Ka Mutu Ku Wisi Hanga Buweti
Kikuma kya musindikila, bwosu bwa mahata. Mukunga wa mudimu wa Tavidi.
Yifwanakana lawu yi Mukunga wa kumi na iya. Tata wetu kisi tala batu boosu hanga kamona mutu wisi bakisa, kaasi kamonaku ata mosi. Bana bisi dya batu bandi, bweya bwabakwata hana hákalaku kima kya kuyukila bweya. Kisi manisa mu kuzola luhulusu lwatuka ku Siyoni.
53 1Zoba wisi zonza muna mbundu yandi: «Heku Nzambi.» Baditotisini, bisi hanga mambu ma mbi ma nzanzi; ka mutu ku wisi hanga buweti.
2Tata wetu watála tuka ku zilu ha batu boosu, hanga kamona kana henina mutu wisi bakisa, henina wisi musanda yandi. 3Boosu bayekukini; hakimosi báditotisini; ka mutu ku wisi hanga buweti, keti mosi loni.
4Kana basadi ba mambi bakondi nzayilu—bana bisi dya batu bama bwosu bisi dya dipha, amana bisi bokadilaku Tata wetu? 5Kwakuna bawu, bweya bwábavwalangana lawu, hana hákalaku kima kya kuyukila bweya; mukuma Tata wetu wákuka bifufwa bya wuna wátelama mu kunwana ngeyi; ngeyi wábakwatisa tsoni, mukuma Tata wetu wábalosa.
6A, buna luhulusu lwa Kiseledi lwátuka ku Siyoni! Muna tangwa Tata wetu kavútula mamboti ma batu bandi, Yakobi kasángwala, Kiseledi kakala yi kyesi.
