Hapana Anoita Zvakanaka
Kumutungamiri wokuimba. Nomuimbirwo weMaharati. Pisarema roungwaru raDhavhidhi.
Rwakada kufanana chose nePisarema 14. Baba vedu vanotarisa vanhu vose vachitsvaka munhu mumwe anonzwisisa, uye havawani kana mumwe. Vanodya vanhu vavo vanobatwa nokutya pasina chaityisa. Rwunopera ruchishuvira ruponeso kubva muZioni.
53 1Benzi rinoti mumwoyo maro, “Hakuna Mwari.” Vakaora, vachiita zvakaipa zvinonyangadza; hapana munhu anoita zvakanaka.
2Baba vedu vakatarira pasi vari kudenga pavanhu vose kuti vaone kana paiva noaizivisisa, aivatsvaka. 3Vose vakatsauka; pamwe chete vakaora; hapana munhu anoita zvakanaka, kunyange nomumwe chete.
4Ko vaiti vezvakaipa havana ruzivo here—ivo vanodya vanhu vangu sokudya kwavanoita chingwa, uye vasingadani kuna Baba vedu? 5Ipapo vakabatwa nokutya kukuru, pakanga pasina chinhu chokutya; nokuti Baba vedu vakaparadzira mapfupa omunhu akadzika misasa achikurwisa; wakavanyadzisa, nokuti Baba vedu vakavaramba.
6Haiwa, dai ruponeso rwavaIsraeri rwaibva muZioni! Baba vedu pavanodzosa pfuma yavanhu vavo, Jakobho ngaafare, vaIsraeri ngavafare.