മൂഢന്റെ നിഷേധം
സംഗീതസംവിധായകനു വേണ്ടി. ദാവീദിന്റെ സങ്കീർത്തനം.
ദൈവം ഇല്ല എന്ന ഭോഷന്റെ വാദത്തെ സൈദ്ധാന്തികമായല്ല, പ്രായോഗികമായാണ് ഇവിടെ കാണുന്നത്. വിവേകമുള്ള ആരെങ്കിലുമുണ്ടോ എന്ന് നമ്മുടെ പിതാവ് മനുഷ്യവർഗ്ഗത്തെ മുഴുവൻ പരിശോധിക്കുന്നു; ആരെയും കാണുന്നില്ല. അവന്റെ ജനത്തെ വിഴുങ്ങുന്നവരെ പെട്ടെന്നുള്ള ഭീതി പിടികൂടുന്നു; സീയോനിൽനിന്നുള്ള രക്ഷയ്ക്കായി വാഞ്ഛിച്ചുകൊണ്ട് സങ്കീർത്തനം അവസാനിക്കുന്നു.
14 1മൂഢൻ തന്റെ ഹൃദയത്തിൽ, “ദൈവമില്ല” എന്നു പറയുന്നു. അവർ വഷളരായിരിക്കുന്നു, അവരുടെ പ്രവൃത്തികൾ നീചം; നന്മ ചെയ്യുന്നവൻ ആരുമില്ല.
2വിവേകമുള്ളവരും അവിടുത്തെ അന്വേഷിക്കുന്നവരുമായി ആരെങ്കിലുമുണ്ടോ എന്നു കാണാൻ നമ്മുടെ പിതാവ് സ്വർഗത്തിൽനിന്ന് മനുഷ്യമക്കളുടെമേൽ നോക്കുന്നു. 3അവരെല്ലാവരും വഴിതെറ്റിപ്പോയി; ഒന്നിച്ച് വഷളരായിത്തീർന്നു; നന്മ ചെയ്യുന്നവൻ ആരുമില്ല, ഒരുവൻപോലുമില്ല.
4അപ്പം തിന്നുന്നതുപോലെ എന്റെ ജനത്തെ വിഴുങ്ങുകയും നമ്മുടെ പിതാവിനെ ഒരിക്കലും വിളിച്ചപേക്ഷിക്കാതിരിക്കുകയും ചെയ്യുന്ന ഈ ദുഷ്‌പ്രവൃത്തിക്കാർക്കെല്ലാം ഒന്നും അറിഞ്ഞുകൂടേ? 5അവിടെ അവർ ഭയത്താൽ നടുങ്ങിപ്പോയി; എന്തെന്നാൽ നമ്മുടെ പിതാവ് നീതിമാന്മാരുടെ തലമുറയോടുകൂടെയുണ്ട്. 6ദുഷ്‌പ്രവൃത്തിക്കാരേ, എളിയവന്റെ പദ്ധതികൾ നിങ്ങൾ പാഴാക്കാൻ നോക്കുന്നു; എന്നാൽ നമ്മുടെ പിതാവ് അവന്റെ അഭയമാകുന്നു.
7ഹാ, ഇസ്രായേലിന്റെ രക്ഷ സീയോനിൽനിന്ന് വന്നെങ്കിൽ! നമ്മുടെ പിതാവ് തന്റെ ജനത്തിന്റെ ഭാഗ്യം തിരികെ നൽകുമ്പോൾ, യാക്കോബ് ഉല്ലസിക്കട്ടെ, ഇസ്രായേൽ ആനന്ദിക്കട്ടെ.
