ራእይ ዝለዓላን ዝወድቃን መንግስታት

ድቤላ ብድቤላ ጤል ተረግፀ፤ እቲ ዓብዪ ቀርኑ ድማ ናብ ኣርባዕተ ተሰብረ። ካብ ሓደ ድማ ናይ ዕለት መስዋእቲ ዘቋርፅ፥ ንሓቂ ኸዓ ናብ ምድሪ ዝድርቢ ንእሽተይ ቀርኒ ወፀ። ገብርኤል ከም ፋርስን ግሪኽን ኢሉ ገለፆ፤ ዳንኤል ድማ ንመዓልቲታት ሓመመ፥ ገና ኸዓ ኣየስተውዓለን።

ምዕራፍ 8።

ኣብ ሳልሳይ ዓመት ንጉስ ቤልሻፃር፥ ድሕሪ እታ ቀዳመይቲ፥ ንኣይ ንዳንኤል ራእይ ተራእየኒ። ኣብቲ ራእይ ኣብ ዕርዲ ሱሳ፥ ኣብ ሃገር ዔላም ነበርኩ፤ ኣብቲ ራእይ ድማ ኣብ ጥቓ ሩባ ኡላይ ነበርኩ። ኣዒንተይ ቋሕ ኣቢለ ረአኹ፦ እንሆ ሓደ ድቤላ ኣብ ቅድሚ እቲ ሩባ ደው ኢሉ ነበረ፤ ክልተ ነዋሕቲ ኣቕርንቲ ኸዓ ነበሮ፤ እቲ ሓደ ካብቲ ኻልእ ይነውሕ ነበረ፥ እቲ ዝነውሐ ኸዓ ዳሕራይ ወፀ። እቲ ድቤላ ንምዕራብን ንሰሜንን ንደቡብን እናወግአ ረአኹ። ዝኾነ እንስሳ ኣብ ቅድሚኡ ደው ክብል ኣይከኣለን፤ ካብ ሓይሉ ዘናግፍ ከዓ ኣይነበረን። ከም ፍቓዱ ገበረ፥ ዓበየ ድማ።

እዙይ እናስተንተንኩ እንተለኹ፥ እንሆ ሓደ ድቤላ ጤል ካብ ምዕራብ ናብ ኵላ ምድሪ፥ ንምድሪ እንተይተንከፈ መፀ፤ ኣብ መንጎ ኣዒንቱ ድማ ርኡይ ቀርኒ ነበሮ። ናብቲ ኣብ ጥቓ እቲ ሩባ ደው ኢሉ ዝረአኽዎ ኽልተ ኣቕርንቲ ዘለዎ ድቤላ መፀ፤ ብነደዲ ሓይሊ ኸዓ ናብኡ ጐየየ። ናብቲ ድቤላ በፂሑ ተቖጢዑ፥ ነቲ ኽልተ ኣቕርንቱ ወቒዑ ሰበሮ ረአኹ። እቲ ድቤላ ኣብ ቅድሚኡ ደው ክብል ሓይሊ ኣይነበሮን፤ እቲ ድቤላ ጤል ከዓ ናብ ምድሪ ደርቢዩ ረገፆ፥ ነቲ ድቤላ ኻብ ሓይሉ ዘናግፍ ከዓ ኣይነበረን። እቲ ድቤላ ጤል የመና ዓበየ፤ ኣብ ምልኣት ሓይሉ ግና እቲ ዓብዪ ቀርኒ ተሰብረ፤ ኣብ ቦታኡ ኸዓ ኣርባዕተ ርኡያት ኣቕርንቲ ናብ ኣርባዕተ ንፋሳት ሰማይ በቘሉ።

ካብ ሓደ ኻብኣቶም ድማ ንእሽተይ ቀርኒ ወፀ፤ ናብ ደቡብን ናብ ምብራቕን ናብታ ኽብርቲ ምድርን የመና እናዓበየ ኸደ። ክሳዕ ሰራዊት ሰማይ ዓበየ፤ ካብቲ ሰራዊትን ካብ ከዋኽብትን ገሊኡ ናብ ምድሪ ደርበየ፥ ረገፆም ድማ። ኣብ ልዕሊ መስፍን እቲ ሰራዊት ርእሱ ኣዕበየ፤ ናይ ኵልሻዕ መስዋእቲ እቲ መስፍን ተኣልየ፥ ቦታ መቕደሱ ኸዓ ተደርበየ። ብምኽንያት ዓመፅ ድማ፥ ምስ ናይ ዕለት መስዋእቲ እቲ ሰራዊት ናብኡ ተውሃበ፤ ንሓቂ ኸዓ ናብ ምድሪ ደርበያ፥ ገበረ ከዓ ሰለጠ።

ሽዑ ሓደ ቅዱስ ክዛረብ ሰማዕኹ፤ ካልእ ቅዱስ ድማ ነቲ ዝዛረብ ዝነበረ ከምዙይ ኢሉ ጠየቖ፦ “እቲ ራእይ፥ ናይ ኵልሻዕ መስዋእቲ፥ እቲ ዘባድም ዓመፅ፥ መቕደስን ሰራዊትን ንረጊፃ ምሃቦም ክሳዕ መዓስ እዩ?”

