Jonah Tui Kathuknu Bi
Ngaa pui bon sung bina Jonah na tui bi thinu mi khat danga ani Pa khou kalum nge, balu bi tui kaling khumga khatle talei ramna banung la baom inkhaan khwa seiga khaannu kaan bi, baom kum ding khun bina kai thou thangnu briakpina ani Pa khou swan nge. Maanna to damnu chong ren ding zei lune diga baningsuluga, ngaana maan ding talei kasaak la bachinta nge.
2 1Atiga Jonah na ngaa pui bon sung bina ani Pa khou kalum rwe: 2Ariangrek pi eina Apa khou kou rwe, atiga Maanna akhou katake; kathi ram bon sung bina eina paang thang lang pao rwe, atiga Nangna akhwan ngaisu rwe. 3Nangna ating tui kathuknu riak la, tuipui lungning bi bazwan thang rwe, atiga tuipui kanina ating han qwat rwe; Naom tui lian bing khatle tui kabaapnu bing ga ating chung bi phun swak rwe. 4Atiga eina rinne, ‘Namikphaang bina ei bathan thangsia thang rwe; atiyeda eina Nabathiangnu kalum in lang toga le phaanglune.’ 5Tuina ating thi tanu tangga lem hung rwe; tui kathuknuna ating han qwat rwe; tuipui kaling na alu bi kazwan rwe. 6Ei rammwan bing om baowei riak la ta swak rwe; talei ramna ating banung la baom inkhaan bing khwa seiga khaan drwe. Atiyeda Nangna akum ding khun bina kai thou thang rwe, Apa. 7Akum ga braan dam ong ngaake, eina Apa ding baningsu rwe, atiga aom hweininu ga Nakhou, Nabathiangnu kalum in khou hung tang rwe. 8Bathaang maaknu ri katha ding batainu bing ga, bani lang tonu kriang khouna lampui maan drwe. 9Atiyeda eina Nakhou chakrin le swanna rikhaang pot kat thanglune; eina to damnu chong ren bathin ding zeilune. Ringriak ka ani Pa omme!
10Atiga ani Pa na ngaa pui khou chong rin rwe, atiga ngaa puina Jonah ding takan taram la swak sat rwe.