Nkhabe M'bodzi Anacita Pyadidi
Kuna nyakutsogolera nyimbo, mwakubverana na Mahalati. Nyimbo yaudziwisi ya Dhavidhi.
Yakulingana pafupi-fupi na Salmo 14. Baba wathu aonera anthu onsene mbasaka munthu m'bodzi anabvesesa, mbaasowa. Anyakudya mbumba yace aphatwa na mantha pomwe pakhalibe cakugopesa. Imala na kusirira cipulumuso cakubuluka ku Siyoni.
53 1Munthu wakupusa asalonga muntima mwace: “Nkhabe Mulungu.” Iwo ndi akusenseka, mbacita pyakuipa pyakunyanyasa; nkhabe m'bodzi anacita pyadidi.
2Baba wathu ayang'ana pantsi kubuluka kudzulu kuna anthu onsene, toera kuona khala alipo anabvesesa, alipo anansaka Iye. 3Onsene asochera; pabodzi pene asenseka; nkhabe m'bodzi anacita pyadidi, napo m'bodzi tayu.
4Kodi anyakucita pyakuipa nkhabe cidziwiso—ale anadya mbumba yanga ninga anadya nkate, mbakhonda kucemera Baba wathu? 5Penepo iwo akhadzala na kugopa, pa mbuto panakhabe cinthu cakugopa; thangwi Baba wathu abalalisa magogodo a ule akhakumangirani nkhondo; imwe mwaapasa manyadzo, thangwi Baba wathu aakhonda.
6A, mbudabwera upulumuki wa Izarayeli kubuluka ku Sioni! Baba wathu angabwezera pinthu pyadidi pya mbumba yace, mbakomerwe Djakobi, mbatsandzaye Izarayeli.
