ዳንኤል 8

8 ¹በንጉሥ ብልጣሶር ዘመነ መንግሥት በሦስተኛው ዓመት፣ ከፊተኛው ራእይ በኋላ፣ ለእኔ ለዳንኤል ራእይ ታየኝ። ²በራእዩም በኤላም አውራጃ ባለችው በሱሳ ግንብ ውስጥ ነበርሁ፤ በራእዩም በኡላይ ቦይ አጠገብ ነበርሁ። ³ቀና ብዬም ተመለከትሁ፤ እነሆ፣ ሁለት ረዣዥም ቀንዶች ያሉት አንድ አውራ በግ በቦዩ ፊት ለፊት ቆሞ ነበር፤ ቀንዶቹም አንዱ ከሌላው ይረዝም ነበር፤ የረዘመውም ዘግይቶ የወጣ ነበር። ⁴አውራ በጉም ወደ ምዕራብ፣ ወደ ሰሜንና ወደ ደቡብ ሲወጋ አየሁ፤ ማንም እንስሳ በፊቱ ሊቆም አልቻለም፤ ከኀይሉም የሚያድን አልነበረም። እንደ ወደደ አደረገ፤ ታላቅም ሆነ።

⁵ይህንም ሳስብ፣ እነሆ፣ አንድ አውራ ፍየል ምድርን ሳይነካ ከምዕራብ መጥቶ ምድርን ሁሉ አቋረጠ፤ በዐይኖቹም መካከል ጕልሕ ቀንድ ነበረው። ⁶በቦዩም አጠገብ ቆሞ ወዳየሁት ባለ ሁለት ቀንድ አውራ በግ መጣ፤ በተቈጣ ኀይልም ወደ እርሱ ሮጠ። ⁷ወደ አውራ በጉም ቀርቦ፣ ተቈጥቶ ሁለቱን ቀንዶቹን መትቶ ሲሰብር አየሁ፤ አውራ በጉም በፊቱ ለመቆም ኀይል አልነበረውም፤ ፍየሉም ወደ ምድር ጣለው፤ ረገጠውም፤ ከኀይሉም አውራ በጉን የሚያድን አልነበረም። ⁸ፍየሉም እጅግ ታላቅ ሆነ፤ ነገር ግን በኀይሉ ፍጻሜ ላይ ታላቁ ቀንድ ተሰበረ፤ በስፍራውም ወደ ሰማይ አራቱ ነፋሳት አራት ጕልሕ ቀንዶች ወጡ።

⁹ከእነርሱም ከአንዱ አንዲት ትንሽ ቀንድ ወጣች፤ ወደ ደቡብ፣ ወደ ምሥራቅና ወደ ከበረችው ምድር እጅግ ታላቅ እየሆነች አደገች። ¹⁰እስከ ሰማይ ሠራዊትም ድረስ ታላቅ ሆነች፤ ከሠራዊቱና ከከዋክብቱም አንዳንዱን ወደ ምድር ጣለች፤ ረገጠቻቸውም። ¹¹በሠራዊቱም አለቃ ላይ ራስዋን ከፍ ከፍ አደረገች፤ የአለቃውም የዘወትር መሥዋዕት ተወገደ፤ የመቅደሱም ስፍራ ተገለበጠ። ¹²ስለ ዐመፅም ሠራዊቱ ከዕለት መሥዋዕቱ ጋራ ለእርስዋ ተሰጠ፤ እውነትንም ወደ ምድር ጣለች፤ አደረገችም፤ ተከናወነላትም።

¹³ከዚያም አንድ ቅዱስ ሲናገር ሰማሁ፤ ሌላም ቅዱስ ለተናገረው፣ “ራእዩ፣ የዘወትር መሥዋዕቱ፣ ጥፋትን የሚያመጣው ዐመፅ፣ መቅደሱና ሠራዊቱ ለመረገጥ መሰጠታቸው እስከ መቼ ነው?” ብሎ ጠየቀ።

