Uba Ya Sabunta Alkawarinsa

An sassaƙa sababbin allunan aka sa su cikin akwatin, aka kuma keɓe Lawi, da Ubanmu kansa ya zama gādonsu. Sa'an nan tambayar: me Ubanmu yake bukata daga gare ka? Ka ji tsoronsa, ka ƙaunace shi, ka bauta masa. Yana ƙaunar baƙo yana ba shi abinci, don haka ku ma ku ƙaunaci baƙi.

Babi na 10.

A lokacin nan Ubanmu ya ce mini, “Ka sassaƙa alluna biyu na dutse kamar na farkon, ka hauro wurina a bisa dutsen, ka kuma yi akwati na katako. Zan rubuta a kan allunan kalmomin nan da suke kan allunan farkon da ka karya, kai kuwa za ka sa su a cikin akwatin.”

Sai na yi akwati da itacen ƙirya, na sassaƙa alluna biyu na dutse kamar na farkon, na kuma hau dutsen riƙe da allunan nan biyu a hannu. Ya rubuta a kan allunan, kamar dā, dokoki goma da Ubanmu ya faɗa muku a kan dutsen daga cikin wuta, a ranar taron. Ubanmu kuma ya ba ni su. Sai na juya, na sauko daga dutsen, na sa allunan a cikin akwatin da na yi; a can kuwa suke har yanzu, yadda Ubanmu ya umarce ni.

Isra'ilawa suka tashi daga Beyerot-Bene-Yaakan zuwa Mosera, inda Haruna ya mutu aka kuma binne shi; Ele'azar ɗansa ya zama firist a maimakonsa. Daga can suka tafi Gudgoda, daga Gudgoda kuma zuwa Yotbata, ƙasa mai koramun ruwa. A lokacin nan Ubanmu ya keɓe kabilar Lawi su ɗauki akwatin alkawari, su tsaya a gabansa, su yi masa hidima, su kuma sa albarka da sunansa, kamar yadda suke yi har wannan rana. Saboda haka Lawi ba shi da rabo ko gādo tare da 'yan'uwansa; Ubanmu shi ne gādonsa, yadda Ubanmu ya yi masa alkawari.

Na zauna a kan dutsen, kamar sau na farko, kwanaki arba'in da darare arba'in; Ubanmu kuma ya saurare ni, Ubanmu bai so ya hallaka ku ba.

Ubanmu kuma ya ce mini, “Tashi, ka yi gaban mutanen, domin su shiga su mallaki ƙasar da na rantse wa kakanninsu zan ba su.”

Abin da Ubanmu Yake Bukata daga gare Ka

To yanzu, ya Isra'ila, me Ubanmu yake bukata daga gare ka in ba ka ji tsoronsa ba, ka yi tafiya cikin dukan hanyoyinsa, ka ƙaunace shi, ka kuma bauta masa da dukan zuciyarka da dukan ranka, ka kuma kiyaye dokokin Ubanmu da ƙa'idodinsa da nake umartarka da su yau, domin amfaninka? Ga shi, na Ubanmu ne sammai, da sama mafi tsayi, da duniya, da dukan abin da ke cikinta. Duk da haka Ubanmu ya ƙaunaci kakanninku, ya kuma zaɓi zuriyarsu a bayansu, wato ku, fiye da dukan al'ummai, kamar yadda yake a yau. Saboda haka ka yi wa zuciyarka kaciya, kada kuma ka ƙara taurin kai. ^a Gama Ubanmu shi ne Allahn alloli, Ubangijin iyayengiji, Allah mai girma, mai iko, mai ban tsoro, wanda ba ya sonkai, ba ya kuma karɓar cin hanci. Yana yi wa maraya da gwauruwa adalci, yana kuma ƙaunar baƙo, yana ba shi abinci da tufafi. Saboda haka kai ma dole ka ƙaunaci baƙo, gama baƙo ne ka kasance a ƙasar Masar. Ka ji tsoron Ubanmu, ka bauta masa, ka manne masa da ƙarfi, ka kuma yi rantsuwa da sunansa. Shi ne abin yabonka, Ubanka, wanda ya yi maka waɗannan manyan abubuwa masu ban tsoro da idanunka suka gani. Kakanninka sun gangara zuwa Masar, mutum saba'in ne; yanzu kuwa Ubanmu ya sa ka yi yawa kamar taurarin sama.