Kereshüce Shühto

Jisu-o kereshüce metha po lize, pue ketsü mipüri kekre thoyo bakemo poti. Pue shühye, sazüjürako kekrelü kekre atüyi, kücezü Khristako, mu Thüma Nuo vori thi po; vele tüso zhopü thüma sheri semo, tüyo choyimiko sheri semo, Nuo sheri semo, ha Po metü seba poti.

Kezhü 13.

Jisu kereshücelü ta pra tice, pü sajiko mipüe Puce poti, Metha, hihe! Dipü ketsü kezhoko, dipü kereshüce thi küma kevepü! zita.

Jisue Puce poti, Hio kereshüce thi küma kezhoko no ngo me? Ketsü mipüri kekre thoyo ba kemoto; metü shüh va to. zita.

Pu Olive cejütuyo kereshüce rapeco ba die türü tice, Peter, James, John mu Andrew-e Puce tsühkre ketso, Hako ce posü, mha hiko tütse süto, mu mha hiko metü tsühyi ketola seyi ketola dipü ungo süto?

Jisue ukoce po thüra die sü, Mipori neko shü va mo ketola lala bayite; Thüma kükroe aza vori die, I pu zo; zisü, thüma kükro shü züh tato. Neko theri kethiko mu theri thi keto jü seto lize, neko medo va hite; mha hiko mera vori zo ketola, vele süo thülao thi holu. Shühye-e shühye kekre phito, küdee küde kekre phito, cejü kekrekrelü cece thethi tilü, tüsa therü ri süto; mha hiko mütü kemezhe keto thüra zo.

Neko mha münuyite. Sükoe neko mülhiko kühulü süto, mu synagogueko lü neko vüto. Aza na neko kezhoko mu kedeko mhüzülü voto, süko ce zhopo thisü ketola. Mu mera zhopo kevepü shühye metü ce zho sü ketola. Sükoe neko be khapü süva ketola, dipü posü zi nielü mera medo va hite. Sütüce neko ce keve mha posüte; kekrelamori neko mepo, vele Kemesa Rüpüo po ketola.

Sazüo-e pü sazüo sü khasü süva to, nae pü nu ri; nuneko na pu kekre phi die, uko dokhriva to. Thüma metüe aza na neko nhadü to, vele kehopüri pütü thela thi küyimi kelayi zoto.

Neko mhava kemürho shu keto, ba kemoko züde ngoto lize (zü süo phiyo ketimi po seyite), Judealü kübami ta sü cejütuyo vo tate. ^a Ce tho kebami mipori ketsü lüno lüta mo, mori mhapü khiyi tozu die cekolü lüta mo hite. Yilü kübami mipori pü füketü khiyi tozu die la vori hite. Sütüce natsimi kebako mu no kübako ce kemezhe phi tato! Süo tüsülü vori mo ketola neko kecho thiyite, Kekrelamori sütüce kemezhe kezho vori to, ha Poe cejü thiküyi lüno hisa tha ketso süsübi lho pü thizoto, mu süsübi la ketola. Niepoo tüsozho süko shorüh mo sa lize, mipüri kelayi ngoyi lho zomo; vele Pü chosü küyi küdaküyiko züve na, Niepoo tüsozho süko shorüh süto. Süsa mipori neko ce, Hihe, Khrista hilü tele! mori, Hihe, sülü tele! zi lize, neko kemelü va hite. Khrista kücezü mu sadzühküse kücezü pari to, ungo mu mhathoko thi die, thiyi kevethe lize, küdaküyiko ri shü züh tato. Süla neko mha münuyite; I neko ce mha mütü mera posü tazo.

Vele sütüce, kemezhe sü hisalü, nace züdü düta to, mu khrie pü keve thi kemoto; Tüyo thenyüko ra to, mu tüyolü kekuko kena süto. Süsa uko Thümanuo kemeco kezho mu zapozale zü kemhülü vori küzü ngoto. Pue pü tüyochoyimiko ketsü die, tükhra püdi lü lüno, cejü vala ketso lüno tüyo vala ketso tha, Pü küdaküyiko kenguyi to.

Shedübo celü hio seyite: pücoko müzü die püse zhü prari ticoneko, neko tülü tate zi küti seyiyo. Süsübi, neko mha hiko süba ngoto lize, süo tate, keshülü tazo zi küti seyite. I neko ce potü süto, mha hiko metü süba kemothe, nulhü hio di talho. Tüyo mu cejü di tato, vele a jüko di ta kemoto.

Poo Mera Bavüdo Se

Vele süo tüsozho mori bavüdo mipüri semo; tüyolü tüyochoyimiko ri semo, Nuo ri semo, Poo pütho seo. Neko mha münuyite! Khü bayite! Kekrelamori süo bavüdo tütse vori to neko semo ketala.

Hio thüma revü keta sübizo: pü cekro khava die, pü yithoko ce keku keve die, mipüri pü mhahu hü die, mu keshü kefüo ce khü bayi zi jü kha süta. Süla neko khü bayite, kekrelamori cekro niepoo tütse vori to neko semo; meso nüde, mori meso tülu, mori thevü kekhu, mori tüso rena lü. Sümo lize, Pü sütü vori to lize, neko züh zü keba ngo süto. I neko ce po keveo, thüma metü ce ri posüto: Khü bayite! zita.