Wala Sing Bisan Isa nga Nagahimo sing Maayo
Sa pangulo sang mga manug-amba, suno sa Mahalath. Isa ka salmo sang kaalam ni David.
Halos pareho gid sa Salmo 14. Ginausisa sang aton Amay ang bug-os nga katawhan nga nagapangita sang isa ka tawo nga nakahangop, kag wala sia sing may nakita. Ang mga nagalamon sang iya katawhan ginkapuyan sang kahadlok sa diin wala sing dapat kahadlukan. Nagatapos ini nga nagahandum sang kaluwasan gikan sa Sion.
53 1Ang buangbuang nagasiling sa iya tagiposoon, “Wala sing Dios.” Malaut sila, nagahimo sing makangilil-ad nga kalautan; wala sing bisan isa nga nagahimo sing maayo.
2Nagtan-aw ang aton Amay halin sa langit sa tanan nga katawohan, agud makita kon may yara bala nga nakahangup, nga nagapangita sa iya. 3Nagtalang silang tanan; nangin malaut sila sing tingub; wala sing bisan isa nga nagahimo sing maayo, bisan isa lang.
4Wala bala sing hinalung-ong ang mga manughimo sing kalautan—sila nga nagalamon sang akon katawohan subong sang pagkaon nila sing tinapay, kag wala nagatawag sa aton Amay? 5Didto gintabunan sila sang kahadluk, sa diin wala sing dapat kahadlukan; kay ginpaalaplag sang aton Amay ang mga tul-an sang nagakampo batok sa imo; ginpakahuy-an mo sila, kay ginsikway sila sang aton Amay.
6O, kabay nga ang kaluwasan sa Israel magguwa gikan sa Sion! Kon ipasag-uli sang aton Amay ang kahimtangan sang iya katawohan, magkalipay si Jacob, magkasadya ang Israel.
