بيت المقدس به ونړيږى

کله چې ورته ویل کېږي چې د معبد ستاینه وکړي، عيسىٰ وايي چې یوه ډبره به هم پر بلې ولاړه پاتې نه شي. هغه جګړې، د کورنیو یو له بل سره خیانت، دروغجن مسیحان، او د ابن آدم راتګ بیانوي، او وايي چې هېڅوک هغه ورځ نه پېژني، نه پرښتې، نه زوی، یوازې پلار.

څپرکی 13.

کله چې هغه د بيت المقدس نه راووتو، نو د هغۀ يو مُريد هغۀ ته ووئيل، ”اُستاذه، وګوره! څومره لوى لوى ګټې او څومره ښائسته عمارتونه دى!“

عيسىٰ هغۀ ته وفرمائيل، ”تۀ دا لوى لوى عمارتونه وينې؟ دلته به يوه ګټه هم په بله ګټه باندې پاتې نۀ شى، ټول به ونړولے شى.“

کله چې هغه د زيتُون په غر باندې د بيت المقدس په مخ کښې ناست وو، نو پطروس، يعقوب، يوحنا او اندرياس هغۀ نه په ګوښه کښې پوښتنه وکړه، ”مونږ ته ووايه چې دا به کله کيږى او کوم نښه به ښکاره کوى چې دا ټول پوره کېدونکى دى؟“

عيسىٰ هغوئ ته وئيل شروع کړل، ”خبردار اوسئ چې څوک تاسو وا نۀ غولوى. ډېر به زما په نوم راشى او وائى به چې، ’زۀ هغه يم،‘ او ډېر خلق به وغولوى. کله چې تاسو د جنګونو او د جنګونو د آوازو نه واورئ، نو مۀ ګَډوَډېږئ، دا کېدل په کار دى، خو آخر لا نۀ دے راغلے. قوم به د قوم خلاف پاڅى، بادشاهى به د بادشاهۍ خلاف پاڅى، په بېلو بېلو ځايونو کښې به زلزلې راشى، او قحطونه به وى، دا د زيږون د دردونو شروع ده.

تاسو خپل ځان ته خبردار اوسئ. هغوئ به تاسو عدالتونو ته حواله کوى او په عبادت خانو کښې به تاسو ووهى. زما په سبب به تاسو د حاکمانو او بادشاهانو په مخ کښې ودريږئ، دا به هغوئ ته ګواهى وى. او اول به ضرور ټولو قومونو ته انجيل اعلان کولے شى. کله چې هغوئ تاسو ونيسى او حواله مو کړى، نو مخکښې فکرمند مۀ اوسئ چې څۀ به وايئ. هغه څۀ ووايئ چې په هغۀ ساعت کښې تاسو ته درکولے شى، ځکه چې تاسو نۀ يئ چې خبرې کوئ، بلکې روحُ القُدس دے.

ورور به خپل ورور د مرګ دپاره حواله کوى او پلار به خپل بچے. اولاد به د مور او پلار خلاف پاڅى او هغوئ به ووژنى. زما د نوم په سبب به ټول تاسو سره نفرت کوى، خو څوک چې آخر پورې صبر وکړى هغه به بچ کړے شى.

کله چې تاسو د ويجاړۍ هغه مکروه شے ودرېدلے وګورئ چرته چې يې نۀ ښائى درېدل (لوستونکے دې پام کوى)، نو هغه خلق چې په يهوديه کښې دى غرونو ته دې وتښتى. ^a څوک چې د کور په چت باندې وى هغه دې نۀ راکُوزيږى او نۀ دې کور ته داخليږى چې څۀ شے راواخلى. څوک چې په پټى کښې وى هغه دې بېرته نۀ ځى چې خپله چادر راواخلى. په هغه ورځو کښې به د اميندوارو ښځو او د هغو ښځو دپاره څومره سخته وى چې بچو ته به شيدې ورکوى! دُعا وکړئ چې دا د ژمى په مُوسم کښې نۀ وى، ځکه چې هغه ورځې به داسې تکليف راولى چې د هغه وخت نه هيچرې نۀ دے شوے کله چې زمونږ پلار دا دُنيا پېدا کړه بيا تر اوسه پورې، او هيچرې به بيا داسې نۀ کيږى. کۀ چرې مالِک هغه ورځې کمې کړې نۀ وى، نو هيڅوک به بچ شوے نۀ وى، خو مالِک د هغه چُنے شويو خلقو دپاره چې هغۀ غوره کړل، هغه ورځې کمې کړلې. بيا کۀ چرې څوک تاسو ته ووائى چې، ’وګوره، مسيح دلته دے!‘ يا ’وګوره، هلته دے!‘ نو يقين مۀ کوئ. دروغژن مسيحان او دروغژن نبيان به راڅرګنديږى، او نښې او معجزې به ښائى چې کۀ شونے وى نو چُنے شوى خلق هم وغولوى. نو خبردار اوسئ، ما تاسو ته هر څۀ مخکښې ووئيل.

خو په هغه ورځو کښې، د هغه تکليف نه پس، لمر به تياره شى او سپوږمۍ به خپله رڼا نۀ ورکوى، ستورى به د آسمان نه راولوېږى او هغه قوتونه چې په آسمانونو کښې دى وخوځولے به شى. بيا به هغوئ اِبن آدم په ورېځو کښې په لويه قوت او لوئى سره راتلونکے وګورى. هغه به خپل فرښتې ولېږى او خپل چُنے شوى خلق به د څلورو خواؤ نه، د زمکې د کنارو نه تر د آسمان کنارو پورې، راغونډ کړى.

د انځر د ونې نه دا زده کړئ، کله چې د هغې څانګه نرمه شى او پاڼې وشنى، نو تاسو پوهيږئ چې اوړے نزدې دے. هم هغه شان، کله چې تاسو دا شيان کېدونکى وګورئ، نو پوه شئ چې هغه نزدې دے، په دروازه کښې دے. زۀ تاسو ته رښتيا وايم، دا نسل به خامخا تېر نۀ شى ترڅو چې دا ټول شيان نۀ وى شوى. آسمان او زمکه به تېر شى، خو زما خبرې به هيچرې تېرې نۀ شى.

صرف پلار ته د هغې ساعت معلوم دے

خو هغه ورځ او ساعت ته هيڅوک نۀ پوهيږى، نۀ هغه فرښتې چې په آسمان کښې دى، نۀ زوئ، صرف پلار. خبردار اوسئ! بېدار اوسئ! ځکه چې تاسو نۀ پوهيږئ چې هغه وخت به کله راځى.

دا داسې ده لکه څنګه چې يو سړے په سفر روان شى، هغه خپل کور پريږدى، خپلو نوکرانو ته اختيار ورکړى، هر يوه ته خپل خپل کار، او دربان ته حُکم ورکړى چې بېدار پاتې شى. نو بېدار اوسئ، ځکه چې تاسو نۀ پوهيږئ چې د کور مالِک به کله راځى، د ماښام په وخت، د نيمې شپې، د چرګ د بانګ په وخت، يا د سحر په وخت، داسې نۀ وى چې هغه ناڅاپه راشى او تاسو ويده ومومى. څۀ چې زۀ تاسو ته وايم، هم دا هر چا ته وايم، بېدار اوسئ!“