Daniel 9

9 ¹Ahasueruswui naomayara, Mede mikumo, Babylon wungramwuitungli awungana chipamhaikahai Dariuswui mungkhare kumli— ²Awui mungkhare kumli, Daniel ina, Jerusalemwui ngachakting ungshung khavai zingkum hangshini samphangra da ithumwui Avāna Jeremiah marānli hānghaikasā chi, lairikbing chiwui eina theihaira. ³Chiwui vang eina, kakhum eina, bora ngavailaga kala hotlā eina, seihā kasā kala kapo eina ali phākhui khavai, imai Proho Avāli ngareiya.

⁴Iwui Avāli seihā sāda, ningngateida hāngphata: "O Proho Avā, kahaka kala khangachee-khangachā, ali leishida awui ningkhami mayonbingwui vang tuingashit kala lukhamashan mayonmi, ⁵ithumna morei sāhaira, maphālakla sāhaira, makaphā sāhaira, ngakaishihaira, kala nawui ningkhami kala shiyan-chikanwui eina pākthuihaira. ⁶Nawui rao marānbing, ithumwui awungabing, wungnaobing, avāva̱ ngarā, kala ngalei chiwui mibing saikorali nawui ming eina hānghaibingli, ithumna manganāsangmana.

⁷Khamashung khangarong nawuina, O Proho Avā, kha Judahwui mibing, Jerusalemwui kapama mibing, kala nali athumwui mashitkasangwui vang nana athumli kashamshok kahai ngalei kachiva̱li nganailakha kala katāva̱li khalei Israel saikora, ithumwuili aja zimiksho phongda maikashina. ⁸O ithumwui Avā, ithumwuili, ithumwui awungabing, wungnaobing, kala avāva̱ ngarāli phongda maikashi lei, kaja ithumna nali morei sāhaira. ⁹Proho Avāwuili lukhamashan kala morei pheomi lei, kaja ithumna ali ngakaishihaira, ¹⁰kala awui rao marānbingwui khamor eina ithumwui mangāli haimihai awui ainbing zat khavai, ithumwui Avāwui kahāng ithumna manganāmana. ¹¹Israel saikorana nawui ain kaihaowa kala ngareithuida, nawui kahāng manganā makhuisangmana. Chiwui vang eina, ithumwui Avāwui rao Moseswui ainli kapikahai khonkashi kala khangashit chi ithumwuitungli heirormihaira, kaja ithumna ali morei sāhaira. ¹²Ithumli kala ithumli bichar sā ithumwui bicharkasābingli phenda ithumwuitungli kahaka kalākashi rā ngasakda awui tui shāptitmihaira; kazingram saikorawui azingli Jerusalemli shokkahai chi mathun khikha maleimana. ¹³Moseswui ainli kapi kahai thāda, hi kalākashi saikora ithumwuitungli shokhaira; chithālala ithumna ithumwui morei eina ngareithuida kala nawui khamashung tui theishingkhuida, ithumwui Avāwui ngahānkhangai maphāmana. ¹⁴Chiwui vang eina, ithumwui Avāna kalākashi chi khangarān sālaga ithumwuitungli rā ngasaka, kaja ithumwui Avā awui kasāsā saikorali khamashungana; kha ithumna awui kahāng manganāmana.

¹⁵Ara, O Proho Avā, nana pang kapanga eina nawui mibingli Egyptwui eina thānshoka, kala aja zimiksho eina tangda leichinga ming akha nakhalattali sāhaira; ithumna morei sāhaira, ithumna maphālakla sāhaira. ¹⁶O Proho Avā, nawui khamashung khangarongwui kasāsā saikorawui athishurda, nawui malungkhavāt kala malungvāt chi nawui keinung Jerusalem, nawui kathara kaphungwui eina ngareithuimilu; kaja ithumwui morei kala ithumwui avāva̱ ngarāwui khayonkhamāng chiwui vang eina, Jerusalem kala nawui mibing ithumli kuimareida khaleibing saikorali maikashi ngasāhaira.

¹⁷Ara, O ithumwui Avā, narao ina seihā kasā kala kapo hi khashāmilu, kala nakhalattawui vang eina, ngachakyāng kahai nawui katharapamli namai kahormilu, O Proho Avā. ¹⁸Iwui Avā, nawui khanā ithumshong nāshungda nganāmilu; namik sholaga ithumwui ruinganaibing kala naming eina hokakhui keinung chi yangmilu. Ithumna ithumwui kapo nawui mangāli kāshung hi ithumwui khamashung khangarongwui vang maningmana, kha nawui lukhamashan kahakvawui vangna. ¹⁹Amei Avā, nganāmilu! Amei Avā, pheomilu! Amei Avā, nganāda sālu! Mahuinganongalu, nawui vang eina, iwui Avā, kaja nawui keinung kala nawui mibing naming eina hokakhuina."

Avāna Gabrielli Ngahānkā eina Shivāta

²⁰Ina aruila khamatuia, seihā sāda, iwui morei kala iwui mibing Israelwui morei hāngphatta, iwui Avāwui kathara kaphung chiwui vang iwui kapo iwui Avāwui mangāli kāshungda leilakha, ²¹Ina aruila seihā sāda leilakha, kharewui khamahāli ina theihaida mipa Gabrielna, thaklāk eina kapaina, ngazinwui pha̱kaphayā chigatwui atam chi tharan ili samphanga. ^a a v21 Kazing khayingwui pha̱kaphayā chi thangyar bajey kathum tharan chigatkasāna.

²²Ana ili theishingkhui ngasakta, ili ngazekta hānga, "Daniel, ina ara nali ningthei kala theishingkakhui mi khavai shokta rāhaira. ²³Nawui kapo phok tharan, tui akha shokphoka, kala ina nali hāng khavai rāhaira, kaja na makhavāt eina leishihaira mina. Chiwui vang eina tui chi chāda khamahā chi theishingkhuilu:

²⁴"Khalatta pemngasaka khavai, morei pemngasaka khavai, khayonkhamāng pheomi khavai, katang makhavai khamashung khangarong khuirāmi khavai, khamahā kala marān chi mahor namshān khavai, kala tharmathengmeikap kaji kathara pam akha neomi khavai, nawui mibing kala nawui kathara keinungwui vang haptā hangshini kasohaira. ^b b v24 "Haptā hangshini" jikahai hi Hebrew tui akhali kharāna, chiwui kakhalat 'shini shida hangshini' china—katonga kum 490 leira.

²⁵Chiwui vang eina theilu kala theishingkhuilu: Jerusalem hanmiluida sakāluishit khavai kakaso shokkaphok tharan eina, Thao Neomi Kahaia, Jishu, Wungnao chi rāranglakha eina tangda, haptā shini kala haptā hangtharukta khani leira. Chi chānrei kala kuikhanam kong eina sakāluira, kha ningchot kachungkhawui atamli sakāluira. ²⁶Kala haptā hangtharukta khaniwui thili Thao Neomi Kahaia, Jishu, katathaora, kala awuili khikha maleiluimara. Rā khavai wungnaowui mibingna keinung kala kathara shim sāshimānhaora. Chiwui khanao chi tara̱ kaphong thāda rāra, kala khanao eina tangda rai leira; kashimānbing kasohaira. ²⁷Ana haptā akhawui vang mi kachungkha eina tuingashit akha shāptitmira; kala haptā chiwui ngahunshingli ana kachigat kala pha̱kaphayā khāmmihaora. Kakaso kahai khangachang chi shimān khangasaka mi chiwuitungli heirorranglakha eina tangda, Khorumshimwui chuimeikap pamli ana shimān khavai ningkakachai ot akha haira."