Data yongera gushinga Isezerano rye

Ibisate bishya birabazwa bigashyirwa mu isanduku, maze Levi agatoranywa, Data wa twese ubwe akaba umurage we. Hanyuma ikibazo: ni iki Data wa twese agusaba? Kumwubaha, kumukunda no kumukorera. Akunda umunyamahanga akanamuha ibyokurya, bityo nawe kunda abanyamahanga.

Igice cya 10.

Icyo gihe Data arambwira ati: “Baza ibisate bibiri by'amabuye nk'ibya mbere, uzamuke uze aho ndi ku musozi, kandi ubāze isanduku y'igiti. Nzandika kuri ibyo bisate amagambo yari ku bisate bya mbere wamennye, maze ubishyire mu isanduku.”

Nuko mbāza isanduku mu giti cy'umunyinya, mbaza ibisate bibiri by'amabuye nk'ibya mbere, nzamuka uwo musozi mfite ibyo bisate byombi. Data yandika kuri ibyo bisate, nk'uko byari bimeze mbere, ya mabwiriza icumi yari yakubwiye ku musozi ari mu muriro, ku munsi w'ikoraniro. Nuko Data arabimpa. Nahindukira, manuka uwo musozi, nshyira ibyo bisate muri ya sanduku nari narabaje; ni ho byagumye, nk'uko Data yari yarambwiye.

Abisiraheli bava i Bēroti Bene-Yākani bajya i Mosera, aho Aroni yapfiriye agashyingurwa; umuhungu we Eleyazari amusimbura mu mirimo y'ubutambyi. Bahavuye bajya i Gudigoda, bava i Gudigoda bajya i Yotibata, igihugu kirimo imigezi y'amazi. Icyo gihe Data atoranya umuryango wa Levi kugira ngo utware isanduku y'Isezerano, uhagarare imbere ye, umukorere, kandi uhe umugisha mu izina rye, nk'uko babikora kugeza n'uyu munsi. Ni cyo gituma Levi atagira umunani cyangwa umurage hamwe na bene wabo; Data ni we murage we, nk'uko Data yabisezeranyije.

Namaze ku musozi, nk'uko byagenze ubwa mbere, iminsi mirongo ine n'amajoro mirongo ine; Data yongera kunyumvira; Data ntiyashaka kubarimbura.

Nuko Data arambwira ati: “Haguruka, ujye imbere y'abantu, kugira ngo bagende bigarurire igihugu narahiye ba sekuruza kubaha.”

Ibyo Data aba abasaba

None rero, Isiraheli, ni iki Data aba akusaba kitari ukumutinya, ukagendera mu nzira ze zose, ukamukunda, ukamukorera n'umutima wawe wose n'ubugingo bwawe bwose, no kumvira amabwiriza ya Data n'amateka ye mbategeka uyu munsi, kugira ngo mugire amahirwe? Dore ijuru, n'ijuru riri hejuru cyane, n'isi n'ibiyirimo byose, ni ibya Data. Nyamara Data yakunze ba sekuruza, atoranya urubyaro rwabo rubakomotseho ari mwe, abarusha amahanga yose, nk'uko bimeze uyu munsi. Nuko rero mukebe igikuba cy'imitima yanyu, ntimukongere kwinangira. ^a Kuko Data ari Imana y'imana, Nyagasani wa banyagasani, Imana ikomeye, ifite imbaraga, iteye ubwoba, idarobanura abantu kandi itemera ruswa. Arenganura impfubyi n'umupfakazi, kandi akunda umunyamahanga, akamuha ibyokurya n'imyambaro. Nuko namwe mugomba gukunda umunyamahanga, kuko mwari abanyamahanga mu gihugu cy'u Misiri. Tinya Data, umukorere, ubane na we akaramata, kandi urahire mu izina rye. Ni we bwiza bwawe, ni we Data wawe, wagukoreye ibyo bintu bikomeye kandi biteye ubwoba amaso yawe yabonye. Ba sekuruza bamanutse bajya mu Misiri ari mirongo irindwi gusa; none Data yabagize benshi nk'inyenyeri zo ku ijuru.