Mi eng' bukuit

Ne Kibwate Ng'atuutik 10 FHB Father's Heart Bible™

Kiistoi 15% eng' kiy ne iale korook →
Bukuit

Koleelta Kwanda Kayomisennyi

Kitil koik che lebeleen ak kinde eng' sandugut, ak kitabaan Lawi, Kwandanyo inegei porotennyi. Yeityo teebet: nee ne somei Kwandanyo eng' inyee? Si iywein, ichamei ak iboisyechi ineendet. Chamei toindet ak kogoochi amitwogik, si ichame toek inyee kora.

Ng'alaali Kwandanyo eng' mustarisyek 1–2, 11

Sura 10.

Eng' sait nooto, ko mwachan Kwandanyo, kole, “Til koik aeng' che lebeleen ko uu che po tai, ak itogoste tulweet ibwa inyoo, ak iyai sandugut ne po keetit. Asir koichooto ng'aleek che ki mi koichooto che po tai che ki ibar, ak inde eng' sandugut.”

Ki ayai anyun sandugut ne po keetiigap chebitoik, ak atil koik aeng' che lebeleen ko uu che po tai, ak atogosta tulweet, atinye koichooto tuwai eng' eut. Ki sir koichooto, ko uu ye po tai, ng'atuutik taman che ki mwaiwok Kwandanyo tulweet eng' kwenutap maat, eng' peetuutap tuiyet. Ak ki koonan Kwandanyo. Ki aweege, achoorugei eng' tulweet, ak ande koichooto eng' sandugut ne ki ayai; tebee eng' olooto, ko uu ye ki ng'atan Kwandanyo.

Ki pa piigap Israel eng' Beerot Bene-jaakan koba Moserot, ole ki kome Aron ak ki kitup; ki ek weeriinnyi Eleazar tisiindet eng' menyennyi. Ki pa eng' olooto koba Gudgoda, ak eng' Gudgoda koba Jotbata, emet ne po kereruusyegap peek. Eng' sait nooto, ki itabaan Kwandanyo ooreetap Lawi, si koip sandugutap kayomiset, si kotonone tainnyi, si koboisyechi, ak si koberuuris eng' kainennyi, ko uu ye yaei agoi ra. Ma tinyei anyun Lawi kebeberta anan poroteet kobooto tupchosyekyik; Kwandanyo porotennyi, ko uu ye ki mwachi Kwandanyo.

Ki atebi tulweet, ko uu ye po tai, peetuusyek artam ak kemousyek artam; ki kasan Kwandanyo kogeny; ma machei Kwandanyo kobetak.

Ak ki mwachan Kwandanyo, kole, “Ng'eet, iba taitap piik, si kobwa konyaban emet ne ki ayosye kwanisyekwak ale akoochi icheek.”

Ne Soomei Kwandanyo Eng' Okweek

Ak nguno, Israel, nee ne soomei Kwandanyo eng' okweek, ngo ma iywei ineendet, ak ipendi ortinwekyik tugul, ak icham, ak iboisiechin eng' muguleldang'wong' komugul ak eng' saboondang'wong' komugul, ak iriip ng'atuutigap Kwandanyo ak kaneetisyosyekyik che kang'atak rani, si koboiywok? Keer, po Kwandanyo kipsengwet, ak kipsengwet ne po parak miising', ak ng'wony, ak tugul che mi eng' ineendet. Ago ki cham Kwandanyo kwanisyekwok, ak kolewen iyotennywa che isubu icheek—okweek, kosiir pororyosyek tugul—ko uu ye mi ra. Omuratan anyun poortap muguleldang'wong', ak ametesi oegu che uueen metowoi. a a v16 Ng'olyoonooto ne le, “Omuratan poortap muguleldang'wong',” koboorunei tiletap kiy age tugul ne yaei mugulelda koer ak koger — si koyatan komugul kobunji Kwandanyo. Amu Kwandanyo ko Kamuktaindetap kamuktaik, Kiptaiyandetap kiptainik, Kamuktaindet ne oo, ne kiim, ne po kwong'eet, ne ma partoi chiito, ak ne ma taachei melekto. Yaei kirwoogetap imanda agobo lakwa ne ma tinyei sigiik ak mosoget, ak chamei toondet, kogoochi amitwogik ak ngoroik. Nyolu anyun okweek kora ocham toondet, amu ki oo okweek toek eng' emetap Misiri. Iywei Kwandanyo, iboisiechin, inamgei ak ineendet, ak iyasye eng' kainennyi. Ineendet kalasuneng'ung', Kwandang'ung', ne ki yaiwen tuguuchu che eechen ak che po kwong'eet che ki keer konyeguk. Ki pa kwanisyeguk koba Misiri, che po tamanwogik tisap; ak nguno ki kotesaak Kwandanyo, ak oo sere rani ko uu kecheigap kipsengwet.