ኣቦ መንገዲ የፅሪ

እስራኤል መሰውኢታት እቶም ኣህዛብ ከፍርሱን ምውስሳብ ክኣብዩን ተኣዘዙ፥ እቲ ሓደጋ ልቢ ምዝንባል እዩ እሞ። ብግዝፎም ድማ ኣይተመረፁን፦ ካብ ኵሎም ህዝብታት ዝወሓዱ እዮም ኔሮም። ኣቦና ኣፍቀሮም፥ ማሕላኡ ድማ ሓለወ። እቲ ምኽንያት እዙይ እዩ።

ምዕራፍ 7።

ኣቦኻ ናብታ ክትወርሳ እትኣትዋ ዘለኻ ምድሪ ምስ ኣእተወካ፥ ብዙሓት ኣህዛብ ከዓ ካብ ቅድሜኻ ምስ ሰጎ፦ ኬጢያውያንን ጌርጌሳውያንን ኣሞራውያንን ከነዓናውያንን ፌርዛውያንን ሔዋውያንን ኢያቡሳውያንን፥ ካባኻ ዝዓብዩን ዝሕይሉን ሸውዓተ ኣህዛብ፥ ኣቦኻ ናባኻ ኣሕሊፉ ምስ ሃበካ፥ ንስኻ ድማ ምስ ሰዓርካዮም፥ ፈፂምካ ኣጥፍኣዮም። ኪዳን ኣይትተኣታተዎም፤ ኣይትራህርሃሎምውን። ምስኣቶም ኣይትተዋሰብ፤ ኣዋልድካ ንኣወዳቶም ኣይትሃብ፤ ኣዋልዶም ድማ ንኣወዳትካ ኣይትውሰድ። ንሳቶም ንደቅኻ ንኻልኦት ኣማልኽቲ ምእንቲ ኸገልግሉ ካብ ምስዓበይ ከዘንብልዎም እዮም እሞ፥ ቍጥዓ ኣቦና ኣብ ልዕሌኻ ክነድድ እዩ፤ ቀልጢፉ ኸዓ ከጥፍኣካ እዩ። ግናኸ ከምዙይ ግበሮም፦ መሰውኢታቶም ኣፍርስ፤ ሓወልትታቶም ሰባብር፤ ናይ ኣምልኾ ዓፀዳቶም ቍረፅ፤ ዝተወቕረ ምስልታቶም ድማ ብሓዊ ኣንድድ። ንስኻ ንኣቦኻ ቅዱስ ህዝቢ ኢኻ፤ ኣቦኻ ካብ ኵሎም ኣብ ገፅ ምድሪ ዘለዉ ህዝብታት፥ ህዝቡ፥ ብፍላይ ገንዘቡ ክትከውን መረፀካ። ኣቦኻ ዘፍቀረካን ዝመረፀካን፥ ካብ ካልኦት ህዝብታት ስለ ዝበዛሕኻ ኣይኮነን፤ ካብ ኵሎም ህዝብታት ዝወሓድካ ኢኻ ኔርካ እምበር። ግናኸ ኣቦኻ ስለ ዘፍቀረካን፥ ነቲ ንኣቦታትካ ዝመሓለሎም ማሕላ ስለ ዝሓለወን፥ ብሓያል ኢድ ኣውፅአካ፤ ካብ ቤት ባርነት፥ ካብ ኢድ ፈርዖን ንጉስ ግብፂ ኸዓ ተበዀካ። ኣቦኻ ንሱ ኣቦና፥ እቲ እሙን፥ ነቶም ዘፍቅርዎን ትእዛዛቱ ዝሕልዉን ክሳዕ ሽሕ ትውልዲ ኺዳንን ምሕረትን ዝሕሉ ምዃኑ ፍለጥ፤ ነቶም ዝፀልእዎ ግና፥ እናኣጥፍአ ኣብ ገፆም ይፈድዮም፤ ነቲ ዝፀልኦ ኣብ ገፁ ኽፈድዮ ኣይድንጒን እዩ። ስለዙይ እዝ ኣነ ሎሚ ዝእዝዘካ ዘለኹ ትእዛዝ፥ ሕግጋትን ፍርድታትን ሓሉ፤ ፈፅሞ ድማ።