¹⁴እርሱም፣ “ለሁለት ሺሕ ሦስት መቶ ማታና ማለዳ ነው፤ ከዚያም መቅደሱ ወደ ተገባው ሁኔታ ይመለሳል” አለኝ።

ገብርኤል ራእዩን ያብራራል

¹⁵እኔም ዳንኤል ይህን ራእይ እያየሁ ለማስተዋል ስፈልግ፣ እነሆ፣ ሰውን የሚመስል አንድ አካል በፊቴ ቆመ። ¹⁶ከኡላይም መካከል፣ “ገብርኤል ሆይ፣ ለዚህ ሰው ራእዩን አስረዳው” ብሎ የሚጠራ የሰው ድምፅ ሰማሁ።

¹⁷ወደ ቆምሁበትም ቀረበ፤ በቀረበም ጊዜ ደንግጬ በግንባሬ ተደፋሁ። እርሱም፣ “የሰው ልጅ ሆይ፣ አስተውል፤ ራእዩ ለፍጻሜው ዘመን ነው” አለኝ።

¹⁸ሲናገርም ፊቴን ወደ ምድር አድርጌ በከባድ እንቅልፍ ተኛሁ፤ ነገር ግን ዳሰሰኝ፤ አቆመኝም።

¹⁹እርሱም እንዲህ አለ፤ “ስማ፤ በኋለኛው የቍጣ ዘመን የሚሆነውን እነግርሃለሁ፤ ይህ የተወሰነውን የፍጻሜ ጊዜ ይመለከታልና። ²⁰ያየኸው ባለ ሁለት ቀንድ አውራ በግ የሜዶንና የፋርስ ነገሥታት ነው። ²¹ጠጕራም ፍየሉም የግሪክ ንጉሥ ነው፤ በዐይኖቹም መካከል ያለው ታላቁ ቀንድ የመጀመሪያው ንጉሥ ነው። ²²የተሰበረው ቀንድ፣ በስፍራውም የተነሡት አራቱ፣ ከሕዝቡ አራት መንግሥታት ይነሣሉ፤ ነገር ግን እንደ ኀይሉ አይደሉም።

²³በንግሥናቸውም ፍጻሜ፣ ኀጢአተኞች ሲፈጸሙ፣ ጨካኝ ፊት ያለው፣ ተንኰልን የሚያስተውል ንጉሥ ይነሣል። ²⁴ኀይሉም ታላቅ ይሆናል፤ ነገር ግን በራሱ ኀይል አይደለም፤ ዐሳዛኝ ጥፋትንም ያመጣል፤ ይከናወንለታል፤ ያደርግማል። ኀያላኑንና የቅዱሳኑን ሕዝብ ያጠፋል። ²⁵በተንኰሉም ሽንገላ በእጁ እንዲከናወን ያደርጋል፤ በልቡም ራሱን ከፍ ከፍ ያደርጋል። ሳይታሰብም ብዙዎችን ያጠፋል፤ በመሳፍንት አለቃም ላይ ይነሣል፤ ነገር ግን ያለ ሰው እጅ ይሰበራል። ^a a v25 በመሳፍንት አለቃ ላይ የሚነሣው ትዕቢተኛ ኀይል “ያለ ሰው እጅ” ይደቅቃል፤ በሰማይ ራሱ ይሰበራል። ይህ አለቃ፣ የሠራዊቱ ጌታ፣ ቤተ ክርስቲያን ከጥንት ጀምሮ ኢየሱስ እንደ ሆነ ሰምታለች፤ እርሱም በአባታችን ሕዝብ ላይ የተነሣውን ኀይል ሁሉ ብቻውን ያሸንፋል።

²⁶የተነገረህም የማታና የማለዳ ራእይ እውነት ነው፤ ነገር ግን አትመው፤ ሩቅ ያሉትን ዘመናት ይመለከታልና።”

²⁷እኔም ዳንኤል ዝላሁ፤ ለዕለታትም ታመምሁ። ከዚያም ተነሥቼ የንጉሡን ሥራ ሠራሁ፤ ነገር ግን ራእዩ አስደነገጠኝ፤ ከማስተዋልም በላይ ሆነ።