ንሱ ድማ “ክሳዕ ክልተ ሽሕን ሰለስተ ሚእትን ምሸትን ንግሆን እዩ፤ ሽዑ እቲ መቕደስ ናብ ቅኑዕ ኩነታቱ ክምለስ እዩ” በለኒ።

ገብርኤል ነቲ ራእይ የብርሆ

ኣነ ዳንኤል ነቲ ራእይ ክርድኦ እናደለኹ እንተርኢ እንተለኹ፥ እንሆ ሰብ ዝመስል ኣብ ቅድመይ ደው በለ። ካብ ኡላይ ከዓ ድምፂ ሰብ “ኦ ገብርኤል! ነዝ ሰብ እዙይ ነቲ ራእይ ኣፍልጦ” እናበለ ክፅውዕ ሰማዕኹ።

ናብቲ ደው ኢለሉ ዝነበርኩ ቦታ ቀረበ፤ ክቐርብ እንተሎ ድማ ፈሪሐ ብገፀይ ተደፋእኹ። ንሱ ኸዓ “ኣታ ወዲ ሰብ፥ እቲ ራእይ ናይ መወዳእታ ዘመን እዩ እሞ፥ ኣስተውዕል” በለኒ።

ክዛረብ እንተሎ፥ ገፀይ ናብ ምድሪ ቀኒዐ ኣፀቢቐ ደቀስኩ፤ ንሱ ግና ተንከፈኒ፥ ኣብ እግረይ ኣቘመኒ።

ንሱ ድማ ከምዙይ በለ፦ “ስማዕ፥ እዙይ ናይ መወዳእታ ቑፅር ዘመን ይምልከት እዩ እሞ፥ ኣብ ዳሕረዋይ ዘመን ቍጥዓ ዝኸውን ክነግረካ እየ። እቲ ኽልተ ኣቕርንቲ ዘለዎ ዝረኣኻዮ ድቤላ፥ ነገስታት ሜዶንን ፋርስን እዩ። እቲ ፀጕራም ድቤላ ጤል፥ ንጉስ ግሪኽ እዩ፤ እቲ ኣብ መንጎ ኣዒንቱ ዘሎ ዓብዪ ቀርኒ ኸዓ፥ እቲ ቐዳማይ ንጉስ እዩ። እቲ ዝተሰብረ ቀርኒ፥ ኣብ ቦታኡ ኸዓ ኣርባዕተ ምልዓሎም፦ ካብ ህዝቡ ኣርባዕተ መንግስታት ክትንስኣ እየን፥ ሓይሉ ግና ኣይህልወንን።

ኣብ መወዳእታ ግዝኣቶም፥ ሓጥኣን ምልኣቶም ምስ በፅሑ፥ ገፁ ዘፍርሕ፥ ተንኰል ዝፈልጥ ንጉስ ክትንስእ እዩ። ሓይሉ ዓብዪ ክኸውን እዩ፥ ናይ ባዕሉ ግና ኣይኮነን፤ ዜስካሕክሕ ጥፍኣት ከዓ ከምፅእ፥ ክሰልጦ፥ ክገብርውን እዩ። ንሓያላት ከምኡውን ንህዝቢ እቶም ቅዱሳን ከጥፍእ እዩ። ብጕርሒ ኸዓ ተንኰል ኣብ ትሕቲ ኢዱ ክሰልጥ ይገብር፥ ብልቡ ድማ ርእሱ የዕቢ። ብድንገት ንብዙሓት የጥፍእ፥ ኣብ ልዕሊ መስፍን መሳፍንቲ ድማ ይለዓል፤ ግናኸ ብዘይ ናይ ሰብ ኢድ ክስበር እዩ። ^a

እቲ ዝተነገረካ ናይ ምሸትን ናይ ንግሆን ራእይ ሓቂ እዩ፤ ንሱ ግና ናይ ርሑቕ መዓልቲታት ይምልከት እዩ እሞ፥ ሕተሞ።”

ኣነ ዳንኤል ደኺመ ንመዓልትታት ሓመምኩ። ድሕሪኡ ተሲአ ስራሕ ንጉስ ገበርኩ፥ እቲ ራእይ ግና ኣስደመመኒ፥ ክርደኦ ኸዓ ኣይከኣልኩን።