Babu Wani Mai Yin Nagarta
Ga shugaban mawaƙa, bisa ga Mahalati. Zabura ta hikima ta Dawuda.
Kusan daidai take da Zabura ta 14. Ubanmu yana duban dukan 'yan adam yana neman mutum ɗaya mai fahimta, bai sami ko ɗaya ba. Tsoro ya kama waɗanda suke cinye jama'arsa a inda babu abin tsoro. Ta ƙare da marmarin ceto daga Sihiyona.
53 1Wawa yakan ce a zuciyarsa, “Babu Allah.” Sun ɓaci, suna aikata mugunta abar ƙyama; babu wani mai yin nagarta.
2Ubanmu ya duba ƙasa daga Sama a kan dukan 'yan adam domin ya ga ko akwai mai ganewa, mai nemansa. 3Dukansu sun kauce; gaba ɗaya sun ɓaci; babu wani mai yin nagarta, ko ɗaya ma babu.
4Masu aikata mugunta ba su da sani ne—su da suke cinye mutanena kamar yadda suke cin burodi, kuma ba sa kiran Ubanmu? 5A can suka cika da razana, inda babu abin razana; gama Ubanmu ya warwatsa ƙasusuwan wanda ya kafa sansani gāba da kai; ka kunyata su, gama Ubanmu ya ƙi su.
6Da ma ceton Isra'ila yă fito daga Sihiyona! Sa'ad da Ubanmu ya maido da wadatar mutanensa, bari Yaƙubu yă yi murna, bari Isra'ila yă yi farin ciki.