1 Akorintu 14 FHB Father's Heart Bible™

14 ¹Tsalakanani kufuna, mbamusirira mwanyindo miyoni ya nzimu, mbwenye makamaka toera mukwanise kuprofetiza. ²Ule analonga na cilirimi nkhabe kulonga kuna anthu tayu, mbwenye kuna Baba wathu—nkhabe munthu anan'bvesesa—iye asalonga pinthu pyakubisika mwa Nzimu. ³Mbwenye ule anaprofetiza asalonga kuna anthu toera kuawangisa, kuapasa cipapo, na kuabalangaza. ⁴Ule analonga na cilirimi asawangisa iye ekhene; ule anaprofetiza asawangisa mpingo. ⁵Ine ndisafuna kuti imwe monsene mulonge na malirimi, mbwenye mwakupiringana ndisafuna kuti muprofetize. Ule anaprofetiza ngozire kupiringana ule analonga na malirimi, kusiyapo angafokotoza, toera mpingo uwangiswe.

⁶Cincino, abale, ndingabwera kuna imwe mbandalonga na malirimi, ndinakuphedzani ninji kusiyapo ndingalonga cibvumbulutso, cidziwiso, profesiya, peno cipfundziso? ⁷Ngakhalambo pinthu pyakusowa umaso pinabulusa mawu—ninga ntsengwe peno n'khombe—mawu angakhonda kusiyana, munthu anadziwa tani cinaimbwa? ⁸Pontho nyanga ingalira mwakukhonda kubveka, mbani anadzikhunganya toera ya nkhondo? ⁹Ndi tenepombo na imwe: lirimi yanu ingakhonda kulonga fala yakubveka, munthu anadziwa tani cinalongwa? Thangwi munakhala mbamulonga basi mu mphepo. ¹⁰Pana mitundu mizinji ya pilongero pa dziko yapantsi, mwakukhonda penula; nkhabe cibodzi cakusowa mabvekero. ¹¹Natenepa ndingakhonda kudziwa mabvekero a mawu, ndinakhala mlendo kuna ule analonga, na ule analonga anakhala mlendo kuna ine. ¹²Ndi tenepombo na imwe: nakuti musafunisisa miyoni ya nzimu, sakani kupiringana pakuwangisa mpingo. ¹³Natenepa, ule analonga na cilirimi aphembe toera akwanise kucifokotoza. ¹⁴Ndingaphemba na cilirimi, nzimu wanga usaphemba mbwenye nzeru zanga nkhabe kubala cinthu.

¹⁵Ndinacitanji tsapano? Ndinaphemba na nzimu wanga, mbandiphembambo na nzeru zanga; ndinaimba nyimbo zakusimba na nzimu wanga, mbandiimbambo na nzeru zanga. ¹⁶Mungakhonda tenepo, mungapereka nkhombo mwa nzimu, munthu wakunja wakukhala penepo anakwanisa tani kulonga kuti “Ameni” pa kupereka kwanu takhuta, nakuti nkhabe kudziwa cinalonga imwe? ¹⁷Imwe panango musapereka takhuta mwadidi, mbwenye munthu unango nkhabe kuwangiswa. ¹⁸Ndisapereka takhuta kuna Baba wathu thangwi ndisalonga na malirimi kupiringana imwe monsene. ¹⁹Mbwenye n'kati mwa mpingo ndisafuna kulonga mafala maxanu na nzeru zanga, toera kupfundzisambo anango, kupiringana mafala pikwi khumi na cilirimi.

²⁰Abale, lekani kunyerezera ninga anapiana. Khalani ninga anang'ono pa pinthu pyakuipa, mbwenye akukula mu kunyerezera.

²¹Mwambo usalonga kuti: “Ine ndinalonga kuna mbumba iyi na malirimi acilendo na milomo ya alendo, ngakhala tenepo nee anadzandibvera Ine,” alonga Baba wathu.

²²Natenepa malirimi ndi cidzindikiro, tayu kuna anyakukhulupira, mbwenye kuna ale akukhonda kukhulupira; profesiya ndi cidzindikiro, tayu kuna akukhonda kukhulupira, mbwenye kuna anyakukhulupira. ²³Natenepa mpingo onsene ungagumanyikana pabodzi mbalonga onsene na malirimi, mbapita anthu akunja peno akukhonda kukhulupira, kodi nkhabe kulonga kuti imwe mwapenga? ²⁴Mbwenye onsene angaprofetiza, mbapita munthu wakukhonda kukhulupira peno wakunja, iye asapaswa mulandu na onsene, asasanthulwa na onsene, ²⁵pinthu pyakubisika pya ntima wace pisapangizwa pakweca; natenepa iye asagwa pantsi na nkope yace mbalambira Baba wathu, mbalonga kuti Baba wathu ali pakati panu mwandimomwene.

Kulambira Mwadidi na Mwandandanda

²⁶Natenepa tani, abale? Mungagumanyikana, m'bodzi na m'bodzi ali na nyimbo yakusimba, cipfundziso, cibvumbulutso, cilirimi, peno cakufokotoza. Pyonsene picitwe toera kuwangisa. ²⁷Munthu angalonga na cilirimi, akhale awiri peno kakamwe atatu, m'bodzi na m'bodzi mwandandanda, pontho m'bodzi afokotoze. ²⁸Ngakhala nkhabe nyakufokotoza, iye akhale dzii n'kati mwa mpingo, mbalonga basi na iye ekhene na kuna Baba wathu. ²⁹Aprofeta awiri peno atatu alonge, pontho anango asanthule mwadidi pinalongwa. ³⁰Pontho cibvumbulutso cingabwera kuna munthu unango wakukhala penepo, ule wakutoma kulonga alekeze. ³¹Thangwi monsene munakwanisa kuprofetiza m'bodzi na m'bodzi, toera onsene apfundze na onsene awangiswe ntima, ³²pontho mizimu ya aprofeta isabvera aprofeta. ³³Thangwi Baba wathu si Mulungu wa cisokonezo tayu, mbwenye wa ntendere, ninga mu mipingo yonsene ya anyakucena. ³⁴Akazi akhale dzii mu mipingo; nkhabe tawiriswa kulonga, mbwenye asafunika kubvera, ninga Mwambombo unalonga. ^a a v34 Mipukutu inango isaikha mavesi 34-35 pakumala kwa vesi 40. ³⁵Angafuna kupfundza cinthu, abvundze amuna awo kunyumba; ndi manyadzo kuna nkazi kulonga n'kati mwa mpingo. ³⁶Peno fala ya Baba wathu yatomera kuna imwe? Peno yafika kuna imwe mwekha basi? ³⁷Munthu anaona kuti iye ndi mprofeta peno wa nzimu, asafunika kudziwa kuti pinakulemberani ine ndi matongero a Mbuya. ³⁸Mbwenye munthu angapwaza pyenepi, iyembo anadzapwazwa.

³⁹Natenepa, abale anga, funisisani kuprofetiza, pontho lekani kukhondesa kulonga na malirimi. ⁴⁰Mbwenye pinthu pyonsene picitwe mwadidi na mwandandanda.