ነዞም ፍርድታት እዚኣቶም ስለ እትሰምዕ፥ ትሕልዎም ድማ ትፍፅሞም ስለ ዘለኻ፥ ኣቦኻ ነቲ ንኣቦታትካ ዝመሓለሎም ኪዳንን ምሕረትን ክሕልወልካ እዩ። ከዓ ከፍቅረካ፥ ክባርኸካ፥ ከብዝሐካ እዩ፤ ኣብታ ክህበካ ንኣቦታትካ ዝመሓለሎም ምድሪ፥ ንፍረ ኸርስኻን ንፍረ ምድርኻን፥ እኽልን ወይንን ዘይትን፥ ምፍራይ ኣላሕምካን ምፍራይ ኣባጊዕኻን ክባርኽ እዩ። ካብ ኵሎም ህዝብታት ንላዕሊ ቡሩኽ ክትከውን ኢኻ፤ ኣባኻ ተባዕታይ ኾነ ኣንስተይቲ፥ ኣብ እንስሳኻን መኻን ኣይህሉን እዩ። ኣቦኻ ዅሉ ሕማም ካባኻ ከርሕቐልካ እዩ፤ ነቲ ዝፈለጥካዮ ዅሉ እኩይ ሕማም ግብፂ፥ ኣባኻ ኣየንብሮን፤ ነቶም ዝፀልኡኻ ዅሎም ግና ከንብሮ እዩ። ነቶም ኣቦኻ ዝህበካ ዅሎም ህዝብታት ኣጥፍኣዮም። ኣይትራህርሃሎም፤ ንኣማልኽቶም ኣይተገልግል፤ እዙይ መፈንጠር ክኾነካ እዩ እሞ። “እዞም ኣህዛብ እዚኣቶም ካባይ ይበዝሑ፤ ከመይ ገይረ ኽሰጎም እኽእል?” ኢልካ እንተ ሓሰብካ፥ ኣይትፍርሃዮም። ነቲ ኣቦኻ ንፈርዖንን ንብዘሎ ግብፅን ዝገበሮ ፅቡቕ ጌርካ ዘክር፦ ነቲ ኣዒንትኻ ዝረአይዎ ዓበይቲ ፈተናታት፥ ነቲ ምልክታትን ተኣምራትን፥ ነቲ ኣቦኻ ዘውፅአካ ሓያል ኢድን ዝርግሕቲ ቕልፅምን ዘክር። ኣቦኻ ነቶም እትፈርሖም ዅሎም ህዝብታት ከምኡ ኽገብሮም እዩ። ኣቦኻ ኸዓ ክሳዕ እቶም ዝተረፉን ካባኻ ዝተሓብኡን ዝጠፍኡ፥ ተናኸስቲ ፅንፅያ ናብ ማእኸሎም ክሰድድ እዩ። ኣይትሸበረሎም፤ ኣቦኻ ኣብ ማእኸልካ ኣሎ እሞ፤ ንሱ ዓብዪን ዘፍርሕን ኣቦና እዩ። ኣቦኻ ነዞም ኣህዛብ እዚኣቶም ካብ ቅድሜኻ ቐስ ብቐስ ክሰጎም እዩ። ቀልጢፍካ ኽትውድኦም ኣይትኽእልን ኢኻ፤ እንተ ዘይኮነ ኣራዊት መሮር ኣባኻ ኽበዝሑ እዮም። ኣቦኻ ናባኻ ኣሕሊፉ ኽህበካ እዩ፤ ክሳዕ ዝጠፍኡ ኸዓ ብብርቱዕ ድንጋፀ ኸናውፆም እዩ። ንነገስታቶም ኣብ ኢድካ ኽህበካ እዩ፤ ንስሞም ከዓ ኻብ ትሕቲ ሰማይ ክትድምስሶ ኢኻ። ክሳዕ እተጥፍኦም ድማ፥ ሓደ ሰብ እኳ ኣብ ቅድሜኻ ደው ክብል ኣይክእልን እዩ። ዝተወቕረ ምስሊ ኣማልኽቶም ብሓዊ ኣንድድ። እቲ ኣብ ልዕሊኦም ዘሎ ብሩር ወይ ወርቂ ኣይትመነ፤ ንባዕልኻ ድማ ኣይትውሰዶ፤ እንተ ዘይኮነ ብእኡ መፈንጠር ክኾነካ እዩ፤ ንኣቦኻ ፍንፉን እዩ እሞ። ፍንፉን ነገር ናብ ቤትካ ኣይተእቱ፤ እንተ ዘይኮነ ከምኡ ንጥፍኣት እተዋህበ ክትከውን ኢኻ። ንሱ ፈፂሙ ዝጠፍእ እዩ እሞ፥ ኣፅይፎ፤ ንዓቖ።