Tiiyetap Chii ne Abusat
Agobo kondaindetap musik. Ne po Daudi.
Mwaetap chii ne abusat kole momi Kamuktaindet ko kigeeri ko uu poisyet, ma ko uu ng'alaalet kityo. Cheeng'ei Kwandanyo ibindap piik tugul si konyoor chiito ne guiyei, ago ma konyoor age tugul. Che amei piikyik ko inyoorchin kamuiset ne oo; letennyi ko kanyeetap yetunet ne punu Zion.
14 1Mwaei chii ne abusat eng' muguleldanyi, kole, “Momi Kamuktaindet.” Kagong'emak, yaach poisyonikwak; momi chiito age tugul ne yaei ne myee.
2Keerei Kwandanyo choortagei eng' kipsengwet lagogap chii, si koger kole mi che guiyei, che cheeng'ei ineendet. 3Kagoweigei tugul let; kong'emak togeennyi; momi chiito age tugul ne yaei ne myee, agot agenge.
4Tos mongen kiy age tugul, yaigap yaityo tugul chu che amei piikyuk ko uu ye amei amitwogik, ak ma koi koguure Kwandanyo? 5Mi yoo, ko kagoibutyin kamuiset ne oo, amu mi Kwandanyo kobooto ibindap piik che po imanda. 6Omaasi okweek yaigap yaityo che chobei pooryeet, ago Kwandanyo ko irimennyi.
7Nda ki punu yetunetap Israel eng' Zion! Ye isoobi Kwandanyo porotetap piikyik, ingoboiboitu Jakobo, ingobaibait Israel.