Daniel 8

8 ¹Awunga Belshazzarwui munga kakathuma kumli, khare khamahā chiwui thili, Daniel ina khamahā akha samphanga. ²Khamahāli I Elam ngalei Susa keinungmānglili leisai; kala khamahāli I Ulai kongwui ngalemli leisai. ³Ina mik yangkakā eina, yanglu, yaovā akha kongwui mangāli nganinga. Ana juimei angaji khani kai; akha chi akhali juimei, kala juimei chi khanaowa ngakarthui. ⁴Ina theipai, yaovā chi zingtunshong, atungshong, kala azingshong charfa; sāyur khipākha awui mangāli nganing masamphangmana, kala awui pangshapwui eina huikhui kashap khipākha maleithuwa. Ana akhalatta kaphaningkhami thada sai, kala hakmeihaowa.

⁵Ina hi phaningkachungda leilakha, kashuirak eina mevā akha zingtunshongwui eina okathui kuikhamareili ngaleili masāza̱la rāsai; awui mik ngachaili angaji kāshunglak akha kai. ⁶Ana kongwui ngalemli nganinga ina kathei angaji khani leikahai yaovā chi pāngli rāda, malungvāt pangshap eina chili yongvā. ⁷Ina thei, ana yaovā chili nganaimeida, malungvātlākhaoda, awui angaji khani chi shaolaga sātekmi. Yaovā chi awui mangāli nganing khavai yāng maleithuwa; mevā china chili ngaleili horkhaihaida naikazamda, kala yaovā chili awui pangshapwui eina huikhui kashap khipākha maleithuwa. ⁸Mevā chi hakmeimeihaowa, kha awui yāng khalatta atamli angaji hakmei chi sātekhaowa, kala awui pamli kazingramwui masi mati shong angaji kāshunglak mati phorhaowa.

⁹Athum ngachaili akhawui eina angaji kateo akha shoka, kala chi azingshong, zingshoshong, kala tekhamatei ngaleishong hakmeimeihaowa. ¹⁰Chi hakmeihaowa, kazingramwui ashangva̱ vāshungda, kala ashangva̱ kala sirābingwui alungli kaikha ngaleili horkhaida naikazamhaowa. ¹¹Chi ashangva̱wui Wungnaotungli akhalatta reisang ngasaka; kala Wungnaowui rikkatā kachigat chi ngavātāmihaida awui kathara shimwui pam chi ngaleili horkhaihaowa. ¹²Chonkhamakanwui vang eina, raimibing chi thangthangwui rikkatā kachigat singda chili tāmi; kala chi khamashung chi ngaleili horkhaida, sai kala mataisanga.

¹³Chieina kathara akha ngazek chi ina nāsai, kala kathara khangatei akhana matuikasāpā chili ngahāna, "Rikkatā kachigat, ramcho khuirai chonkhamakān, kala katharapam kala ashangva̱ naikazam khavai tāmi kahai khamahā hi katharan eina tangda leira?"

¹⁴Ana ili hānga, "Ngazin kala ngathor thingkha khani shākathum peichaoda; chiwui thili katharapam chi awui mashungrik kahai pamli hankhuira."

Gabrielna Mahākhami chi Bhap Sāmi

¹⁵Daniel ina khamahā chi theida, bhap tā khavai phāda leilakha, mikumo thāda leikahai akha iwui mangāli nganinga. ¹⁶Kala Ulai kongwui ngachaili miwui akhon akhana hoi chi ina nāsai, "Gabriel, mipā hili khamahā chi bhap tā ngasaklu."

¹⁷Ana ina nganinga pamli rānganaimeida, kala ana nganaimeikhaleoda I ngacheehaida mai mashunzanga. Ana ili hānga, "Bhap tālu, miwui naomayara, khamahā hi atam khanaowui vangna."

¹⁸Ana matuithai tharan, I piphup eina ngaleili ngakhumshām eina pivāhaowa; kha ana ili sāza̱da iphei eina nganing ngasaka.

¹⁹Ana hānga, "Nganālu, malungkhavātwui khanaowa atamli khi shokra kaji ina nali chitheira, kaja chi maungshungwui makānkhami atamwui pongli kahāngna. ²⁰Na thei kahai angaji khani khalei yaovā chi Media eina Persiawui awungabingna. ²¹Asam khaunga mevā chi Greece wungramwui awungana; amik ngachaili khalei angaji khareiya chi khare awungana. ²²Angaji katatmi kahai, kala chi apamli mati kashok chiya, awui yurwui eina wungram mati shokra, kha athumna awui pangshap maleira.

²³Athumwui khamung khangachangli, morei kaphungbing kupmiki tharan, azak sākashi kala phākakhaning kathema awunga akha shokra. ²⁴Awui pangshap khareiya leira, kha chi awui khalattawui maningmana. Ana khangachee kahai sākashimān sāda, tāchamhai, ot sāra. Ana kapingabing kala katharabingwui mibingli sāshimānra. ²⁵Awui mareimarā eina, ana apāng azingli mikhanam mataisang ngasakra, kala aningli ana khalatta khāngmathotra. Matheisālakla ana mi kachungkha sāshimānra, kala wungnaobingwui Wungnaoli ngararra; kha mipāng maleila ali sākhayāngra. ^a a v25 Wungnaobingwui Wungnaoli ngararki kaji langsot pangshap chi "mipāng maleila" sākhayanga—kazingram khalattana sākhayang ngasakna. Hi Wungnao, raimibingwui Kathāna chi, shitkasangbingna atam ngamang eina Jishu china da nganākhaowa; ana maningla ithumwui Avāwui mibingli ngakaikashe pangshap saikorali yuikhuina.

²⁶Ngazin kala ngathorwui khamahā nali hānghaikasā chi mashunga, kha na chi mahor namhaolu, kaja chi katāli khalei atambingwui pongli kahāngna."

²⁷Daniel ina, vānhaida ngashun kachungkha kazāpama. Chieina I ngakarthuida awungawui ot sāmi, kha khamahā chi ili matakhakhaida, ina theishingkakhui makashamana.