Amu Ithe witũ nĩ we Ngai wa ngai, na Mwathani wa athani, Ngai ũrĩa mũnene, ũrĩ hinya, na wa gwĩtigĩrwo, ũrĩa ũtathuuranagia andũ na ũtamũkagĩra ihaki. ¹⁸Nĩatuagĩra ciira na kĩhooto mwana wa ngoriai na mũtumia wa ndigwa, na akenda mũgeni, akĩmũhe irio na nguo. ¹⁹Nĩ ũndũ ũcio o nawe wendage mũgeni, amu warĩ mũgeni bũrũriinĩ wa Misiri. ²⁰Wĩtigĩre Ithe witũ, ũmũtungatĩre, ũikare ũnyiitanĩte nake, na wĩhĩtage na rĩĩtwa rĩake. ²¹Nĩ we ũgooci waku, na nĩ we Ithe waku, ũrĩa ũkwĩkĩire maũndũ maya manene na ma gwĩtigĩrwo marĩa maitho maku moonete. ²²Maithe maku maikũrũkire magĩthiĩ Misiri marĩ andũ mĩrongo mũgwanja; na rĩu Ithe witũ nĩagũtuĩte mũingĩ ta njata cia igũrũ.