మేలు చేయువాడు ఒక్కడును లేడు
సంగీత నిర్దేశకుని కొరకు; మహలతు రాగము చొప్పున. దావీదు రచించిన జ్ఞాన గీతము.
ఇది దాదాపు 14వ కీర్తనకు సమానం. గ్రహించే ఒక్క వ్యక్తి కోసం మన తండ్రి మానవాళినంతా పరిశీలిస్తాడు, కానీ ఒక్కరూ కనబడరు. ఆయన ప్రజలను మింగివేసేవారు, భయపడవలసినది ఏమీ లేని చోట భయంతో పట్టుబడతారు. సీయోనులో నుండి రక్షణ రావాలనే ఆశతో ఇది ముగుస్తుంది.
53 1"దేవుడు లేడు" అని బుద్ధిహీనుడు తన హృదయములో అనుకొనును. వారు చెడిపోయినవారు, హేయమైన దుష్కార్యములు చేయువారు; మేలు చేయువాడు ఒక్కడును లేడు.
2గ్రహించువాడెవడైనా ఉన్నాడా, తనను వెదకువాడెవడైనా ఉన్నాడా అని చూచుటకు మన తండ్రి పరలోకమునుండి సర్వమానవజాతిని కనిపెట్టి చూచెను. 3వారందరు తప్పిపోయిరి; అందరును కలిసి చెడిపోయిరి; మేలు చేయువాడు ఒక్కడును లేడు, ఒక్కడైనను లేడు.
4రొట్టెను తినునట్లు నా ప్రజలను మ్రింగివేయుచు, మన తండ్రికి మొఱ్ఱపెట్టని దుష్కార్యులకు తెలివి లేదా? 5భయపడవలసినది ఏమియు లేని చోట వారు మహా భయముతో నిండిపోయిరి; ఏలయనగా నీకు విరోధముగా దండు దిగినవాని ఎముకలను మన తండ్రి చెదరగొట్టెను; మన తండ్రి వారిని తిరస్కరించెను గనుక నీవు వారిని సిగ్గుపరచితివి.
6ఇశ్రాయేలుకు రక్షణ సీయోనునుండి వచ్చిన యెంత మేలు! మన తండ్రి తన ప్రజల భాగ్యమును చక్కదిద్దునప్పుడు, యాకోబు ఆనందించునుగాక, ఇశ్రాయేలు సంతోషించునుగాక.
