Deuteronomi 10

10 ¹Nígbà náà ni Baba wa sọ fún mi pé, “Gbẹ́ wàláà òkúta méjì bí i ti àkọ́kọ́, gòkè wá sọ́dọ̀ mi sórí òkè náà, kí o sì kan àpótí igi kan. ²Èmi yóò kọ sára wàláà náà àwọn ọ̀rọ̀ tí ó wà lórí wàláà àkọ́kọ́ tí o fọ́, kí o sì fi wọ́n sínú àpótí náà.”

³Nítorí náà mo kan àpótí kan pẹ̀lú igi ṣittimu, mo sì gbẹ́ wàláà òkúta méjì bí i ti àkọ́kọ́, mo sì gòkè lọ sórí òkè náà, tí wàláà méjèèjì wà lọ́wọ́ mi. ⁴Ó sì kọ sára wàláà náà, gẹ́gẹ́ bí ti ìṣáájú, òfin mẹ́wàá tí Baba wa ti sọ fún yín lórí òkè náà láti àárín iná, ní ọjọ́ àpéjọ. Baba wa sì fi wọ́n fún mi. ⁵Mo sì yípadà, mo sọ̀kalẹ̀ láti orí òkè náà, mo sì fi wàláà náà sínú àpótí tí mo ti kàn; níbẹ̀ ni wọ́n sì wà, gẹ́gẹ́ bí Baba wa ti pàṣẹ fún mi.

⁶Àwọn ọmọ Israẹli sì rìnrìn-àjò láti Beroti-Bene-Jaakani lọ sí Mosera, níbi tí Aaroni kú tí a sì sìn ín; Eleasari ọmọ rẹ̀ sì ṣe àlùfáà ní ipò rẹ̀. ⁷Láti ibẹ̀ ni wọ́n sì rìnrìn-àjò lọ sí Gudgoda, àti láti Gudgoda lọ sí Jotbata, ilẹ̀ tí ó kún fún ìṣàn omi. ⁸Nígbà náà ni Baba wa yan ẹ̀yà Lefi sọ́tọ̀ láti máa ru àpótí májẹ̀mú náà, láti dúró níwájú rẹ̀, láti sìn ín, àti láti máa súre ní orúkọ rẹ̀, gẹ́gẹ́ bí wọ́n ti ń ṣe títí di òní. ⁹Nítorí náà Lefi kò ní ìpín tàbí ogún pẹ̀lú àwọn arákùnrin rẹ̀; Baba wa ni ogún rẹ̀, gẹ́gẹ́ bí Baba wa ti ṣe ìlérí fún un.

¹⁰Mo sì dúró lórí òkè náà, gẹ́gẹ́ bí ìgbà àkọ́kọ́, ní ogójì ọ̀sán àti ogójì òru; Baba wa sì tún gbọ́ ti èmi lẹ́ẹ̀kan sí i; Baba wa kò sì fẹ́ láti pa yín run.

¹¹Baba wa sì sọ fún mi pé, “Dìde, lọ ṣáájú àwọn ènìyàn náà, kí wọ́n lè wọlé, kí wọ́n sì gba ilẹ̀ tí mo búra fún àwọn baba wọn láti fi fún wọn.”

Ohun Tí Baba Wa Ń Béèrè Lọ́wọ́ Rẹ

¹²Nísinsìnyí, Israẹli, kí ni Baba wa ń béèrè lọ́wọ́ rẹ bí kò ṣe kí o bẹ̀rù rẹ̀, kí o máa rìn ní gbogbo ọ̀nà rẹ̀, kí o fẹ́ ẹ, kí o sì fi gbogbo ọkàn rẹ àti gbogbo ẹ̀mí rẹ sìn ín, ¹³àti kí o máa pa àwọn òfin Baba wa àti ìlànà rẹ̀ mọ́, tí èmi ń pa láṣẹ fún ọ lónìí, fún rere rẹ? ¹⁴Kíyèsíi, ti Baba wa ni ọ̀run, ọ̀run tí ó ga jùlọ, ayé, àti ohun gbogbo tí ó wà nínú rẹ̀. ¹⁵Síbẹ̀ Baba wa fẹ́ràn àwọn baba yín, ó sì yan irú-ọmọ wọn lẹ́yìn wọn—ẹ̀yin, ju gbogbo àwọn ènìyàn lọ—gẹ́gẹ́ bí ó ti rí lónìí. ¹⁶Nítorí náà, ẹ kọlà awọ iwájú ọkàn yín, kí ẹ má sì ṣe jẹ́ olóríkunkun mọ́. ^a a v16 “Ẹ kọlà awọ iwájú ọkàn yín” dúró fún gígé ohunkóhun tí ń mú kí ọkàn le tí ó sì tìpa kúrò—kí a lè ṣí i sílẹ̀ pátápátá sí Baba wa. ¹⁷Nítorí Baba wa ni Ọlọ́run àwọn ọlọ́run, Olúwa àwọn olúwa, Ọlọ́run ńlá, alágbára, tó ba ni lẹ́rù, tí kì í ṣe ojúsàájú tí kì í sì í gba àbẹ̀tẹ́lẹ̀. ¹⁸Ó ń ṣe ìdájọ́ òdodo fún aláìní-baba àti opó, ó sì fẹ́ràn àlejò, ó ń fún un ní oúnjẹ àti aṣọ. ¹⁹Nítorí náà ẹ̀yin pẹ̀lú gbọdọ̀ fẹ́ràn àlejò, nítorí àlejò ni ẹ̀yin ti jẹ́ ní ilẹ̀ Ejibiti. ²⁰Ẹ bẹ̀rù Baba wa, ẹ sìn ín, ẹ fà mọ́ ọn ṣinṣin, kí ẹ sì fi orúkọ rẹ̀ búra. ²¹Òun ni ìyìn yín, Baba yín, ẹni tí ó ti ṣe àwọn ohun ńlá àti ohun tó ba ni lẹ́rù wọ̀nyí fún yín tí ojú yín ti rí. ²²Àwọn baba yín sọ̀kalẹ̀ lọ sí Ejibiti, àádọ́rin ní iye; nísinsìnyí Baba wa ti sọ yín di púpọ̀ bí ìràwọ̀ ọ̀run.