Nasara Kyauta ce daga Ubanku

Kada ka ce a ranka Ubanka yana ba ka wannan ƙasa saboda adalcinka. Musa ya ba da labarin ɗan maraƙin zinariya, allunan da aka farfashe, kwana arba'in a kwance a fuska, da roƙo saboda jama'ar da ta kusa hallaka — da kuma saboda Haruna. Kun yi tawaye tun daga ranar da na san ku.

Babi na 9.

Ka ji, ya Isra'ila: Yau za ka ƙetare Urdun domin ka shiga ka kori al'ummai masu girma da ƙarfi fiye da kai—manyan birane masu katanga har zuwa sama. Mutane ne masu yawa, dogaye, zuriyar Anakawa, waɗanda ka sani kuma ka ji an ce game da su, “Wa zai iya tsayawa gaban 'ya'yan Anak?” Ka sani yau, Ubanka ne yake ƙetarewa a gabanka kamar wuta mai cinyewa. Zai hallaka su yă kuma rinjaye su a gabanka; za ka kore su ka kuma kawar da su da sauri, yadda Ubanka ya gaya maka.

Bayan Ubanka ya kore su a gabanka, kada ka ce a zuciyarka, “Saboda adalcina ne Ubanmu ya kawo ni in mallaki wannan ƙasa”—saboda muguntar waɗannan al'ummai ne yake korar su a gabanka. Ba saboda adalcinka ba, ba kuma saboda gaskiyar zuciyarka ba ne kake shiga ka karɓi ƙasarsu, sai dai saboda muguntar waɗannan al'ummai ne Ubanka yake korar su a gabanka, da kuma domin yă cika maganar da Ubanka ya rantse wa kakanninka—Ibrahim, da Ishaku, da Yakubu. Ka sani fa, ba saboda adalcinka ba ne Ubanka yake ba ka wannan ƙasa mai kyau ka mallaka, domin kai jama'a ce mai taurin kai.

Mutanen da Suka Gwada Ubansu

Ka tuna, kada ka manta yadda ka husata Ubanka a jeji. Tun daga ranar da ka bar Masar har ka kai wannan wuri, kana tawaye ga Ubanka. A Horeb ka husata Ubanka, Ubanka kuma ya yi fushi da kai sosai har ya kusa yă hallaka ka. ^a Sa'ad da na hau dutsen domin in karɓi allunan dutse, allunan alkawarin da Ubanka ya yi da kai, na zauna a dutsen kwana arba'in dare da rana, ban ci gurasa ba, ban kuma sha ruwa ba. Ubanka ya ba ni allunan dutse biyu, waɗanda aka rubuta da yatsarsa, ɗauke da dukan kalmomin da ya yi magana da kai a dutsen daga cikin wuta, a ranar taron. Bayan kwana arba'in dare da rana, Ubanka ya ba ni allunan dutse biyu, allunan alkawari.

Sa'an nan Ubanka ya ce mini, “Tashi, ka yi sauri ka sauka daga nan, gama mutanenka da ka fito da su daga Masar sun ɓata kansu. Da sauri suka juya daga hanyar da na umarce su; suka ƙera wa kansu gunkin zubi.”

Bugu da ƙari, Ubanka ya ce mini, “Na ga wannan jama'a—jama'a ce mai taurin kai. Ka rabu da ni; zan hallaka su, in shafe sunansu daga ƙarƙashin sama, in kuma maishe ka al'umma mai ƙarfi da yawa fiye da su.”

Sai na juya na sauka daga dutsen yayinda yake cin wuta, allunan alkawari biyu suna hannuwana biyu. Da na duba, sai na ga ka yi wa Ubanka zunubi: ka ƙera wa kanka ɗan maraƙin zubi, ka juya da sauri daga hanyar da Ubanka ya umarce ka. Sai na kama alluna biyun, na jefar da su daga hannuwana, na kuma farfasa su a gabanka. Na fāɗi a gaban Ubanka kamar dā, kwana arba'in dare da rana, ban ci gurasa ba, ban sha ruwa ba, saboda dukan zunubin da ka aikata, kana aikata mugunta a gaban Ubanka, kana husata shi. Gama na ji tsoron fushi da zafin hasalar da Ubanka ya yi da kai, har ya kusa yă hallaka ka. Amma Ubanka ya saurare ni a wannan lokaci kuma. Ubanka ya yi fushi sosai da Haruna, har ya kusa yă hallaka shi, saboda haka na yi addu'a domin Haruna a wannan lokaci kuma. Na ɗauki zunubinka, ɗan maraƙin da ka yi, na ƙone shi da wuta, na ragargaza shi, na niƙa shi sarai har ya zama kamar ƙura, sa'an nan na zubar da ƙurarsa cikin rafin da yake gangarowa daga dutsen. A Tabera kuma, da Massa, da Kibrot-hattawa ka husata Ubanka ya yi fushi. Sa'ad da Ubanka ya aike ka daga Kadesh-barneya, yana cewa, “Haura, ka mallaki ƙasar da na ba ka,” ka yi tawaye ga umarnin Ubanka, ba ka gaskata shi ba, ba ka kuwa yi biyayya ga muryarsa ba. Kana tawaye ga Ubanka tun ranar da na san ka. Saboda haka na fāɗi a gaban Ubanka kwana arba'in dare da rana da na kwanta a can, domin Ubanka ya ce zai hallaka ka. Na yi addu'a ga Ubanka, “Ya Ubana Mamallaki, kada ka hallaka mutanenka, gādonka, waɗanda ka fanshe ta wurin girmanka, ka kuma fito da su daga Masar da hannu mai ƙarfi. ^b Ka tuna da bayinka Ibrahim, da Ishaku, da Yakubu. Kada ka dubi taurin kan wannan jama'a, da muguntarsu, da zunubinsu. In ba haka ba, mutanen ƙasar da ka fito da mu daga cikinta za su ce, ‘Allah bai iya kawo su cikin ƙasar da ya yi musu alkawari ba, ya kuma ƙi su, saboda haka ya fito da su domin yă kashe su a jeji.’ Gama su mutanenka ne, gādonka, waɗanda ka fito da su ta wurin ikonka mai girma da hannu mai miƙewa.”