Baye-bayen da suke Gina Iyali

Harsuna ba tare da fassara ba suna gina mai magana kaɗai, saboda haka annabci ya fi: baƙon da ya shigo ya kamata a tona asirin zuciyarsa ya fāɗi yana yin sujada. Kome a cikin taron ana auna shi ko yana ginawa, a kuma yi shi bisa tsari, domin Ubanmu ba mai hargitsi ba ne.

Babi na 14.

Ku biɗi ƙauna, ku kuma yi marmarin baye-bayen Ruhu, musamman ma ku yi annabci. Duk wanda yake magana da wani harshe, ba ga mutane yake magana ba, sai dai ga Ubanmu, domin ba wanda yake gane shi, yana faɗin asirai ne cikin Ruhu. Amma wanda yake annabci, ga mutane yake magana domin gina su, da ƙarfafa su, da ta'aziyya. Wanda yake magana da wani harshe yana gina kansa ne, amma wanda yake annabci yana gina ikkilisiya ne. Ina so dukanku ku yi magana da harsuna, amma gara ku yi annabci. Wanda yake annabci ya fi wanda yake magana da harsuna, sai dai in ya fassara, domin a gina ikkilisiya.

To,'yan'uwa, in na zo wurinku ina magana da harsuna, wane amfani zan yi muku, in ban yi muku magana ta wahayi, ko ta sani, ko ta annabci, ko ta koyarwa ba? Haka ma abubuwa marasa rai da suke fitar da ƙara, ko sarewa ce ko garaya, in ba a bambanta karin waƙar ba, yaya za a san abin da ake kaɗawa? In kuma ƙaho ya busa busar da ba a fahimta ba, wa zai shirya don yaƙi? Haka ku ma, in harshenku bai faɗi kalma a fili ba, yaya za a san abin da ake faɗi? Za ku dai zama kuna magana ne cikin iska. Babu shakka akwai harsuna iri iri da yawa a duniya, kuma babu ko ɗaya da ba shi da ma'ana. To, in ban san ma'anar wannan ƙara ba, zan zama baƙo ga mai maganar, shi kuma mai maganar ya zama baƙo gare ni. Haka ku ma, da yake kuna marmarin baye-bayen Ruhu, sai ku nema ku yi fice cikin ƙarfafa ikkilisiya. Saboda haka, wanda yake magana da wani harshe, ya yi addu'a domin ya iya fassara shi. Domin in na yi addu'a da wani harshe, ruhuna ne yake addu'a, amma hankalina ba ya amfana.

To, me zan yi? Zan yi addu'a da ruhuna, in kuma yi addu'a da hankalina. Zan yi waƙar yabo da ruhuna, in kuma yi waƙar yabo da hankalina. In ba haka ba, in kana yabo da ruhu kaɗai, yaya baƙon da yake zaune a wurin zai ce “Amin” ga godiyarka, da yake bai san abin da kake faɗi ba? Ko da kana ba da godiya yadda ya kamata, duk da haka ba a gina ɗayan ba. Ina gode wa Ubanmu domin ina magana da harsuna fiye da ku duka. Amma a cikin ikkilisiya, gara in faɗi kalmomi biyar da hankalina domin in koya wa waɗansu, da in faɗi kalmomi dubu goma da wani harshe.

'Yan'uwa, kada ku yi tunani kamar yara. Game da mugunta ku zama jarirai, amma game da tunani ku zama balagaggu.

An rubuta a cikin Shari'a cewa, “Da baƙin harsuna da leɓunan baƙi zan yi wa wannan jama'a magana, duk da haka ba za su saurare ni ba,” in ji Ubanmu.

Saboda haka harsuna alama ce, ba ga masu bi ba, sai dai ga marasa bi. Annabci kuwa alama ce, ba ga marasa bi ba, sai dai ga masu bi. To, in dukan ikkilisiya ta taru, kowa kuma yana magana da harsuna, waɗansu baƙi ko marasa bi kuwa suka shigo, ba za su ce kun haukace ba? Amma in duka suna annabci, sai wani marar bi ko baƙo ya shigo, duka za su kashe masa zuciya, duka kuma za su bincike shi, asiran zuciyarsa su tonu. Sa'an nan sai ya fāɗi rubda ciki, ya yi wa Ubanmu sujada, yana shaidawa cewa lalle Ubanmu yana tare da ku.

Sujada cikin Tsari da ya Dace

To,'yan'uwa, me za mu ce? Sa'ad da kuka taru, kowa yana da waƙa, ko koyarwa, ko wahayi, ko harshe, ko fassara. Bari a yi dukan wannan domin gina juna. In wani yana magana da wani harshe, mutum biyu, ko mafi yawa uku, kowa a jere, sai wani kuma ya fassara. In kuma babu mai fassara, sai mai maganar ya yi shiru a cikin ikkilisiya, yana magana da kansa kaɗai da kuma Ubanmu. Bari annabawa biyu ko uku su yi magana, sauran kuma su auna da kyau abin da aka faɗa. In kuma wahayi ya zo wa wani da yake zaune a wurin, sai wanda yake magana da fari ya yi shiru. Gama dukanku kuna iya yin annabci ɗaya bayan ɗaya, domin kowa ya koya, kowa kuma ya sami ƙarfafa. Ruhohin annabawa kuma suna ƙarƙashin ikon annabawa. Gama Ubanmu ba Allah ne na rikici ba, sai dai na salama, yadda yake a dukan ikkilisiyoyin tsarkaka. Mata su yi shiru a cikin ikkilisiyoyi, domin ba a yardar musu su yi magana ba, sai dai su kasance ƙarƙashin iko, yadda Shari'a ma take faɗi. ^a In kuwa suna son su koyi wani abu, sai su tambayi mazansu a gida, gama abin kunya ne mace ta yi magana a cikin ikkilisiya. Ko daga wurinku ne maganar Ubanmu ta fara fitowa? Ko gare ku kaɗai ta zo? Duk wanda yake ganin kansa annabi ne, ko mai bin Ruhu, sai ya gane cewa abin da nake rubuta muku umarnin Ubangiji ne. Amma in wani bai kula da wannan ba, shi ma ba za a kula da shi ba.

Saboda haka,'yan'uwana, ku yi marmarin yin annabci, kada kuma ku hana yin magana da harsuna. Amma bari a yi kome a kan tsari da kuma yadda ya dace.